Te haamaruaraa tamarii: e tia i te taata i ite ia parau
MAI TE PEU e ua ite outou i te ohipa tia, e itoito noa anei outou no te faaite i te reira? Mea faufaa roa, mai te peu iho â râ tei te reira te oaoaraa o te hoê taata. I muri aˈe i to ˈna taioraa i te hoê tumu parau no nia i te haamaruaraa tamarii i roto i te hoê numera tahito no teie nei vea, teie ta te hoê metua vahine beretane i papai mai:
“Ua hope ia ˈu i te taio i te tumu parau ra ‘Te papai mai nei te metua vahine o te hoê aiû tei pohe na mua ˈˈe oia i fanauhia mai ai’, i neneihia i roto i te numera no te 8 no tiunu [1986] o te A ara mai na!. Ua putapû roa vau i te reira.
“Aitâ vau i haamarua aˈenei i te tamarii, i to ˈu râ hapûraa i ta ˈu tamarii matamua, e maha hoi avae to ˈu, ua hapû atoa to ˈu taoete vahine i te toru o ta ˈna tamarii e e piti ïa avae to ˈna. No ô noa ˈtura ta ˈna nau tamahine iti i te haapiiraa, e ua itehia mai ia ˈna te hoê ohipa aufau-maitai-hia. Te hinaaro ra oia e hoo mai i te mau ahu apî, te mau matini vidéo, te hoê pereoo apî e te tahi mau tiare no ta ˈna aua. Mai te peu râ e fanau mai oia i te toru o te tamarii, e faahepo ïa te reira ia ˈna ia faarue i ta ˈna ohipa, eita ˈtura ïa oia e nehenehe faahou e hoo mai i teie mau mea atoa. Ua opua aˈera ïa o ˈna e haamarua i taua tamarii ra.
“Te tiai râ o ˈna ma te rû i te mahana oia e haamarua ˈi i ta ˈna tamarii, o vau râ, a piri noa mai ai taua mahana ra, te rahi noa atoa ra ïa to ˈu peapea. Te haamata ra hoi au i te ite i to ˈu pepe i te hautiuti i roto i to ˈu opu, e ua manaˈo aˈera vau i to ˈna pepe, o te tupu noa atoa ra hoi.
“Ua tae maira te mahana na mua ˈˈe i te mahana no te haamaruaraa tamarii e te tiaturi noa ra vau e e taui oia i to ˈna manaˈo. Te feruri noa ra vau i to ˈna pepe, tei mahanahana maitai e tei paruru-maitai-hia i roto i to ˈna opu, e o te faarooroo noa ra i te otuituiraa mǎrû e te hau o te mafatu o to ˈna metua vahine. I muri iho, e riaria roa ïa vau ia manaˈo e e tâpû-ê-hia teie aiû iti haihai roa mai roto mai i to ˈna vairaa mǎrû maitai, e e haapohehia oia. Ua taˈi ihora vau ma te mauiui. Ua tupu aˈera te haamaruaraa tamarii. Eita ïa ta ˈu tamahine iti e matau atu i to ˈna tuaane fetii, e o raua hoi te nehenehe e paari, i te mea e fatata roa hoê â to raua matahiti.
“Eaha ˈtura ïa no to ˈu taoete vahine? Ua ere oia i ta ˈna ohipa e ua itea mai ia ˈna te tahi atu. Mai reira mai, ua rau te mau ohipa ta ˈna i rave. Ua hoo mai oia i ta ˈna matini vidéo, te hoê pereoo apî, te mau tiare, te mau ahu, e e rave rau atu â, teie râ, ua roohia oia i te fifi i te pae feruriraa. Ua tae roa oia i te faarue i ta ˈna tane e ta ˈna mau tamarii, e ua hoˈi faahou mai oia i to ˈna fare tau mahana i muri iho. Teie râ, aita oia e oaoa ra. Ia haere mai oia e farerei ia ˈu, e hauti ta ˈna nau tamahine iti na muri iho i ta ˈu tamaiti 11 avae e ta ˈu tamahine, e e parau raua no nia ia ˈna e: ‘Mea nehenehe roa oia, e ere anei mama? Auê hoi e, afea e noaa ˈi ia matou i te hoê tuahine iti aore ra i te hoê taeae iti!’ Ia faaroo oia i teie mau parau, e ite au i te mata o ta ˈu taoete vahine ia taui. E hinaaro au e tamǎrû ia ˈna, no te mea i te taime oia a haamarua ˈi i ta ˈna tamarii, aita oia i haapao maitai i te ohipa ta ˈna e rave ra. Teie râ, ua here aˈe oia i te moni maoti i te ora o ta ˈna tamarii, e i to ˈu manaˈoraa, no reira oia i tatarahapa roa ˈi i teie nei.
“Atira noa ˈtu, te turai mau nei te reira ia ˈu, ia hiˈopoa maite ia ˈu iho. Te faariro aˈena nei au ia ˈu iho mai te hoê Ite no Iehova, aitâ râ vau i bapetizohia ˈtura; te ite nei râ vau e mea rahi â te mau ohipa te tia ia ˈu ia rave no te haere i mua, no te mea te apee nei te mau Ite mau i te hiˈoraa o Iesu; te faaite nei ratou i te here e te hamani maitai i nia i te mau huru taata atoa, noa ˈtu eaha to ˈna huru aore ra ta ˈna mau ohipa i mutaa ihora. Te tiai nei au ma te rû i te mahana e nehenehe ai au e parau maitai e hoê â to ˈu mau manaˈo hohonu e to ratou no nia i to ˈu mau taata-tupu e e noaa ˈi ia ˈu i te haamaitairaa, oia hoi te amoraa i te iˈoa o Iehova. Ahani e aita vau i haamarirau maoro, peneiaˈe ua itehia ia ˈu te itoito no te paraparau atu i to ˈu taoete vahine, e peneiaˈe paha, te ora noa râ to ˈna pepe i teie mahana.”
Te tiaturi mau nei te feia nenei i te A ara mai na! e e tauturu atu teie mau tumu parau i te tahi mau taata i roto i teie huru tupuraa.