Pahonoraa i te hoê pure
TE PARAU ra te hoê vahine no Christchurch, Niu Zelani, e ua riro mau â te mau tumu parau o te A ara mai na! no nia i te “Te hamani-ino-raa i te tamarii i te pae taatiraa: nafea ia rapaau i te mau pepe?” ei pahonoraa i ta ˈna pure. Te faataa ra oia e:
‘I te avaˈe atete 1991, ua riro te hoê pǔpǔ o matou nei ei ite no te tahi hoa vahine to matou, o tei faatia mai i to ˈna mauiui i te haamanaˈoraa i te hamani-ino-raa i te pae taatiraa. E ua ahoaho roa vau e toru mahana te maoro, ua pure râ hoi matou ia Iehova ma te tuutuu ore ia itea mai ia matou i te hoê vea e tuatapapa i taua tumu parau nei. Te hinaaro ra hoi matou i te tahi tauturu. E pae hebedoma noa to matou tiairaa. Mauruuru na nia i te iˈoa o te mau taata atoa e roohia nei i teie fifi, no te mau tumu parau faahiahia mau e te putapû atoa hoi o te A ara mai na! o te 8 no atopa 1991.’
Te rata i nia nei o te hoê noa ïa o te mau hanere rahiraa rata haamauruururaa i te A ara mai na! no nia i te mau peu iino i ravehia i nia i te mau tamarii. I roto i te tahi atu rata i tae mai i te omuaraa o teie nei matahiti, te parau ra te vahine i papai mai e e tia ia ˈna ia na nia iho noa i te taio i te mau tumu parau, no te mea eita o ˈna e faaea i te taˈi. Teie ta ˈna e parau ra:
“I teie nei â, e rahi atu â to ˈu mafatu i te putapû ia tamata vau i te faaite i to ˈu mauruuru no te taime e te itoito e horoahia no te tauturu i te mau taata mai ia matou nei e te vai ra teie mau huru manaˈo faahaehaa e te faahapa i roto ia ratou e tei hamani-ino-hia hoi i te pae no te taatiraa e tei haruhia na te hoê taata e faaite mai i to ‘here’ ia matou i to matou vai-tamarii-rii-roa-raa ra e te paruparu hoi. Aita vau i manaˈo e mea rahi te taata i farerei i teie huru tupuraa i farerei-atoa-hia e au nei. Te faaruru nei â vau i te hoê taime fifi mau e taua mau manaˈo nei, ua riro râ te mau api 10 e te 11 ei tauturu papu ia ˈu. Mea rahi roa te mau parau ta ˈu e hinaaro e faaite atu, e navai noa râ ia parau e ua tae ta ˈu mau pure ia Iehova ra no outou, no to outou tiaturiraa e e horoa mai Iehova i te itoito no te papai i te hoê tumu parau fifi mau ia tatara.”
Te na ô râ te tahi taata e: “O te hoê teie tumu parau faufaa roa ˈˈe i neneihia e outou no nia i te mau taairaa i rotopu i te mau taata. Ua tatara maitai mai te reira i te huru o teie peu diabolo e te huru o te feia i rave i taua ohipa ra, ei haapapuraa mai i te mau taata i ore i roohia i teie ati no nia i to ˈna faahopearaa iino mau; ua tamahanahanahia e ua haapii-atoa-hia hoi te feia i roohia i taua ati nei. Ua matara maitai te uputa o te parau no te here e te faaoromai no roto mai i te nunaa o te Atua ra.”
E faanahonahoraa rahi te mau Ite no Iehova tei hau atu i te maha milioni feia haapii i te Bibilia tei pûpû ia ratou no te tauturu i te taata e to ratou mau fifi e no te tauturu atoa ia ratou ia ite hau atu â no nia i te mau opuaraa a te Atua. Mai te peu e e hinaaro outou i te tahi mau haamaramaramaraa hau atu aore ra i te hoê haapiiraa no nia i te Bibilia i to outou iho fare, a papai mai i te amaa a te Taiete Watchtower, B.P. 518, Papeete, TAHITI, aore ra i te hoê o te mau vahi nohoraa i faataahia i te api 5.