Te tauturu i te taime au
Ua papai te hoê vahine i te Amaa a te mau Ite no Iehova i Auteraria no te haamauruuru ia ratou no te vea A ara mai na! no nia i te tumu parau “E taime to te faaora.” Te faataa ra oia e:
“I te 12raa o to ˈu matahiti, ua hamani-ino-hia vau i te pae taatiraa e te hoa rahi o to ˈu mama. Ua taa ia ˈu e ohipa ino te ravehia ra. Teie râ, i taua taime ra, ua manaˈo vau e ohipa ino roa ta ˈu i rave e mea na reira te Atua i te faautuaraa ia ˈu. E horuhoru roa to ˈu mafatu ia manaˈo e haere i ô teie taata, ma te ite papu i te ohipa e tupu mai. E tia râ ia ˈu ia haere, no te mea ua faatia to ˈu metua vahine ia rave o ˈna i ta ˈna mau peu hairiiri i nia ia ˈu no te moni. Mea nafea to ˈu nei metua vahine e nehenehe e haapae ia ˈu mai te reira te huru. Ua haapii au i te haamamu i to ˈu mau manaˈo hohonu e ua inoino vau i te oraraa e i te Atua atoa ïa.
“I te matahiti 1992 anaˈe iho to ˈu paraparauraa ˈtu i te hoê vahine Ite no Iehova. Ua haapii vau e rave rahi mau mea. Te mea faufaa roa oia hoi te here ra te Atua ra o Iehova ia tatou paatoa e aita hoi o ˈna e faautua ra ia ˈu.
“Teie ïa rata, no te haamauruururaa ia outou no ta outou mau tumu parau i roto i te A ara mai na! no nia i ‘Te mau pepe o te hamani-ino-raa i te tamarii’ o te 8 no Atopa 1991.
“Ua pûpû vau i to ˈu oraraa no Iehova e te opua ra vau e bapetizo ia ˈu i te matahiti i mua.”
I roto i te area e piti avaˈe ua hau atu i te tausani rata haamauruururaa tei tae mai i te A ara mai na! no teie numera anaˈe iho ïa. Hau atu â i te faaite-noa-raa i te feia taio e mea nafea ia faaruru i te mau fifi o teie nei tau, e faatiaturi te A ara mai na! i te mau mea ta te Poiete i faaineine na roto i te hoo taraehara a Iesu, oia hoi te hau e te ino ore i roto i te hoê ao apî o tei faaora i te mau mauiui atoa. Ahiri e e hinaaro oe i te tahi atu â haamaramaramaraa no nia i teie ao apî, aore ra i te hoê haapiiraa Bibilia tamoni ore i te fare, a papai mai i te Amaa a te Taiete Watchtower, B.P. 518, Papeete, TAHITI, aore ra i te hoê o te mau vahi nohoraa i faataahia i te api 5.
[Hohoˈa i te api 32]
Awake!
Awake!
Awake!
Children UNDER STRESS How Can They Be Helped?