E maha hanere taata i pohe. Ua ora mai au

UA tupu te reira i te 10 no atopa 1986. Te haamata ra vau i te opani i ta ˈu fare toa hooraa monoi pîpî i San Salvador no te hoˈi i te fare no te tamaa. I reira te faarooraahia te haruru puai roa i roto i te fare teitei e maha tahua o Rubén Darío.

I muri roa iho ïa to ˈu iteraa e o te aueueraa fenua rahi roa ˈˈe te reira o te aamu o San Salvador, e 7,5 i nia i te faito a Richter. Ua haapohe oia: 1 200 taata, e 400 no roto noa i taua fare tahua teitei Rubén Darío ra, e 300 000 aita e faaearaa faahou. Te na ô ra te peretiteni Duarte e ua faatupu te reira ‘hau atu i te ino i na hitu matahiti tamaˈi tivila’.

A haamata ˈi te aueueraa fenua, ua tote aˈera to ˈu upoo e moe atura to ˈu hiroa. I te hoˈiraa mai to ˈu hiroa mea tipapa noa vau, i roto i te pouri taotao. No te puai o te mauiui e te mǎtaˈu hoi, ua tiaoro aˈera te mau taata e: “E te Fatu e, a faaora ia ˈu!”, “No te aha hoi oe i faatae mai ai i te utua i nia ia matou?”, aore ra: “A tauturu mai ia ˈu!”

Ua fafa ihora vau i to ˈu mata. Auaa râ, aita vau i pepe noa ˈˈe, o to ˈu na avae tei mau i raro aˈe i te huˈahuˈa o te fare. Te fifi ra vau ia huti i te aho no te mataˈi ore. Ua faaroo atura vau i te hoê reo i pihai iho ia ˈu. O Quijano Tane, te hoê rave ohipa no roto i te piha toroa no taua fare tahua teitei ra, teie e parau mai nei ia ˈu: “O oe te vahine o te fare toa hooraa monoi pîpî! Mea maitai anei oe?”

“Maitai, ua pirihia râ to ˈu avae, ta ˈu ïa i pahono atu. E o oe?”

“Ia manaˈo vau ua fati to ˈu avae e to ˈu rima, eita ta ˈu e nehenehe e hautiuti faahou. A tauturu mai na ia ˈu.”

Ua faatoro atura vau i to ˈu rima, e hiˈo parari râ hoi tei tano mai i nia i to ˈu rima. “Eiaha oe e inoino mai, eita ta ˈu e nehenehe. Ua pirihia to ˈu na avae.”

No te mataˈi ore, mea fifi roa ia huti i te aho; ua pure aˈera vau i te Atua ia tauturu mai ia ˈu. Ua haamanaˈo aˈera vau i ta ˈna i parau ia Iosua i te na ôraa e: ‘E faaetaeta, e ia itoito roa; tei pihai-atoa-iho hoi to Atua o Iehova ia oe.’ (Iosua 1:9). Teie râ, e tia ia ˈu ia ohipa atoa.

I muri iho itoitohia ˈtura vau i te pae varua e i te pae tino atoa. Opua aˈera vau e tatara i to ˈu nau avae na mua ˈˈe a hopiipii ai e a oru roa ˈtu ai, ua tamata vau i te tatara hoê. I taua taime ra, te tamau noa ra ïa te mau aueueraa; te paapaaina ra e te hautiuti ra hoi teie fare tahua. Tei raro roa ta ˈu fare toa.

I te pae hopea, matara mai nei to ˈu avae atau. Ua haamauruuru atura vau ia Iehova ma te reo puai. Ua faaroo mai paha o Quijano Tane ia ˈu, tei fifi roa hoi te hutihutiraa i te aho. Ua parau maira oia e: “A tamau noa i te pure ia Iehova, a pure atoa no ˈu, mai te peu e tia oa oe!”

E au ra e ua toetoe to ˈu na avae e te rarirari hoi. Manaˈo atura vau e ‘Te tahe ra to ˈu toto!’. I te fafaraa vau te raroraa o to ˈu avae aui, taa ihora ia ˈu e te taoˈa e rari ra e te piripiri hoi, e pua no te rouru aore ra te pape no te horoi i te iri e vai ra i nia i te paepae faaiteiteraa o te fare toa. No te heehee hoi, ua tere rii mǎrû noa maira to ˈu avae aui e matara roa mai nei.

Ua ani maira o Quijano Tane: “Ua tauturu mai anei o Iehova ia oe?”

Ua pahono atura vau: “E! Ua matara to ˈu nau avae i teie nei.”

Ua taparu aˈera oia ia ˈu: “A tauturu mai na ia ˈu!”

Ua imi au i te mau ravea atoa ia naeahia ˈtu o ˈna ia ˈu. Ia faanuu rii anaˈe au, e mutu vau i te huˈahuˈa hiˈo. I te pae hopea roa ïa, taa ihora ia ˈu e e haapueraa auri tei taviri roa teie e faataa ê ra ia mâua.

“Eiaha oe e inoino mai ia ˈu, e Quijano Tane. Eita tâua e nehenehe e haafatata ˈtu ia oe.”

“Ua tia roa, ta ˈna ïa i pahono mai. E tiai noa ïa tâua.”

Te faaroo noa ra mâua i te mau reo fatata roa mai e au ra e e piti taata e e hoê tamaiti iti. Tei te tahua matamua ratou, ia manaˈo vau i teie nei hoê noa metera i nia noa ˈˈe ia mâua. Ua nehenehe ia ˈu te faaô atu i ta ˈu upoo na roto i te hoê area, ua oioi ra vau i te otohe mai. Ua î roa te mataˈi i te repo puehu, puunena ˈtura vau. Ua rohirohi taue noa ˈtura vau e hinaaro noa ˈtura vau e taoto.

I to ˈu araraa mai, aita hoê aˈe maniania e mea huru ê roa. Ua uiui ihora vau e ua faaorahia nei hoi te taatoaraa, aore ra ua pohe pauroa. Ua pii oioi noa ˈtura vau ia Quijano Tane, e toru taime, ua uuru mǎrû noa maira o ˈna. Ua tamau noa vau i te pure.

Tau taime rii noa i muri mai, ua faaroo atura vau i te maniania tapu repo. Ua tuo atua vau e “Quijano Tane e, ua tono mai te Atua i te mau taata e faaora ia tatou! Ua fatata roa ratou i te tae mai, e parau vau ia ratou e tatara mai ia oe!” Ua uuru mǎrû noa maira oia e aita e maniania faahou.

I muri iho, e reo puai te faaroohia ˈtu i roto i te hoê poro pouri i pihai iho ia ˈu: “E taata anei to ǒ nei?”

Ua tuô atura vau e “E, e!”

“E hia outou?”

“Mea rahi roa matou; mea pepe ino roa vetahi”, ta ˈu ïa i pahono atu. Te tahi atu â mau tano tapu repo. I muri iho: “Te ite ra anei oe i te maramarama?”

“E!, ta ˈu ïa i parau, te ite ra vau!” Ua faaaano faahou aˈera te mau taata faaora i taua area ra, e maramarama roa ˈtura te apoo te reira vau.

Ua ui maira te mau taata faaora ia ˈu: “Nehenehe anei ta oe e haere mai?” “E, e tamata vau!” ta ˈu ïa i pahono atu.

Ua pii au i to te tahua matamua: “E homa e! to nia! a tamata i te pou mai! E nehenehe ta tatou e haere i rapae au! A faahaere mai i te tamaiti iti na mua!”

Ua nee rii mǎrû noa vau ma te fifi na roto i teie mau tapu auri tei taviri haere noa, te mau huˈahuaˈa hiˈo, te mau apaparaa tima e te mau pereti. Ua na ô aˈera vau i roto ia ˈu iho, ‘Ia haere iho â vau i mua. Eiaha vau e faaea i ǒ nei’. Ua tae roa vau i pihai roa ˈtu i te auvaha no te haru mai i te uaua i taaihia i te hutiraa mataˈi ora tei faataehia ia ˈu ra na roto i te apoo. Ua tamau vau i te nee rii mǎrû noa e tae noa ˈtura i te vahi pirihao o te auvaha o te apoo.

Ua huti atura te mau taata faaora ia ˈu i rapae au, hoê rima na mua, muri iho ïa te tino taatoa. Ua mutumutu roa to ˈu aahu e ua pepe haere ta ˈu tino. Ua ani maira te mau taata faaora ia ˈu e: “Eaha to oe huru?” Pahono atura hoi au e: “Ua oaoa roa vau”.

I to ˈu taeraa ˈtu i nia i te purumu, te vai ra te hoê nahoa taata; te rapaau ra vetahi te feia pepe, te tahi pae ra, te heru noa ra ïa i roto i te huˈahuˈa o teie fare tahua. Ua haere mai te mau taata tei ahoaho roa e ani ia ˈu tei roto vau i tei hia vahi o te fare.

“Ua ite anei oe i ta ˈu vahine?”, “Ua ite anei oe i ta ˈu metua tane?”, “Ua ite anei oe i ta ˈu tuahine?” ta ratou ïa i ani mai ma te hepohepo rahi. Ta ˈu noa e nehenehe e pahono: “E rave rahi ïa tei pirihia i raro aˈe e te ora noa mai ra; ia tamau noa te mau maimiraa e tiai.”

Ua faaorahia mai ïa te tahi mau taata na roto i te auvaha apoo o ta ˈu i haere mai i rapae au; e mea pepe ino roa râ vetahi. Area râ, e rave rahi tei pohe no te mataˈi ore. I nia i te purumu pihai iho i te fare tahua, te itehia ra te hoê hiˈoraa peapea mau: te hoê panairaa tino taata pohe. Tei roto atoa o Quijano Tane e te tamaiti iti o te tahua matamua i taua mau taata ra. — Antonieta de Urbina.

[Tumu parau tarenihia i te api 16]

Te fare teitei Rubén Darío

Te tia ra te fare teitei Rubén Darío e maha tahua i ropu ia San Salvador. Tei roto ia ˈna te mau vahi inuraa taofe, te mau piha tapuraa rouru e te faaneheneheraa, te mau piha a te taote niho e te mau vahi hiˈopoaraa, te mau fare hooraa tiaa e te mau piha ohiparaa. Na pihai iho i taua fare ra, te hoo ra te mau taata i te mau huru maa rii atoa, te mau sandwiches e tae noa ˈtu i te mau titeti taviriraa. I te faaiteraa parau apî o te tele, ua faaitehia maira e fatata e 400 taata i pohe; ua perehu ratou, ua pohe no te mataˈi ore aore ra ua paapaa; tei roto atoa e rave rahi mau Ite no Iehova ia ratou. E i te pae hopea, e 92 taata tei faaorahia mai, e ua pohe râ vetahi i muri iho.

[Hohoˈa i te api 17]

Te fare tahua teitei Rubén Darío, na mua aˈe e i muri mai i te aueueraa fenua.

Ua faaorahia mai o Antonieta de Urbina i te ahiahi, i taua iho â mahana ati rahi ra.