“No te aha aita vau e faatupu ra i te oroa Noela”

TE PARAU ra te tahi mau taata e te erehia ra te mau tamarii a te mau Ite no Iehova no te mea aita ratou e faatupu ra i te oroa Noela. Teie râ, a hiˈo na i te papai “No te aha aita vau e faatupu ra i te oroa Noela” ta te hoê Ite tamahine e 11 matahiti no Kalifonia, i te fenua Marite, i papai no te hoê hopoia titauhia e te piha haapiiraa:

“No e rave rahi mau taata, e auraa rahi to te oroa Noela—mau ô, te utuafare, mau ô, te maa, mau ô, te horoaraa, mau ô, te here, mau ô, te Papa Noela, mau ô, e e rave rau atu â. Area râ, e varavara roa te mau taata i teie nei i te feruri i te auraa o te oroa Noela aore ra no te aha ratou e faatupu ai i te reira. Mai te peu e e na reira ratou, te manaˈo pinepine nei ratou e te oroa Noela o te oroa mahana fanauraa o Iesu Mesia ïa, o te hoê taime amuiraa no te utuafare e, papu maitai, no te mau ô e rave rahi. Te aroha ra te rahiraa o te mau taata i te mau Ite no Iehova no te mea te manaˈo nei ratou e te faaere nei ratou i ta ratou mau tamarii. Tera râ, te ere mau ra anei tatou i te hoê mea? E hiˈopoa anaˈe tatou e no te aha aita te mau Ite no Iehova e faatupu ra i taua oroa ra.

“Ei Ite no Iehova, aita vau e faatupu ra i te oroa Noela no e rave rahi mau tumu. A tahi, e ere te reira i te oroa mahana fanauraa o Iesu. Te parau nei te Bibilia e ua haere te mau tiai mamoe i rapaeau mai i roto i te mau faaapu e ta ratou mau mamoe. E mea toetoe roa i Ierusalema i te tau toetoe e e mea pinepine te hiona i te topa. Aita ïa te mau tiai mamoe i nehenehe e faaea i rapaeau i taua mau avaˈe ra. . . . Te vai atu â nei râ.

“Noa ˈtu e aita te oroa Noela e tuea ra i te oroa mahana fanauraa o Iesu, aita ˈtoa ˈˈenei te reira i haapao-aˈenei-hia e te mau kerisetiano o te senekele matamua. Te niuhia ra to ˈna tumu i nia i te oroa Saturnales no Roma tahito tei haamata i te 17 no titema e tei faaoti i te 25 no titema, te ‘oroa mahana fanauraa o te aito mahana.’ I te senekele maha, ua faaoti ihora te tahi mau taata toroa a te hau Roma i te faatupu i te oroa mahana fanauraa o Iesu i te 25 no titema, peneiaˈe no te haamoˈa i ta ratou mau oroa etene.

“Eita e maerehia e ua opanihia te oroa Noela i roto e rave rahi mau fenua. I teie nei mahana, te pee nei te tahi mau taata (mai te mau Ite no Iehova) i te hiˈoraa o te mau kerisetiano o te senekele matamua. . . .

“Ua faatupu vau i te oroa Noela i mutaa ihora—tae noa ˈtu i te maharaa o to ˈu matahiti. . . . No te parau o te faaereraa, papu maitai aita roa ˈtu te mau Ite no Iehova i erehia. E noaa ia matou te mau ô i te roaraa o te matahiti. Te mau mea noa e erehia ra matou, o taua mau oroa etene ra ïa e ta ratou mau faahanahanaraa etene.”

Noa ˈtu e ua papai te orometua haapii i nia i te api parau e, “Eita te mau taata atoa e hinaaro i te mau ô,” ua papai atoa oia e, “Ohipa maitai roa,” e ua horoa oia ia ˈna i te hoê “A.”