“Mauruuru no te tautururaa mai ia ˈu ia haapii no nia ia Iehova!”
Teie ïa te parau putapû mau a te hoê potii e 16 matahiti no Floride, i te mau Hau Amui no Marite. I muri aˈe i to ˈna taioraa i te mau buka i neneihia e te mau Ite no Iehova, ua papai o ˈna e:
“Aita vau e haamanaˈo faahou ra i te iˈoa o te buka, tera râ ua taio vau i te hoê buka no nia i te oraraa o Iesu o ta ˈu e manaˈo ra e na outou i nenei. Na mua ˈˈe au a taio ai i taua buka ra, ua manaˈo vau e ua ite au i te mau mea atoa o tei tia ia ˈu ia ite. Te tiaturi nei au i te Atua e ia Iesu, te pure nei au na mua ˈˈe i te tamaaraa avatea e i te po atoa, e e oraraa maitai to ˈu. I muri aˈe râ i te taioraa i taua buka ra, ua taa ˈtura ia ˈu e aita vau i ite maitai i te mau mea atoa e e tia ia ˈu ia tamau noa i te taio e i te haapii no nia i te Atua ra o Iehova e ia Iesu e ia vetahi ê i roto i te Bibilia.
“Te taui rii noa ra vau i te tahi o to ˈu mau haerea ia nehenehe au e riro mai ei tavini maitai aˈe no te Atua. Ahiri e aita te Taiete Watch Tower, eita atoa ïa vau e ite no nia i te Atua e te mau aamu i roto i te Bibilia. Mauruuru no te tautururaa mai ia ˈu ia haapii no nia ia Iehova!”
Te taata rahi roa ˈˈe i ora aˈenei o te upoo parau ïa o te buka ta te potii i faahiti. Ua ravehia te hoê tutavaraa i roto no te hohora i te mau ohipa atoa i tupu i roto i te oraraa o Iesu i nia i te fenua nei o tei vauvauhia i roto i na Evanelia e maha. Mai te peu e e hinaaro outou i te hoê buka aore ra i te hoê haapiiraa bibilia tamoni ore i to outou fare, a papai i te amaa a te Taiete Watchtower, B.P. 7715, 98719 Taravao, TAHITI aore ra i te hoê o te mau vahi nohoraa i faataahia i te api 5.