Te tapaparaa i te ruperuperaa i te pae materia

NA TE TAATA PAPAI VEA A ARA MAI NA! I TAÏWAN

‘EITA te moni e nehenehe e hoo mai i te oaoa!’ Noa ˈtu e te farii nei te rahiraa o te mau taata i teie parau, e rave rahi râ o te tapapa noa ra i te mau faufaa materia ei ravea no te ite i te hoê oraraa oaoa aˈe. E no te aha e ore ai? Inaha, e au ra e o te faufaa e te ruperuperaa i te pae materia te ravea o te mau fifi e rave rau o te huitaata nei.

A feruri na i te hoê ao taa ê ahiri e e fanaˈo te mau tane, mau vahine, e te mau tamarii i te hoê oraraa ruperupe i te pae materia! E ore roa te au ore e te mauiui o te mau mirioni taata e ora ra i roto i te mau oire e te mau aroâ veve. E ore atoa te fifi o te ereraa i te nohoraa o te haapeapea nei i te mau nunaa ona atoa e te veve i teie mahana.

E eaha ïa no te oraora-maitai-raa o te tino, faufaa roa no te oaoa? Noa ˈtu te haere oioi nei te ite aivanaa i te pae rapaauraa i mua, te rahi noa ˈtura te mau taata eita e nehenehe e aufau i te mau fare utuuturaa. I te tahi aˈe pae, te farerei noa ra tau mirioni taata i te poia e te navai-ore-raa i te maa i te mau mahana atoa. Ahiri ua mana te ruperuperaa na te ao nei, mea oraora maitai aˈe ïa te mau taata atoa, e oraraa oaoa aˈe to ratou—e ere anei?

E haamaitai-atoa-hia te fenua nei. Nafea? Ua ino roa te mau mea e haaati nei i te fenua i te mau taoˈa viivii taero, faatupuhia i roto i te tahi tuhaa ia tutuihia te mau mori. No te mea râ e mea moni roa, aita i imihia te ravea aravihi apî titauhia no te faaohipa i te mau huru ito mâ aˈe. Ua faahapa-rahi-atoa-hia te mau tumu i te pae faanavairaa faufaa no te haamouraa i te mau ururaau, te tahi atu haamǎtaˈuraa rahi i te pae no te natura.

I te mea hoi e e nehenehe te ruperuperaa i te pae materia e faatitiaifaro e rave rahi o to tatou mau fifi e e tamǎrû e rave rahi mauiui, e ere mea maere ia faatuati te mau taata i te faufaa i te oaoa. Ei hiˈoraa, e aroha te feia no te pae Tooa o te râ i te tahi atu taata, mai tei matauhia, e “Ia oaoa na oe i te matahiti apî!” i te mahana matamua no te matahiti apî, area te Tinito, e parau oia e, i te roaraa o te matahiti apî marama, ei peu tumu e “Kung hsi fa tsai” i te tahi atu taata, ma te tiaturi e e ‘monihia’ ratou! E, e mea papu e te ora nei tatou i roto i te hoê ao e te faariro nei te mau taata i te tapaparaa i te ruperuperaa i te pae materia ei mea faufau roa, aore ra faufaa roa ˈˈe. Na te faito o te faufaa materia e faaoti i te manuïaraa aore ra te ereraa.

Noa ˈtu e e ere mea ino te titauraa e te fanaˈoraa i te mau ohipa materia, e nehenehe anei te reira e horoa mai i te oaoa mau? Eaha te faufaaraa te tia ia horoa ˈtu no te reira? O te ruperuperaa i te pae materia anei te ravea no te hoê ao maitai aˈe?