No te aha eita te arapoa o te mau manu ra pivert e fati?
UA FAAROO aˈena anei outou i te hoê pivert e faaapoo ra i te hoê tumu raau? I te mea e fatata e 200 huru pueraa pivert, ua tapao paha oe ta ˈna tupairaa tamau e au mai te hoê matini faaapoo. I to ˈu iteraa hoê, to ˈna utu o te faaapoo ra i te hoê tumu raau, ua aniani atura vau e, ‘No te aha eita to ˈna arapoa e fati aore ra e faaino i to ˈna roro?’ Mai te peu o tatou te mau taata e rave i teie huru ohipa puai, e titau tatou i te manaˈo o te hoê taote tauromi aore ra o te hoê taote aravihi o te roro! No reira, eaha te parau huna?
A hiˈopoa na ei hiˈoraa i te manu ra pivert arapoa uteute, tei itehia i te ropu o te hitia o te râ i te Hau amui. Te parau ra te Book of North American Birds e: “E to ˈna teiaha, to ˈna utu mai te paoti ra te huru, e tatara mai oia i te mau manumanu mai raro aˈe mai i te iri raau, e faaapoo oia ia tapae roa i te mau coléoptère faaapoo raau, e tarai oia i te mau amaa o te raau a hamani noa ˈi i te hoê ofaaraa.” Nafea oia e paruru ai ia ˈna iho i te reporepo o te raau? “Ua tapoˈihia to ˈna mau ihu i te hoê tapoˈi nainai o te mau huruhuru rairai.”
E eaha ïa no nia i te upoo ia faitohia? “No te ape i te faaino i te roro . . . , te ohipa nei te hoê utu paari, te hoê upoo meumeu, e te hoê turua i rotopu i te iri teiaha i rapae e te roro iho mai te mau taoˈa paruru taa ê.”
Te faaapoo ra te tahi atu pivert, te manu inu tapau arapoa rearea, i te mau anairaa apoo i roto i te iri raau, i reira oia e inu ai i te mau tapau. Taa ê i te pivert arapoa uteute, e arero roa, aano hoi to ˈna e te hoê patia no te mau manumanu, e mea poto te arero o te pivert inu tapau e te mau huruhuru no te tauturu i te miti i te tapau.
Te faaite ra teie huru hohoˈa nehenehe ma te papu e te vai ra te hoê Poiete, te Atua ra o Iehova. Ma te haehaa, e tia ia tatou ia faaite atoa i te mau parau a Ioba: “Ua ite au e, e puaihope to oe, e e ore ta oe i opua ra e tia ia faaore.” E ua papai o Davida e: “E mea maerehia ta oe mau ohipa, e Iehova, eita hoi e moe ia ˈu.”—Ioba 42:2; Salamo 139:14.
[Faaiteraa i te fatu o te hohoˈa i te api 31]
Leonard Lee Rue, 111/ H. Armstrong Roberts
Aui: H. Armstrong Roberts