“E manaˈo apî to te mau taote no nia i te pamûraa toto”

“E maitaihia te mau taata atoa i te porotarama faanahohia no te mau Ite no Iehova”

I raro aˈe i teie mau upoo parau i roto i te vea Rocky Mountain News, teie ta te taata papai a te toroa rapaauraa o Kris Newcomer e faataa ra: “Hau atu i te 100 taote no Denver o tei tahoê no te faatano ia ratou i te ekalesia a te mau Ite no Iehova, o te faariro nei i te toto ei taoˈa moˈa o te ore e tia ia horoahia aore ra ia pamûhia i roto i te hoê tâpûraa e te tahi atu mau ravea i te pae rapaauraa.” Ua parau te taote Greg Van Stiegmann no te Porotarama tâpûraa e te rapaauraa ma te ore e faaohipa i te toto i te Fare maˈi tuatoru no Denver, i Colorado, i te mau Hau amui no Marite, e: “Te mea i tupu oia hoi ua faanaho matou i te mau melo no te fare maˈi tuatoru o tei farii i te hiˈopoa faahou i ta ratou huru raveraa.”

Ua parau o Van Stiegmann e noa ˈtu e e fanaˈo te mau Ite no Iehova i teie porotarama, e ere o ratou anaˈe o te patoi nei i te toto. Te rahi noa ˈtura te taata e mea au aˈe ahiri e aita ratou i pamûhia i te toto. “Te imi nei matou i te mau ravea atoa no te ore e pamû i te taata i te toto. . . . Mea rahi te mau haamaramaramaraa maitatai roa no roto mai i te mau tuatapaparaa e rave rahi, o te faaite ra mea maitai aˈe te faaotiraa e noaa mai i roto i te tâpûraa matamua o te mariri ai taata, mai te peu e aita outou i pamûhia aˈenei i te toto na mua ˈˈe aore ra i muri aˈe i to outou tâpûraahia,” o ta Van Stiegmann ïa e parau ra.

Te na ô râ te tumu parau e: “E parau apî oaoa te tauiraa o te hiˈoraa o te mau taote no te mau 10 000 Ite no Iehova no Colorado. Teie te hoê irava no roto mai i te buka Genese a te Faufaa Tahito: ‘te iˈo e te ora i roto ra, oia hoi te toto i roto ra, eiaha ïa e amu,’ oia hoi te auraa no te mau Ite, eiaha roa e faaô i te toto i roto i te tino noa ˈtu eaha te ravea, oia atoa hoi te pamûraa toto.”