E tia anei ia opani i te pupuhi i te avaava i roto i te mau manu reva?

Ua tuatapapa o Lee Glass, taote e e taata aravihi i te pae no te ture, i teie tumu parau patoitoihia i roto i te vea Newsweek.

Ua parau oia e: “I to ˈu aniraa ˈtu i te taata haapao i te tatairaa i te manu reva e eaha to ˈna manaˈo no nia i te feia pupuhi avaava, ua parau mai oia e e pau rahi roa te mau taiete manu reva no te ohipa pupuhi avaava. Eita e nehenehe e faaore ohie noa i te mau kilo avaava o te riro mai ei rehu. E vaiiho na mua te auauahi i to ˈna mau taoˈa e faatupu mai i te mariri aˈi taata i roto i te mahaha o te taata pupuhi avaava, a haere atu ai na roto i te matini faahaereraa mataˈi, ma te faaapiapi i te mau uaua o te matini. E faarepo taua auauahi ra i te mau auri mai ta ˈna e faarepo ra i te mau uaua o te feia pupuhi avaava. E rave rahi ïa te moni e pau no te faaapîraa i taua matini ra.” No te aha ïa te mau taiete manu reva e farii noa ˈi i teie haamauaraa moni faufaa ore, i te mea e e tia noa ia ratou ia opani i te pupuhi i te avaava eiaha to ratou taime e ta ratou moni ia pau? Te faataa nei te taote Glass e: “Te tumu e farii noa ˈi te mau taiete manu reva i teie mau pauraa moni, no te mea ïa e pau ratou mai te peu e e opani ratou ia pupuhi i te avaava. Oia mau, e rahi aˈe ta ratou moni e noaa mai ia hoo ratou i te titeti i te feia pupuhi avaava.”

Aita te taote Glass i farii i teie huru manaˈo. Te manaˈo ra oia e i roto i te maororaa, e ite atu ïa te mau taiete manu reva i ta ratou mau pauraa ia monohia na roto i te turu a te feia pupuhi ore i te avaava e ta te “mau faanahoraa e aro nei i te avaava no te pae hitia o te râ e tae atu i te pae tooa o te râ o te fenua Marite”. I te pae hopea, e nehenehe ïa ratou e “tauturu i te feia pupuhi avaava i te faaore i taua peu ra no te mea aita e parahiraa faahou no ratou. E iti mai ïa te pauraa moni no te mau tatairaa, no te mea aita te mau matini faahaere mataˈi e apiapi faahou i te auauahi. E tuhaa faufaa roa ïa ta ratou i roto i te haamaitairaa i te ora o te taata o te fenua, ma te tauturu atoa i te tahi mau taata ia faaea i te pupuhi avaava”.