Te mau tamarii o tei moe ê—Eaha te rahi o teie ati?
‘Ua moe ta ˈu tamarii!’
Mea iti roa te mau tumu rahi ahoaho e vai ra no te rahiraa metua oia hoi te faahitiraa i teie mau parau. I te mea e eita e nehenehe e haapapuhia te rahiraa o te numera tamarii o tei mairi i te fare, e nehenehe râ tatou e ite i te rahi o teie ati na roto i te mau maimiraa i piahia i roto e rave rahi fenua.
I TE mau Hau amui no Marite, ua tapaohia e 500 000 e hau atu i te 1 000 000 tamarii, tei te huru o to ratou pǔpǔ, o tei moe ê i to ratou mau fare i te mau matahiti atoa. Te vai ra tei moe ê paha no te hoê taime poto noa aore ra tei moe roa. Te faaitehia ra e i Beretane fatata 100 000 tamarii tei moe i te matahiti hoê, te parau nei râ te tahi pae e mea rahi roa ˈˈe. Ua faahiti te U.R.S.S. tahito e mau hanere tausani tamarii o tei moe ê. I Afirika apatoa te parauhia ra e ua hau atu te numera i te 10 000. I Marite Latino e mau mirioni tamarii ïa o te faaruru ra i teie ati.
Te faataa ra te auvaha no te faatere hau haapao i te ohipa o te nunaa i te rahi o te fifi e vai ra i reira i to ˈna parauraa, mai tei tapaohia i roto i te L’Indipendente e: “E faarue ratou i te fare i te hoê mahana mai te mau mahana atoa. E haere ratou i te fare haapiiraa aore te hauti ra, eita râ ratou e hoˈi faahou mai i te fare. Ua moe ê roa ratou, e au ra e ua mou. E imi te mau melo o te utuafare ia ratou ma te taiâ, e e mau tapao tano ore, ravai ore noa hoi te itehia mai, te mau ite varavara—e te papu ore.
Te faaite ra te hoê maimiraa apî i faatupuhia i te mau Hau amui no Marite no nia i te rahi o teie fifi e te upoo parau “te mau tamarii o tei moe ê” i te mea mau, te vai ra e rave rahi huru pǔpǔ. Te hoê pǔpǔ o te mau tamarii o tei eiâhia e te feia ěê. Te tahi atu pae e mau tamarii e na te metua iho i haru, ia mǎrô te mau metua e na vai e haapao i te tamarii ia au i te ture. E te vai ra te mau tamarii o tei faaruehia, te mau tamarii o tei ore e hinaarohia ra e to ratou mau metua aore ra feia haapao. Te vai atoa ra te mau tamarii o tei horo ê, e pǔpǔ rahi atoa hoi. E te vai ra tei ihu haere aore ra ua faataa-ê-hia i to ratou utuafare maa hora noa aore ra e maa mahana noa te maoro—te rahiraa o ratou e mau tamarii ïa i ore i hoˈi i te fare i te hora i parauhia ˈtu, aore ra e mau tamarii o tei ore i taa-maitai-hia te parau e te mau metua. E mea iti roa teie mau huru tamarii i te moe roa.
Teie râ, eaha te tupu mai i nia i te mau tamarii o tei moe ê no te mau pǔpǔ ati mau? No te aha teie ati e tupu ai? E tuatapapa teie numera o te A ara mai na! i te mau tuhaa e rave rau o teie ati ma te pahono i te uiraa, afea teie ati e hope ai?