Te farii maitai o te feia no Filelane

UA PAARI roa te roto, e ua tapoˈihia i te pape toetoe paari e 41 tenetimetera te meumeu. Ua topa roa te anuvera i raro i te -15° C, e faito matauhia hoi i Filelane nei i te avaˈe febuare. E teie o Martti, te taata i farii mai ia matou, te ǒ ra i te apoo i roto i te pape toetoe paari. A tahi ra oia e faaite ai i te farii maitai o te feia no Filelane i te hoê ratere no te mau motu Antilles mai.

Ia ite mai te feia no te vahi haumǎrû no Puerto Rico ia ˈu, e manaˈo ratou e e ua inohia to ˈu upoo. Tera râ, no te feia no Filelane, e peu tahito roa te hopuraa i roto i te pape toetoe roa e te rahi noa ˈtura te mau taata e rave nei i teie peu. Na roto i te reo filelane, te vai ra te hoê parau taa ê, avanto, no te hoê apoo e matara noa i reira te taata e hopu ai i to ˈna tino taatoa no te hoê taime poto.

Tau tetoni noa te maoro teie “tapao toetoe roa o te farii maitai” e na mua ˈtu e i muri iho, e haere atu ïa oe i roto i te hoê vahi faataheraa hou fatata e 85° C te veavea. Ua au roa vau i teie peu e ua tapiti faahou, e ua oaoa roa to ˈu mau hoa no Filelane!

No vetahi pae, e peu faaanaanataeraa noa ïa teie. Area vetahi ra, te manaˈo nei ratou e e haamaitai te reira i to ratou oraora-maitai-raa, e arai i te tahi mau maˈi, e faaiti i te hepoheporaa, e e faarahi atoa i te puai no te aro i te rohirohi. Te ravehia nei te mau maimiraa no nia i teie mau parau e te tahi atu mau tumu i taaihia i te vahi faataheraa hou no Filelane e te mau hopuraa pape toetoe.—Na te hoê taata taio.