Api 2

NA ROTO i te mau uiraa i te pae morare o ta ˈna e faatupu ra, ua riro te faaohiparaahia te mau animala i roto i te mau maimiraa i te pae rapaauraa ei tumu no te mau aimârôraa rahi. Te turu nei te mau aivanaa e eita te mau ravea apî i te pae no te rapaauraa e iteahia mai ahiri e aita te mau tamataraa i nia i te mau animala. Ua parau te hoê o ratou e: “Ahiri e aita te mau tamatamataraa i nia i te mau animala, eita ïa tatou e ora.”

I TE TAHI atu pae, te faaite nei te mau hoa o te mau animala i te mau faainoraa e ravehia nei i nia i te mau tiaraa o te animala e tae noa ˈtu i te mau mauiui e te mau raveraa hairiiri mau e ravehia nei i nia i te mau mirioni animala i roto i te mau piha maimiraa. Te haapapu nei teie mau taata patoi e te vai ra ta te mau aivanaa i teie nei i te mau ravea monoraa, mai te mau hohoˈa a te matini roro uira e te mau vaehaa ora o ta ratou iho i faatupu.

TE VAUVAU nei na pǔpǔ tataitahi i to raua mau manaˈo. I roto i te mau tumu parau i muri nei, te hohora nei matou i te anairaa parau no nia i te mau tamatamataraa i nia i te mau animala na roto i te haapapuraa i te tiaraa o te feia maimi i te pae no te ite aravihi.

[Faaiteraa i te fatu o te hohoˈa i te api 5]

Hohoˈa rapaeua: Courtesy of The Pedigree Mutt Pet Shop