Te faataa ra te mau karatino i te tumu te mau katolika e faarue ai i te ekalesia

“UA RIRO te faraa mai e te parareraa o te mau haapaoraa ěê aore ra te mau faaroo apî ei huru tupuraa rahi i roto i te aamu o te haapaoraa i to tatou nei tau. Mea itoito roa ratou,” o ta te karatino Francis Arinze no Nigéria i faaite i te hoê putuputuraa taa ê a te mau upoo faatere katolika i tupu i te Vaticana i te avaˈe eperera 1991. Ua faahitihia te reira i roto i te neneiraa tahebedoma beretane a te vea a te Vaticana L’Osservatore Romano. Ua haapapu roa ˈtu â te karatino Ernesto Corripio Ahumada, arii epikopo no te oire no Mexico, i ta ˈna mau parau. Ua faaite oia no nia i te parareraa o te mau faaroo apî e: “Te mau pǔpǔ faaroo parauhia kerisetiano parare roa ˈˈe, o te mau Ite no Iehova ïa e te mau Momoni.” Ua tapao te karatino Angel Suquía Goicoechea, arii epikopo no Madrid, i Paniora, i te mau Ite no Iehova i rotopu i te feia o tei “haamauhia i roto e rave rahi mau fenua.”a

No te aha teie mau pǔpǔ e manuïa ˈi i roto i te mau fenua e te mau vahi mea rahi roa te katolika? Ua faataa vetahi mau karatino i te mau tumu huru rau. Ua faaite te karatino Ricardo J. Vidal, arii epikopo no Cebu, i Philipino, e: “Te ravea manuïa roa ˈˈe no te na reira, o te patoiraa papu i te mau haapiiraa e te mau peu katolika, i te faahanahanaraa iho â râ ia Maria, te faaohiparaa i te mau tii, te haamoriraa i te mau peata, te faˈiraa hara, te ture no nia i te faaea-taa-noa-raa te mau perepitero, e te vai atu â.”

E manaˈo anaanatae roa te reira ia itehia e aita te mau kerisetiano o te senekele matamua i haamau i te hoê noa ˈˈe o taua mau peu nei.b Ua tuea te parau a te karatino i te faaiteraa a te tahi atu upoo faatere katolika, te karatino Newman, o tei papai i te matahiti 1878 ra e: “No roto mai te faaohiparaa i te mau hiero, o tei pûpûhia i te mau peata taa ê . . . , te mau taoˈa pûpû haamaitaihia . . . , te pape moˈa . . . , te mau hohoˈa e hamanihia a muri aˈe . . . , i te mau peu etene, e ua haamoˈahia na roto i to ratou fariiraahia i roto i te Ekalesia.”

Eaha te tahi atu mau tumu ta te mau karatino i horoa no nia i te paruparu o ta ratou nǎnǎ? Hoê tumu, ia au i te karatino Vidal, “o te varavara ïa o te mau perepitero o te nehenehe e haapao, ma te faatano i te taata tataitahi, i te mau hinaaro o te feia faaroo katolika. Eita ïa e maerehia i te mea e e rave rahi o ta tatou mau mataeinaa epikopo o tei riro ei mau aua matara noa i mua i te ohipa faariroraa i te taata ei pǐpǐ e ravehia nei e te mau pǔpǔ faaroo.” Eaha râ te tumu o teie ereraa i te mau perepitero? Te hoê tumu rahi, o te titauraa aore e tuea ra e te mau Papai e faahepo ra i te mau perepitero ia faaea taa noa, i roto i te ekalesia latino mai te senekele 12. Te na ô atoa ra te hoê tatararaa katolika (V.C.J.S.) i roto i te Timoteo 1, 4, irava 1 e te 3 e: “Te parau papu maitai râ te Varua-Maitai e, ia tae i te mau tau hopea ra, e faarue ai tahi pae i te faaroo mau . . . I te faaoreraa i te faaipoiporaa.”—A faaau e te Korinetia 1, 9:5; Timoteo 1, 3:1, 2.

Eaha te pahonoraa i te fifi o te mau katolika e faarue nei i te ekalesia ta te karatino Vidal i horoa ˈtu i to ˈna mau hoa ekalesiatiko? “Te titauraa e taio e e tuatapapa, e pure e e ora ia au i te Parau papaihia a te Atua.” E o te reira mau ta te mau Ite no Iehova e faaitoito nei i te mau taata aau mehara atoa ia rave, noa ˈtu eaha to ratou tiaraa i te pae totiale aore ra i te pae faaroo. No reira ratou e titau ai e poro i “te evanelia o te basileia nei e ati noa ˈˈe teie nei ao, ia ite te mau fenua atoa” hou te Atua e haamou ai i teie ao e faaterehia ra e Satani. Mai te peu e te hinaaro ra outou e ‘taio e e tuatapapa i te Parau papaihia a te Atua,’ a ani atu ïa i te mau Ite no Iehova i ta ratou Piha no te Basileia o to outou vahi.—Mataio 24:14, Ioane 1, 5:19.

[Nota i raro i te api]