Te matete o te pohe
I te mea ra hoi te haamâuˈa ra te ao nei i te matahiti hoê i te huru ra hoê tausani miria tara marite no te mauhaa tamaˈi,
800 000 000 taata o tei ora nei i roto i te hoê veveraa rahi mau.
770 000 000 o tei ravai-ore roa nei i te maa no te hoê oraraa itoito mau.
100 000 000 aita hoi e fare.
1 300 000 000 aita hoi e pape inu maitai.
14 000 000 mau tamarii o tei pohe nei i te matahiti tataitahi no te ravai-ore-raa i te maa.
E PIIHIA ratou te feia hoo i te pohe aore ra te feia tanu i te tino o te huitaata, e au ratou mai te hoê puu ino o te totaiete. O vai taua mau taata ra? O te feia hoo mauhaa tamaˈi o te ao nei. No te aha ratou e piihia ˈi na reira?
I mutaa iho, te horoa nei ratou na te mau nuu i te mau ˈoˈe, te mau mahae, te mau toi e te mau patia no te mau aroraa tino noa. I te XXraa o te senekele, ua hamani e ua hoo ratou i te mau pupuhi fenua, te mau tupita, te mau pereoo paauri, te mau manua tamaˈi, te mau manureva, te mau mahu taero e te mau ofai pupuhi o tei haapohe, i roto noa i na tamaˈi rahi e piti o te ao nei, tau ahuru mirioni taata e o tei faatupu no te tahi tau miria tara marite pau i te tuhaa materia (mau oire, mau fare o tei ore roa, e te tahi atu â...) O ratou te feia tei hoo rahi i roto i na 120 tamaˈi tei tupu mai te hopea mai â o te Piti o te Tamaˈi rahi.
I teie nei â mahana, te tamau noa ra ratou i te faahaere i mua te mau aroraa ino mau i roto i te mau tuhaa huru rau o te ao nei. I roto i te mau nunaa veve, te horoa ra ratou i te hoê haapaariraa i te mau faehau, ia nehenehe ratou e faaohipa maitai i ta ratou mauhaa. Ua faaineine ratou na te mau puai rarahi i te hoê haapueraa mauhaa tamaˈi atomi o te nehenehe e haamou e rave rahi taime i te huitaata e e faariro atu ai i te paraneta mai te hoê vahi o te ore e nehenehe e faaea-faahou-hia e te taata. Mai te huru ra e aita ratou e manaˈo noa ra i te ohipa e tupu i muri aˈe. Teie te parau faatianiani e tano ia ratou: “E monihia matou na roto i to outou pohe.”
Te haapapu nei te mau ohipa i tupu: aita roa hoê noa ˈˈe ohipa hooraa i mana mai i nia i te huitaata mai te hooraa mauhaa tamaˈi te huru. Na te tumu parau i muri nei e haamatara mai te tahi mau hiˈoraa arepurepu mau.