Mai te fare vairaa tauihaa e tae atu i te tahua taaro

Na to matou taata papai i Paniora

E ITEHIA oia mai nia mai i te mau tupuai mouˈa e tae noa ˈtu i te pae miti, e fare matauhia hoi te hórreo i roto i te fenua no Galice. I roto i teie vahi i te pae apatoerau-tooa o te râ no Paniora, mea varavara roa te mau fare faaapu aita ta ratou e hórreo. Ua patuhia teie fare e te ofai paari aore ra e te raau, e eita iho â e hape, e tuuhia ˈtu te hoê satauro i nia iho, no reira, e ohie noa i te manaˈohia e e vahi tanuraa taata te hórreo.

Teie râ, te faaohipahia nei teie fare no te hoê ohipa haihai aˈe. Inaha, e vahi vairaa tauihaa teie, te hoê vahi haapueraa i te sitona, te mau umara putete aore ra te tahi atu mau maa no te mau avae haumi o te tau toetoe. Maoti te mau pou mai te mau tariˈa iore ra te huru, e ore ai te mau iore e haere mai i roto i teie vahi vairaa maa rahi.

A 30 matahiti i teie nei, i raro aˈe i te faatereraa haavî a Franco, ua moe aˈera te satauro o te hoê hórreo no te oire iti no Xeoane (a hiˈo i te hohoˈa i nia nei). Ua riro hoi teie vahi vairaa tauihaa apǐapǐ roa e 10 metera tuea, ei vahi putuputuraa huna matamua a te mau Ite no Iehova no Galice. Hau atu i te 23 Ite tei haaputuputu i roto i teie vahi nainai roa, ma te haere mai e te haere atu ia po roa ia ore ratou e tapeahia.

I teie nei, te fanaˈo nei te mau Ite no Iehova paniora i te tiamâraa i te pae faaroo mai fatata e piti ahuru matahiti mai â. Aita i maoro aˈenei, ua faatupu te mau Ite no Galice i ta ratou tairururaa mataeinaa no te matahiti, e inaha, teie ta te hoê vea no taua vahi ra, La Voz de Galicia, i parau:

“Ia au maite i te hiˈoraa o te mau kerisetiano matamua e haaputuputu na i roto i te mau vahi tanuraa taata no Roma no ta ratou mau oroa, i opanihia e te mau huimana, ua faaohipa te mau Ite no Iehova matamua no Galice, i roto i te mau matahiti 50 ra, i te hoê hórreo. (...) I teie nei, e 4 000 ratou i roto i na mataeinaa e maha no Galice. (...) I teie nei râ, mea aano aˈe ta ratou vahi putuputuraa — oia hoi te tahua taaro a te oire.” Inaha, aita ïa e tuearaa faahou e te hórreo iti haihai roa. E nehenehe atoa e faahiti e, i teie nei, i roto ia Paniora taatoa, te vai ra tau 80 000 Ite i purara na roto hau atu i te hoê tausani mau amuiraa.

[Hohoˈa i te api 25]

Te hoê tairururaa rahi i tupu i roto i te tahua tueraa popo no Barcelone.