‘Ua matara ïa ia ˈna te miterio’

Ua faarirohia te Toru Tahi ei miterio, ua parau ra te hoê taata taio no Auteraria no nia i te vea iti E tia anei ia tiaturi i te Toru Tahi? “ua matara ïa ia ˈna te miterio ma te tuu i te reira i te ohipa-ore-raa hopea.”

I New York ua parau te hoê orometua vahine tahito no te Ekalesia katolita roma no te taatiraa no nia i te porotarama haapiiraa kerisetiano e ahiri i vai na teie vea iti i te mau matahiti i mahemo aˈenei. A 15 matahiti i teie nei, ta ˈna i parau, ua tia oia i mua i te mau pǔpǔ tamarii haapii e 30 e tae atu i te 35 te rahiraa, e 7 e tae atu i te 12 matahiti te paari, “ma te papai i te hohoˈa o te rauere patoa no te haapii ia ratou te parau no te Toru Tahi—e toru uaa no na Taata taa ê e toru, na Atua taitahi, e hoê â hiata, e hoê ïa Atua! Teie hoi te faaueraa a te mau paretenia e te mau perebitero,” ta ˈna i papai.

“Ua fifihia to ˈu manaˈo i reira,” te na ô faahou ra oia. “I teie nei ua noaa ia ˈu te pahonoraa mau e te mau haapapuraa no roto mai i te Parau iho a te Atua. Auê ïa te rahi o to ˈu hinaaro e haaputuputu i te feia apî ta ˈu i haapii atu no te faaite ia ratou te parau mau no nia i teie mau mea!”

E rave rahi tei au roa i teie vea iti haapiiraa maramarama roa no nia i te Toru Tahi, tei riro noa ei haapiiraa tumu o te rahiraa o te mau ekalesia o te amuiraa faaroo kerisetiano. I rotopu i te mau faahitiraa parau e rave rahi te vai ra to Te Buka parau paari apî beretane, e tapao ra e: “Aita e itehia te parau Toru Tahi i roto i te Faufaa Apî. Aita i faahiti-papu-hia te haapiiraa ta te reira e faaite ra i roto.”

Mai te peu e te hinaaro ra outou e ite hau atu â aore ra ia haere mai te hoê taata no te aratai i te hoê haapiiraa bibilia tamoni ore i to outou fare, a papai atu ïa i te amaa a te Taiete Watchtower, B.P. 518, Papeete, TAHITI, aore ra i te hoê o te mau vahi nohoraa i faataahia i te api 5.