Ua haafaufaa te orometua haapii i te reira

“I TE matahiti i mairi aˈenei i ta ˈu fare haapiiraa tuarua haapiiraa i te reo marite, ua haapii matou tau mahana te maoro no nia i te huru rau o te mau haapaoraa i te ao nei,” o ta te hoê taurearea ïa no Michigan, mau Hau Amui no Marite i papai. Ua afai te tamaroa i te buka ra L’humanité à la recherche de Dieu i te fare haapiiraa. Teie ta ˈna i faataa:

“Ua manaˈo iho â vau e e anaanatae ta ˈu orometua haapii i te buka no ˈna iho. Ua oaoa vau i to ˈu iteraa ia ˈna i te taioraa i te buka a rave noa ˈi te mau tamarii i te ohipa haapiiraa. A feruri na râ i to ˈu maere, na mua noa ˈˈe e hope ai te haapiiraa, ua parau ta ˈu orometua haapii i te feia haere haapiiraa ia vaiiho i te ohipa ta ratou e rave ra e ua taio o ˈna i te taatoaraa o te pene matamua i mua ia matou ma te reo puai. Ua faaue atoa o ˈna ia matou ia tapaopao i te tahi mau manaˈo.

“Tau mahana i muri iho, ua faaohipa faahou o ˈna i te buka i roto i te haapiiraa, ma te ani i te feia haere haapiiraa ia rave i te tahi atu â mau tapaopaoraa, ma te parau atu ia ratou e e nehenehe ratou e faaohipa i te buka ra L’humanité à la recherche de Dieu ei buka faahororaa. Ua faaohipahia te buka i te hora taatoa.”

Mai te peu e e hinaaro outou i te buka ra L’humanité à la recherche de Dieu aore ra i te hoê haapiiraa o te Bibilia tamoni ore i to outou fare, a papai i te amaa a te Taiete Watchtower, B.P. 518, Papeete, TAHITI aore ra i te hoê o te mau vahi nohoraa i faataahia i te api 5.