Huru raveraa i te feia i horo ê i to ratou fenua
I ROTO i te Ture ta te Atua ra o Iehova i horoa na te nunaa o Iseraela, ua faahaamanaˈohia ˈtu i te mau ati Iseraela e, i riro na ratou ei feia ěê i Aiphiti. (Exodo 22:21; 23:9; Deuteronomi 10:19) No reira ratou i faauehia ˈi ia aroha i te feia ěê i rotopu ia ratou, ia hiˈo ia ratou ei mau taeae.
Te na ô ra hoi te Ture a te Atua e: “Ia purutia mai te taata ê [e pinepine e taata i horo ê i to ˈna fenua] i ǒ oe, i to outou na fenua, eiaha outou e hamani ino ia ˈna: ia riro râ te taata ê e parahi i ǒ outou na mai te taata tupu atoa ia outou, e aroha hoi oe ia ˈna mai te aroha ia oe ihora; e taata ěê atoa hoi outou i te fenua ra i Aiphiti.”—Levitiko 19:33, 34.
Ua ite Iehova e e pinepine te feia ěê i te haaparuparu e te mǎtaˈu haere noa, no reira oia i horoa ˈi i te mau ture papu ia hamani-maitai-hia e ia paruruhia ratou. A hiˈo na i te mau tiaraa i muri nei o ta ratou i fanaˈo.
TE TIARAA IA FANAˈO I TE HAAVARAA TIA: “Ia hoê â a outou utua i ta te taata ê, e ta te taata tupu.” “Eiaha oe e ruri ê i te parau i te taata ê.”—Levitiko 24:22; Deuteronomi 24:17.
TE TIARAA IA FANAˈO I TE TUFAA AHURU: “Ia tae i te hopea o te toru o te matahiti ra, e hopoi mai oe i te tufaa ahuru atoa o ta oe ra taoˈa i tupu i te reira matahiti, a haaputu ai i roto i to oe ra fare; e e haere mai te ati Levi, (no te mea aita a ˈna e tufaa e te fenua i ǒ oe ra) e te taata ěê, e te otare, e te vahine ivi atoa i ǒ oe ra e amu, e ia fiu.”—Deuteronomi 14:28, 29.
TE TIARAA IA FANAˈO I TE MONI OHIPA MAITAI: “Eiaha oe e hamani ino i te tavini veve, e te ati, i tarahuhia ra, to roto i to mau taeae ra, e to te mau taata ěê i to fenua na i roto i to mau oire ra.”—Deuteronomi 24:14.
TE TIARAA IA FANAˈO TE TAPARAHI TAATA OPUA ORE I TE HAAPURAA: “E taua na oire e ono ra, ei oire haapuraa ïa, no te tamarii a Iseraela, e no te taata ěê, e no te taata i purutia noa i roto ia ratou; ei hororaa no te taata i pohe te taata ia ˈna ra e aore oia i ite.”—Numera 35:15.
TE TIARAA IA OHI I TE TOEA MAA: “Ia ooti outou i te maa auhune o te fenua na, eiaha oe e ooti haapau roa i te peho rii o ta oe mau aua, e eiaha hoi oe e ohi i te toea rii maa auhune na oe na. Eiaha hoi oe e ohi i te toea i ta oe mau ô vine ra, eiaha hoi oe e ohi i te vine i mairi i ta oe mau ô vine ra; e vaiiho oe i te reira na te taata rii, e na te purutia: o vau o to outou Atua ra o Iehova.”—Levitiko 19:9, 10.
Oia mau, te aroha nei to tatou Poiete, te Atua ra o Iehova, i te feia i horo i to ratou fenua, e e oaoa oia ia na reira atoa anaˈe tatou. “Ei pee outou i te Atua,” o ta te aposetolo kerisetiano ra o Paulo ïa i papai, “ei haerea aroha to outou.”—Ephesia 5:1, 2.
[Faaiteraa i te fatu o te hohoˈa i te api 9]
Boy on left: UN PHOTO 159243/J. Isaac