Te aua rahi a te hau Yosemite—100 matahiti to ˈna

IA HAERE mai oe na Merced (Kalifonia) mai, e faahoro oe na roto i te mau mouˈa, aita râ oe i ineine i te ite atu i te hohoˈa faahiahia roa e fa mai i mua ia oe ia tapae oe i te hopea o te purumu i raro i te fenua: te Yosemite Valley. Ua haaatihia teie peho rahi roa, e 1 200 metera te teitei, i te mau mouˈa rahi e te mau mato teitei oeoe. I te pae aui, te tia noa ra te mato tarere El Capitan i te hoê teiteiraa e 1 100 metera; i te pae atau, te faaiteite ra te mau toparaa pape Bridalveil, 190 metera i te teitei, i to ratou nehenehe, area i te atea ê ra, te itehia ra te hohoˈa rahi roa o te mouˈa Half Dome, te hoê vahi e 2 698 metera te teitei. E hitimahuta roa oe i teie hohoˈa faahiahia aita e faaauraa, e inaha, e puta mai i roto i to oe feruriraa i te parau ra: “[O Iehova] te Mato, o tei tia roa ta ˈna ohipa ra.” — Deuteronomi 32:4.

Ua haere mai te mau mirioni feia mataitai no te ao atoa nei e mataitai i te nehenehe e te faahiahia o te aua rahi a te hau Yosemite mai to ˈna faatupuraahia i te matahiti 1890 ra na roto i te ture a te Apooraa marite. I te matahiti 1864 ra, ua horoa te Apooraa i te Yosemite Valley ei aua rahi a te hau na Kalifonia. I teie mahana, ia tae i te tau mataitairaa rahi, e apǐ roa o Yosemite i te taata. Mai te peu râ e te imi ra outou i te vahi taata ore, e nehenehe outou e haere atu e faaruru i te High Sierra, i reira outou e mataitai ai, mai te mau aeto ra te huru, i te taatoaraa o te fenua.