Te iteraa i te mau tapao o te maˈi na roto 80 mau reo
IA AU I te “Medical Post”, ua hamani te hoê taote no Canada i te hoê ravea ia nehenehe te hoê taote “e ite i te mau tapao o te maˈi e e horoa i te raau e tano no te feia maˈi na roto 80 mau reo ma te ore roa e titau i te hoê auvaha parau”. E piihia teie ravea MIGS (na roto i te reo beretane), teie to ˈna auraa: Ravea no te haaputuputuraa i te mau haamaramaramaraa i te pae no te rapaauraa. E 20 api to teie mau pueraa buka e, no te mau reo taitahi, “te faaite ra oia e 200 tapao no te maˈi” na roto i te mau parau ohie.
Na mua ˈˈe, e faaitehia i te taata maˈi te hoê â pereota na roto râ i te mau reo taa ê e tae roa ˈtu i te taime a taio ai o ˈna i to ˈna iho reo. Te ani ra teie pereota ia faaite o ˈna i te taote eaha to ˈna reo; i reira te taote e nehenehe ai e rave mai i te buka e tano no ˈna.
Te vai ra i roto i teie buka 15 mau uiraa no te tauturu i te taote ia ite i te fifi o te taata maˈi. Na te reira e tauturu mai ia itehia eaha râ te maˈi. Ei hiˈoraa, mai te peu e e faaite mai te taata maˈi e mauiui opu to ˈna, i reira e faaitehia ˈtu ia ˈna te hoê tabura e “fatata ahuru ma pae mau uiraa taa ê no nia i te mauiui opu o ta ˈna e nehenehe e maiti”.
E haapao atoa teie mau huru parau ohie i te taa-ê-raa e vai ra i te pae o te haapiiraa aore ra i te pae o te peu. Te horoa ra te tumu parau a te “Medical Post” i te hoê hiˈoraa: “No te faataa e e inoino roa to ˈna opu, e parau ïa te hoê taata no Canada: ‘Mauiui roa to ˈu vairaa maa’ e te hoê taata no Jamaïque: ‘Ua huru-ê-roa-hia vau.’”
Te vai atoa ra te hoê buka papai braille, na te feia matapo. E te haa atoa nei te taote Victor Kumar-Misir, na ˈna i hamani i teie ravea, i nia i te hoê buka no te feia aore i ite i te taio.
Te manaˈohia ra e e mea faufaa roa te MIGS no te mau taote e te feia maˈi atoa e vai ra i roto i te mau oire rarahi no te mea te ite-rahi-hia nei i roto i teie mau huru oire te mau peu e te mau reo taa ê e rave rahi. Ua ite-aˈena-hia te inoraa te hoê taata maˈi aore ra te hoê taata pepe ino mau no te mea aita te taote e te taata maˈi i nehenehe e paraparau.
[Faaiteraa i te fatu o te hohoˈa i te api 26]
Fare maˈi NIH