‘Aitâ vau i farerei aˈenei i te hoê Ite no Iehova ta ˈu i ore i au’
UA FAREREI tino roa ˈtu anei outou i te hoê Ite no Iehova? Ua rave aˈenei anei outou i te taime no te tuatapapa eaha mau na ta ratou e tiaturi ra? Eita e ore e ua farerei poto aˈenei outou i te hoê Ite i roto paha i te mau aroâ aore ra i to outou iho uputa. E pinepine râ hoi i te ore e taimehia no te aparau roa ˈtu e o ratou.
Teie ta George Plagenz, te hoê taata marite papai vea no nia i te mau haapaoraa, i papai no nia i ta ˈna i ite i te mau Ite: “Ei haapoto-noa-raa i te parau a [te taata faaarearea marite] ra o Will Rogers, tei parau e aita o ˈna i farerei aˈenei i te hoê taata ta ˈna i ore e au, aitâ atoa vau i farerei aˈenei i te hoê Ite no Iehova ta ˈu i ore e au.”
Te faahiti ra hoi o Plagenz i muri iho i te taata papai buka Irelane ra o Alan Bestic: “E mau taata hau hoi, te feruriraa maitai e te oaoa, te mau melo o teie taatiraa e faaino-hape-hia nei. I ta ratou tairururaa rahi i tupu i Lonedona [Beretane], ua fariihia vau ma te hamani maitai mau, ma te mǎrû, te maitai e te auhoa haavare ore na te mau Ite atoa ta ˈu i farerei.”
Te parau ra o Plagenz e ua faatupu taua mau ravea haavî matamua ra, e faaohipahia na e vetahi mau Ite i tera uputa e tera uputa, i te au ore rahi. “Ua taui râ hoi te rahiraa.” I muri iho, te faahiti ra oia i te parau a te hoê tia o te mau Ite: “E rave i roto i te mau Ite no teie mahana tei tuô i te hoê taime, i mua i te mata o te Ite e poro nei.” No te aha hoi e itehia ˈi i teie mahana i te tahi pahonoraa farii maitai? “Te haamata ra te taata i te ite i teie mahana e . . . aita e ravea ta te taata no te arai i te mau fifi rarahi e faaruruhia ra e te ao nei.”
Te tiaturi nei te mau Ite no Iehova e te pahonoraa papu maitai i te mau fifi o te huitaata nei, ua faataahia ïa i roto i te pure a Iesu e na ô ra e: “To matou Metua i te ao ra, ia raa to oe iˈoa. Ia tae i to oe ra hau [basileia]. Ia haapaohia to oe hinaaro i te fenua nei, mai tei te ao atoa na.” (Mataio 6:9, 10) Te faatereraa e haapaohia e te Basileia o te Atua, e o te fariihia hoi e te hoê fetii taata auraro e te haehaa, o te ravea otahi roa ïa no te arai i te haavîraa uˈana a to teie nei ao ino i roto i te ahoaho. Mai te peu e hinaaro outou e ite hau atu â no nia i te Bibilia e ta ˈna mau haapiiraa, a farerei atu i te hoê Ite no Iehova i te Piha o te Basileia fatata roa ia outou, aore ra a papai i te vahi fatata roa ˈˈe ia outou, i faaitehia i te api 5.