Haapopouraa no te A ara mai na!

E RAVE RAHI hanere rata o tei noaahia mai ei haapopouraa no te Ara mai na! te hoê uiraa no te 22 no Atete 1992, o tei tatara i te tumu parau “Nafea ia arai i te maˈi—o te tupuraa tamau o te rohirohi.” Ua papai te hoê taote rapaau maˈi no Tennessee, Hau Amui no Marite, i teie tau veavea i mairi:

“I te 22 e te 23 no Atete ua horoa vau i te mau faaiteiteraa i na pǔpǔ taa ê e piti i te pae apatoa no California. Ta ˈu tumu parau: te tupuraa tamau o te rohirohi.

“Ua horoa mai te hoê o te mau taata o tei apiti atu i te aparauraa i Pasadena i te hoê papai o te uiraa no Ara mai na! 22 no Atete 1992 e ua taio e ua taio faahou vau i te taatoaraa o te aamu. Te papai nei au no te haapopou atu ia outou no ta outou mau haamaramaramaraa no teie nei maˈi maere e te taa ore. Ua riro mau oia ei tumu parau hau aˈe i te faahiahia no te mau tumu parau o ta ˈu i taio—e ua taio vau hau atu i te ahuru ma piti.”

I te avaˈe Atopa, ua faataa te hoê o te mau Ite no Iehova no Illinois, Hau amui no Marite, o te faruru nei i teie maˈi: “Oia mau, i teie poipoi, ua vaiiho vau 319 vea o te faataa nei i te mau tumu parau no te maˈi o te tupuraa tamau o te rohirohi. Ua vaiiho atu vau i te mau taata hoo raau, i te mau taata rave ohipa i te fare toa no te mau maa haapararai, i te mau taata o te ohipa nei i te mau fare moni no te toto, te mau tuati vahine, e i te mau taata haapao buka.

“Ua rave te mau pǔpǔ i te pae rapaauraa i te mau papai no te mau taote. Te hiˈopoa nei te mau taata rave ohipa mai te peu e te vai mau ra te mau papai a te mau taote. Ua ani mai vetahi i ta ˈu numera niuniu i te taime e hinaaro ai ratou i te tahi atu mau vea.”

Ua riro te mau Ite no Iehova, o tei haamau i te hoê faanahonahoraa na te mau fenua atoa e hau atu i te maha mirioni taata haapii i te Bibilia, ei mau taata nenei i te Ara mai na! Aita te vea e faaite noa i te mau taata taio e mea nafea ia faaruru i te mau fifi i teie nei mahana. Te faatupu atoa nei râ i te tiaturiraa i roto i te parau tǎpǔ a te Poiete i te hoê ao hau e te ino ore. Te tutava nei te mau Ite no Iehova i te tauturu i te mau taata ia ite hau atu â i te mau tumu a te Atua.

Mai te peu e e hinaaro outou i te tahi mau haamaramaramaraa hau atu aore ra i te hoê haapiiraa bibilia tamoni ore i to outou fare, a papai mai i te amaa a te Taiete Watchtower, B.P. 518, Papeete, TAHITI, aore ra i te hoê o te mau vahi nohoraa i faataahia i te api 5.

[Hohoˈa i te api 32]

A ara mai na!

Nafea ia arai i te maˈi o te tupuraa tamau o te rohirohi