Api 2

Ua ineine atoa te aiû iti i roto i te opu i te aro

Tau avae na mua ˈˈe i to ˈna fanauraa, e haamata te aiû iti i te faaineine ia ˈna no te aroraa. E hamani oia i te mau mauhaa o te ravea parururaa o to ˈna tino. Ia fanauhia oia, ua ineine oia no te paruru ia ˈna, no te itea mai e no te vavahi i te mau taoˈa ěê i roto i to ˈna tino. Te vai atoa ra te mau taoˈa paruru i te tino a to ˈna metua vahine i roto i to ˈna toto, e mea rahi aˈe to ratou puai ia faaauhia i to te metua vahine. Te tiai noa ra te mau phagocytes [ai taoˈa tahi ora] i roto i te mau vaehaa o to ˈna tino no te amu i te mau taoˈa enemi atoa. Te vai ineine noa ra teie mau paruru e te tahi atu no te aro atu i te maˈi. E auaa iho â, no te mea ia haere mai oia i rapae i te opu o to ˈna metua vahine, e faaruru atu te aiû fanau apî i te mau aroraa a te mau nuu rahi o te mau manumanu ino huˈa roa.

I muri iti noa ˈˈe i to ˈna fanauraa, e rahi atu te puai tamaˈi o te ravea parururaa o te tino o te aiû iti. E tupu teie ohipa faufaa roa ia haamata anaˈe te aiû i te ote i te û o to ˈna metua vahine. Te piihia ra te û mama e tahe i roto i te mau mahana matamua, te colostrum, e ua î roa teie û i te mau huru taoˈa paruru i te tino atoa. Maoti teie û, ua ineine maitai o aiû no te aroraa.

“Mai te pitiraa aore ra te toruraa o te avae, (...) e rave noa te mau taoˈa hamani mauhaa a te puo ivi e ta te puna thymus [oia hoi te hoê puna e vai ra i muri mai i te ivi ouma] i te ohipa ma te tuutuu ore. I te ahururaa o te matahiti, e naeahia i te ravea parururaa o te tino i to ˈna faito puai roa ˈˈe. I muri iho râ, e paruparu atu ïa o ˈna.” — Te upootiaraa o te tino, api 35.

I te omuaraa o te ora e haamata ˈi te tamaˈi o te ore roa e faaea e tae roa ˈtu i te hutiraa aho hopea.

[Faaiteraa i te fatu o te hohoˈa i te api 2]

Lennart Nilsson