Ua hutihia to ˈna ara-maite-raa

I te avaˈe me 1995 ua papai te hoê vahine no te oire no New York i te pu rahi a te mau Ite no Iehova i Brooklyn, i New York. Teie ta ˈna i faataa:

“Te haere noa ra vau na raro i te aroâ East 124th St., i rotopu i te mau aroâ First Avenue e Second Avenue. Hiˈo atura vau i raro, e te peepee haere noa ra te tahi mau api parau iti i te mataˈi. Piˈo ihora vau e ua ohi e toru o ta outou mau api parau iti, Te tamǎrûraa no te feia e taiâ ra, A fanaˈo i te hoê oraraa utuafare oaoa, e O vai mau na te faatere o te ao nei? Ua taio pauroa vau e ua au roa vau.

“E oaoa roa vau mai te peu e e farii outou i te faatae mai i te tahi mau haamaramaramaraa no nia i te hoê haapiiraa bibilia tamoni ore i to ˈu fare. Mai te peu e e nehenehe, te hinaaro atoa nei au i te tahi o ta outou mau buka e te mau vea. No te mea i to ˈu manaˈoraa, ua riro ei haamaitairaa i to te Fatu maitai, tuuraa i na api parau iti e toru i nia i to ˈu purumu ia ite atu vau. Te ohipa mau nei te Fatu na roto i te mau ravea maere mau.”

Mai te peu e te hinaaro nei outou e taio i teie mau api parau iti anaanatae roa aore ra i te hoê haapiiraa bibilia tamoni ore i to outou fare, a papai i te amaa a te Taiete Watchtower, B.P. 7715, 98719 Taravao, TAHITI aore ra i te hoê o te mau vahi nohoraa i faataahia i te api 5.