Te mau metua tei rave i ta ratou mau hopoia i te fare

[Tumu parau tarenihia i te api 11]

Te tahi atu mau ohipa ta te mau metua e nehenehe e rave

I roto i te totaiete taata no teie nei tau, te tauturu nei te ohipa a te fare haapiiraa e a te mau orometua haapii, i roto i te hoê tuhaa rahi, i te tupu-maitai-raa o te mau tamarii. Eita iho â ïa e tia i taua faanahonahoraa nei ia mono i te mau metua, e nehenehe râ te reira e tauturu rahi ia ratou ia nehenehe ratou e manuïa i te pae no te haapiiraa i ta ratou mau tamarii. No reira, te tahi atu hopoia te tia roa ia outou ia haapao, e te mau metua, te tahoê-rahi-raa ˈtu ïa i te faanahonahoraa haapiiraa.

Eaha ïa to outou huru ia titauhia mai outou ia tae atu i te hoê putuputuraa aore ra te hoê porotarama taa ê i faaineinehia e te fare haapiiraa? Ei hiˈoraa, ua faanahonaho na te hoê fare haapiiraa no te mau Etats-Unis i te hoê oroa opereraa re. “Ua haere atu vau i reira no te mea ua hinaaro vau e ia ite ta ˈu mau tamarii e ua mauruuru roa vau ia ratou”, o ta Joanne ïa e faataa ra, e maha hoi ta ˈna tamaroa. E piti ahuru tamarii tei roaa i te hoê re taa ê i taua mahana ra, aita râ te rahiraa o te mau metua i tae mai. I to outou manaˈoraa, ua tauturu anei teie mau metua tei ore i tae mai, i ta ratou mau tamarii ia haamaitai atu â i ta ratou ohipa i te fare haapiiraa? Aita paha ïa.

Ia faatura atoa ˈtu outou i te mau orometua haapii. E pinepine te mau fare haapiiraa i te faatupu i te tahi mau putuputuraa i te taime po no te hohora ˈtu i te ohipa e ravehia ra e te mau tamarii e no te tauaparau no nia i ta ratou mau haereraa i mua, e te mau metua. Inaha, te rave nei e rave rahi mau orometua haapii i to ratou iho taime no te faaineine i taua mau farereiraa ra. Ua horoa mai te hoê o ratou i teie manaˈo: “Te vai atoa ra ta matou iho mau tapitapiraa e oia atoa hoi, te hoê utuafare te tia ia matou ia haapao. E paruparu roa to oe manaˈo mai te peu e e haamauˈa oe i to oe taime no te faaineine i te tahi mau ohipa taa ê e ia ite oe e hoê, e piti aore ra e toru noa metua o te haere mai i taua taime ra.”

Peneiaˈe te tiaturi ra outou e na te fare haapiiraa aore ra na te mau orometua haapii e rave i te tahi mau faanahonahoraa no te haamâha i te tahi mau hinaaro taa ê o ta outou mau tamarii. I to outou aˈe pae, eita anei e tia ia rave atoa outou i te tahi mau haapaeraa no te turu i te mau tutavaraa a te faanahonahoraa haapiiraa, inaha, te tumu o teie ohipa, te tautururaa ˈtu ïa i ta outou mau tamarii ia riro mai ei mau taata paari e nehenehe e tiaturihia?

Teie ta te vea iti ra “L’école et les Témoins de Jéhovah”, i neneihia no te haamaitai i te mau auraa e te tahoêraa i rotopu i te mau metua e te mau orometua haapii, e faahiti papu ra no nia i te hopoia a te mau metua Ite no Iehova: “Mea faufaa roa ia matau te mau metua i te mau orometua haapii o ta ratou mau tamarii, na roto i te farereiraa ia ratou no te aparau atu e o ratou. (...)

“I roto i teie huru aparauraa, e tia i te metua tane aore ra te metua vahine Ite no Iehova ia haapapu atu i te orometua haapii e te hinaaro nei ratou e ia faaite ta ratou mau tamarii i te hoê haerea kerisetiano e mai te peu e e haerea ino to ratou, te hinaaro nei ratou e ia faaitehia mai. E haapapu atoa ˈtu ratou i te mau orometua e, e turu atu ratou ia ratou ia horoa noa ˈtu ratou i te hoê aˈoraa tano i ta ratou mau tamarii, e ua ineine atoa ratou, mai te peu e mea titauhia, ia haapapu roa ˈtu â i taua aˈoraa ra i te fare.

“Teie â te tahi mau ohipa ta te mau metua e nehenehe e rave no te tauturu i te mau orometua haapii: Ia papu maitai ia outou e ua tamaa ta outou mau tamarii hou aˈe ratou e haere atu ai i te fare haapiiraa. A ara ia rave iho â ratou i ta ratou mau ohipa haapiiraa e ia rave ratou i ta ratou mau buka atoa. A auraro maite atu i te mau faaueraa a te fare haapiiraa e a titau e ia na reira atoa ta outou mau tamarii. A ani atu ia ratou ia faatia mai i ta ratou ohipa i te fare haapiiraa e te mau fifi atoa ta ratou e nehenehe e farerei.”

E te mau metua, aita anei outou e manaˈo atoa ra e e mau aˈoraa maitatai mau teie? Te faaohipa ra anei outou i te reira? E hopoia te reira na outou.

[Tumu parau tarenihia i te api 12]

E te mau metua, a uiui nai teie nei mau uiraa

1. Te haapao maite ra anei au i te tereraa o te tau haapiiraa o ta ˈu mau tamarii?

2. Ua farerei anei au i ta ratou mau orometua haapii?

3. Ua ite anei te mau orometua haapii e te mauruuru nei au i ta ratou mau tutavaraa e rave nei?

4. Te haafaufaa ra anei ta ˈu mau tamarii i te ohipa i te fare haapiiraa?

5. Te hiˈopoa ra anei au e ua rave ratou i ta ratou ohipa haapiiraa i te taime tano?

6. Te haafaufaa ra anei au i te ite e te haapiiraa?

7. Te ite ra anei ta ˈu mau tamarii ia ˈu ia haapii?

[Hohoˈa i te api 7]

E faaaraara te taioraa i te hinaaro e ite e te feruriraa o te mau tamarii.

[Hohoˈa i te api 8]

Ia rave ratou i te taime no te taio e ta ratou mau tamarii, e faaetaeta te mau metua i te mau taairaa o te utuafare fetii.

[Hohoˈa i te api 9]

E nehenehe te haereraa ˈtu te utuafare taatoa e mataitai i te hoê fare vairaa tauihaa tahito aore ra te hoê vahi i te mataeinaa, e riro ei taime au mau — e hau atu, et taime no te haapii.

[Hohoˈa i te api 10]

E hinaaro ta outou mau tamarii e ia anaanatae outou ia ratou tataitahi.