Ia farii-maitai-hia te feia ěê

I te avaˈe setepa 1994, ua papai te hoê taata no Michigan, i te mau Hau Amui no Marite, i te amuiraa a te mau Ite no Iehova i te oire Lebanon, i Tennessee. Teie ta ˈna i faataa:

“I te sabati i mairi aˈenei, 6 no tiunu 1993, ua haere au i ta outou oreroraa parau huiraatira e te haapiiraa o Te Pare Tiairaa. A tahi ra vau i tomo ai i roto i te hoê Piha no te Basileia, e ua putapû roa vau i to ˈu iteraa i te mau mata ataata atoa e te here rotahi. Tau minuti noa tei mairi i to ˈu taeraa, e i to ˈu tomoraa ˈtu, o vau anaˈe to ˈu parahiraa. Ua horoa mai e piti nau hoa faaipoipo i nia i te hoê â anairaa parahiraa i te hoê Bibilia e te hoê vea o Te Pare Tiairaa no te haapiiraa.

“I te otiraa te putuputuraa ua paraparau mai te rahiraa ia ˈu, ua aroha mai, e ua faaanaanatae roa ia ˈu. I to ˈu faarueraa mai i te pae hopea i ta outou Piha no te Basileia, ua rave au e toru buka—te Bibilia, Te taata rahi roa ˈˈe i ora aˈenei, e E nehenehe oe e ora e a muri noa ˈtu i roto i te paradaiso i nia i te fenua nei. I taua po ra fatata i te hope ia ˈu i te taio i te buka ra E ora e a muri noa ˈtu, e ua haapii au i te hoê iˈoa apî no to ˈu Atua, oia hoi o Iehova. . . .

“Te hinaaro nei au e faaite ia outou paatoa e ua au roa vau i to outou farii maitai nehenehe i te hoê taata ê roa e te hinaaro iho â nei râ vau e faaite atu e . . . ua bapetizohia vau i te 9 no tiunu 1994, i te 70 raa o to ˈu matahiti.”

Mai te peu e te hinaaro nei outou e ite atoa i teie farii maitai mahanahana no ǒ mai i te feia e tavini ra i te Atua ma te oaoa, a papai i te amaa a te Taiete Watchtower, B.P. 518, Papeete, TAHITI aore ra i te hoê o te mau vahi nohoraa i faataahia i te api 5. E na ratou ïa e faaite atu ia outou i te hoê Piha no te Basileia i pihai iho noa i to outou faaearaa.