Te hoê reo mai roto mai i te maniania ore

A PAE ahuru matahiti i teie nei ua taparahi-pohe-hia te hoê mea taehae. I to te ao hutiraa i te pae hopea i te paruru haamaramarama no te hiˈo i te toparaa o te Toruraa o te Faatereraa Nazi, ua hau atu te ohipa riaria ta ratou i ite i te hoê moemoeâ ino no te taa i te auraa. E mea papu e ua araara noa to ratou mata ma te maniania ore e te riaria i te iteraa ˈtu i te mau toea mehameha o te hoê faanahonahoraa taparahi taata taehae.

I te omuaraa o teie matahiti, e mau tausani taata tei faatupu i te 50raa o te oroa o te matahiti o te Tiamâraa mai te mau aua tapearaa mai ma te hahaere na nia i taua mau vahi e vai ano noa ra. Ua aro ratou no te taa i te auraa mau o te uˈanaraa o te ohipa ino. A tae hoi e, fatata e 1 500 000 taata tei pohe i roto i te aua o te pohe i Auschwitz noa! Ua riro te reira ei taime maniania ore, te hoê taime no te feruri i nia i te huru taehae o te taata i nia i te taata. E ô mai iho â te mau uiraa peapea mau ia ite-anaˈe-hia te mau umu, te mau aua tapearaa, e te mau tiaa.

O te riaria ïa teie mahana; te riri e te inoino. Te faaite ra te Taparahiraahia te mau ati Iuda, o tei haapohe e rave rahi mirioni taata, i te ino taehae o te Faatereraa Nazi. Eaha râ te huru a tupu ai te reira? O vai tei faaite i to ˈna manaˈo? O vai tei ore i na reira?

No te rahiraa o te mau taata, te taime matamua ratou i ite ai i teie haapoheraa rahi, i te fatataraa ïa te Piti o te Tamaˈi Rahi i te hope. Teie ta te buka ra Fifty Years Ago—Revolt Amid the Darkness e faataa nei: “Ua hitimahuta roa te huiraatira taatoa, i te pae tooa o te râ iho â râ, i to ratou iteraa i te mau hohoˈa e te mau hohoˈa mau tei tavirihia i roto i te afata teata no nia i te mau vahi e te mau aua taparahiraa taata haamauhia e te mau Nunaa i tahoê i te mau matahiti 1944 e 1945.”

Tera râ, na mua ˈˈe atoa a hamanihia ˈi te mau aua o te pohe, ua faaroohia te hoê reo o te faaite ra i te ohipa atâta a te Faatereraa Nazi, na roto i te A ara mai na!, te vea ta outou e tapea ra i roto i to outou rima. Ua piihia oia na mua ˈˈe Te Tau Auro e i muri iho Tamahanahanaraa i te matahiti 1937. I te omuaraa o te matahiti 1929, ua faaara uˈana teie mau vea i te mau huru atâta o te Faatereraa Nazi, o tei tuea e te faaiteraa i nia i te api matamua, “Te hoê vea o te mau ohipa e tupu mau ra, o te tiaturiraa e o te itoito.”

“Nafea te hoê taata e nehenehe ai e mamû noa,” o ta te vea ra Tamahanahanaraa ïa i ani i te matahiti 1939, “no nia i te mau ohipa riaria a te hoê fenua, mai ia Helemani, i reira te tapearaahia e 40 000 taata hapa ore i te taime hoê; e 70 i rotopu ia ratou tei haapohehia i te po hoê i roto i te hoê fare auri; . . . i reira ua tupararihia te mau fare atoa, te mau piha e te mau fare maˈi no te mau ruhiruhia, te feia veve, e te mau taata hepohepo, e te mau fare haapaoraa i te mau otare?”

Nafea te hoê taata e nehenehe ai e faaea mamû noa? Noa ˈtu e aita te ao i te pae rahi i tâuˈa aore ra i haapao i te mau faaiteraa riaria no roto mai i te fenua Helemani e te mau fenua i haruhia mai e a ˈna, eita te mau Ite no Iehova e nehenehe e mamû noa. O ratou na mua tei ite i te ino riaria a te Faatereraa Nazi, e aita ratou e mǎtaˈu ra e faaite i te reira.

[Faaiteraa i te fatu o te hohoˈa i te api 15]

U.S. National Archives photo