No te aha teie rahiraa repo puehu?

Aita anei outou i maere aˈenei ia outou i hiˈopoa i te mau rehu repo puehu ia ori noa na i roto i te hoê hihi mahana? Inaha, ua riro mau hoi te reira ei ohipa riaria na te mau vahine tamâ fare e te mau aivanaa. Ia mau maitai te hoê piha, i te tahi noa tau mahana, e itehia ïa ia tomo atu tatou i roto, i te repo i nia i te mau taoˈa atoa. E nehenehe te repo e faaino i te hoê matini nira ahu, i te hoê uati e te hoê matini aravihi (ordinateur). Eita roa ˈtu ïa e maerehia ia ore te reira ia faarirohia ei ohipa maitai. Teie râ, ua aniani aˈenei anei outou te mea e erehia e tatou ia ore roa te repo puehu?

E ohipa maitai atoa hoi ta te repo e faatupu mai. Ua ite anei outou e aita anaˈe e repo i roto i te reva, e iti mai ïa te ûa e te hiˈona i te topa mai? Oia mau, e tupu hoi te mau topata rii pape e te mau huˈa hiona maoti te mau huˈa repo o te riro ei tuhaa faufaa roa.

Aita anaˈe e repo, e erehia ïa i te hoê o te mau ohipa faahiahia roa ˈˈe ta tatou e nehenehe e mataitai i nia i te fenua nei oia hoi te taperaa mahana, te hoê tuhaa o to ˈna nehenehe. Ia topa te mahana i nia i te iriatai e na roto atu to ˈna maramarama i te hoê haereraa mataˈi meumeu aˈe e tae roa mai ai ia tatou nei. Na te mau huˈa repo e te tahi atu mau tino e tautau ra i roto i te reva e titia ˈtu i te reira e e û atu ai i nia iho. E ohie aˈe i te mau hihi ninamu, poto aˈe i te tapeahia e te otehia e te repo, i te mau hihi uteute, roa roa ˈˈe. No reira eita tatou e taeahia i te mau hihi ninamu mai te mau hihi uteute. Auaa hoi taua huru tupuraa nei e nehenehe ai tatou e haafaahiahia i te peni anani, te tarona e te uteute o te mau taperaa mahana.

Maa repo iti i roto i te reva, tera te taoˈa haihai roa e aufau e nehenehe ai tatou e mataitai i te hoê ohipa faahiahia roa: te taperaa mahana!