Hoê fare unauna faufaa i te pae tuatapaparaa tei faarirohia ei piha tairururaa na te mau Ite a Iehova
I TE 24 no mati 1928, i tomohia ˈi te fare hautiraa teata taata ora ra o Stanley i Journal Square, i Jersey City, ua riro oia ei hoê o te mau fare teata rahi roa ˈˈe no te Fenua Marite. Ua faatenitenihia oia no to ˈna unauna; mea nehenehe iho â râ te piha e vai ra i roto e te ite-atoa-hia ra te huru raveraa o te mau faaneheneheraa no Italia i nia i te muaraa o te piha. “Mai te peu e ua haere aˈenei oe i Italia (...), i reira te faahaamanaˈo ra te mau fare rarahi faahiahia e vai ra i rapae i te oire e to ratou mau aua ruperupe i te hanahana o Roma no te pae rima î, ta te hoê taata papai vea ïa i parau i taua matahiti ra, e taa rii ïa ia oe te unauna o teie nei fare teata apî.”
Teie râ, i muri aˈe i te pata-noa-raahia te mau hohoˈa teata e i te hauti-noa-raahia te mau teata taata ora e rave rahi te matahiti, ua ino roa ïa taua fare tuiroo ra. Aita râ i manuïa te mau opuaraa no te hamaniraa e pae piha rii nainai no te hautiraa teata taata ora aore ra te vavahiraa no te hamani faahou i te hoê fare teitei no te raveraa ohipa. I te 12 no me 1981, ua tuuhia te fare teata Stanley i raro aˈe i te hoê ture apî: Ua riro oia ei Vahi faahiahia i te pae tuatapaparaa na te Hau no New Jersey.
Mai taua tau ra, i te mea hoi e aita teie fare e faaohipa-faahou-hia ra, ua ruhia ˈtura ïa no te tatai ia ˈna. I raro aˈe mai i te tahua hautiraa teata, e i roto i te tahi mau vahi o te tahua i raro aˈe, ua î roa ïa i te pape, e 60 tenetimetera. Ua moe roa te veo o te mau opani e te mau haamaramarama i raro aˈe i te peni e te repo meumeu. Te muaraa faanehenehe-maitai-hia mai te fare o te mau Italia, ua ereere roa ïa, na roto i te vai-noa-raa e 50 matahiti te maoro i roto i te auauahi avaava e te repo puehu. Ua tafetafeta te mau parahiraa, ua tatarahia aore ra ua mahae. Ua mohimohi te mau mori tautau ua î roa i te repo. Ua opuahia atura e hoo ia Stanley i te matahiti 1982 ra. I to te mau Ite a Iehova papuraa e e nehenehe teie fare e faaohipahia no ta ratou mau tairururaa haaati, ua hoo mai ratou i te reira i te avae novema 1983.
Aita i maoro ua tupu maira te fifi. Ua parau atu te mau tia o te oire e eiaha teie fare ia faaohipahia no te ohipa pae faaroo. Ua faatia râ ratou ia tatai te mau Ite a Iehova i te tapoi fare e te matini tamahanahanaraa. I to te mau Ite hinaaroraa e faaapî i te vahi haumitiraa, te uira e te auri pape, aita i horoahia mai ta ratou parau faatia. I te avae setepa 1984 ra, ua tuuhia teie ohipa i roto i te haavaraa. Ua faataa te mau Ite a Iehova i te tumu mau o te fifi: oia hoi, eita te tavana oire e hinaaro ia faaea te mau Ite a Iehova i Journal Square. E opuaraa taa ê ta ˈna no taua vahi ra. Ua horo te mau Ite a Iehova ia ˈna e te tahi mau tia o te oire i te haavaraa, ia paruruhia to ratou tiaraa ia au i te ture o te fenua.
I muri mai i te feruri-maite-raahia, ua faatia te haava Debevoise ia tataihia te uira e te auri pape. Ua farii atoa oia e mea tia atoa ia faaohipahia taua fare teata Stanley ra “ei fare tairururaa ia au i te ture”. I nia i te tuhaa faufaa o teie hororaa, ua papai oia e: “Mea maramarama maitai te ture no te tiamâraa o te mau huru faaroo atoa aore ra mau huru oreroraa parau atoa i roto i te mau anairaa ture o te huiraatira faanahohia e te Fenua Marite (...). I roto i teie tupuraa, te feia e fifi nei [te mau Ite] te hinaaro nei ratou e faaohipa, e haapii e e poro i to ratou tiaturiraa na roto i te faaohiparaa i te hoê fare o ta ratou i manaˈo e e au no te reira opuaraa.”
Ua parau â te haava e, mai te peu e e horo faahou â te apooraa oire, “peneiaˈe te feia e fifi nei i te faahaere roa ˈtu i te reira i te vahi teitei ma te parau e te haafifi nei o Jersey City i te tiamâraa o te faaroo na roto i ta ˈna tatararaa e te faaohiparaa i te mau ture no nia i te tufaraa fenua”. I muri aˈe i teie haavaraa, aita te apooraa oire i patoi faahou.
Teie atura ïa tei titauhia i te mau Ite: te faaapî-roa-raa i teie fare teata Stanley e ia tomohia i te 7 no setepa 1985, no te opereraa i te mau parau tuite a te mau mitionare no Gileada, te Haapiiraa Bibilia a te Taiete Watchtower o te tupu i te poipoi aˈe. No te mea hoi e e iva noa avae e toe ra no te faaoti i taua ohipa rahi ra eiaha ïa e haamarirau.
E fea rahiraa tausani rave ohipa tamoni ore i tae mai i reira e ua riro atura ïa te fare Stanley mai te hoê afata manu meli. Ua pûpû te mau rave ohipa aravihi i to ratou ite i te pae no te peni, no te auri pape, te pateraa, te tamuta e te pae no te uira. E rave rahi atu â mau mea o tei faanahohia, aita râ e navai te api no te faataa atu i te mau ohipa i ravehia e teie mau rave ohipa i te po e te ao e i te maororaa o te mau hebedoma e te mau avae. Na roto i te mau hohoˈa e taa ia outou te rahiraa tauiraa i ravehia.
Teie tei faaotihia. I te 17 e te 18 no atete 1985: tairururaa haaati a te mau Ite a Iehova; i te 30 e te 31 no atete: mahana mataitairaa ïa na te mau taata no reira iho; i te 7 no setepa: avariraa no teie Piha tairururaa e 4 300 parahiraa; e i te 8 no setepa: te opereraa ïa i te mau parau tuite no te 79raa o te pupu haapiiraa no Gileada, te Haapiiraa Bibilia a te Taiete Watchtower.
E nehenehe atura ïa o Jersey City e teoteo no taua Piha tairururaa ra o tei riro ei hoê o te mau fare nehenehe roa ˈˈe i te Fenua Marite. Ua ite-faahou-hia mai to ˈna unauna matamua. Te faaohipahia râ i teie nei, no te hanahanaraa o te Arii Mana hope e Poiete o te ao taatoa nei, te Atua ra o Iehova.
[Tumu parau tarenihia i te api 30]
Te rata a te hoê taata taio no Jersey Journal
“Ua hau atu te mau Ite a Iehova i te 4000 i Jersey City. Mea oaoa roa ratou, ineine noa i te rave i te ohipa i raro aˈe i ta ratou iho mau faanahoraa. Te rave nei ratou paatoa i te ohipa ma te tamoni ore no te hoê tumu o ta ratou e tiaturi hohonu nei.
“I to ˈu iteraa e te haere noa ˈtura te mau ohipa i mua i roto i te fare teata Stanley, i Jersey City, taa ihora ia ˈu e e rave faaoti roa ratou i taua ohipa ra. Eita mau â e nehenehe e parau i te faufaaraa o ta ratou mau tiaturiraa.
“E riro mau â te fare teata Stanley ei fare unauna o te faahanahana ra i te hoê taviniraa taa ê mau, tei tupu mai na roto i te aau tae mau noa ˈtu te mau haafifiraa i ravehia. Te ite-mau-hia nei te hoê here tei varavara roa i to tatou nei tau miimii, e te au hoi i te mau mea materia e te manaˈo ino.
“E vai mau â te Piha tairururaa a te mau Ite a Iehova i Jersey City ei fare unauna mau. E riro oia ei teoteoraa no te oire.
“E mau faehau faaroo itoito ratou e te numera hoê, te hoê tiarama anaana mau i roto i teie ao pouri.
“E haapeu roa o Jersey City ia ratou. Mea faufaa roa ratou no Jersey City. [C. P., Jersey City]” — The Jersey Journal, 25 no tiurai 1985, api 21.
[Hohoˈa i te api 27]
Ua patahia teie mau hohoˈa i te hopea o te mau tatairaa. I te pae aui, te piha fariiraa taata.
I te pae atau, te piha rahi, ia hiˈohia mai na nia i te taupee.
[Hohoˈa i te api 28]
Te mau hohoˈa aamu Bibilia tei penihia e te mau kerisetiano e rave ra i te ohipa i te pu o te Taiete Watchtower tei mono atu i te mau hohoˈa o te mau aai o te tau tahito.
I nia aˈe, te paiuma ra o Ionadaba i nia i te pereoo o Iehu. I te pae atau, te mau puaahorofenua o te Apokalupo (Apokalupo pene 6).
[Hohoˈa i te api 29]
Te mau mori tautau, te mau hiˈo e te mau haamaramarama tei tataihia e te mau rave ohipa tamoni ore. Ua ravehia te hoê eˈa 15 metera no te tatai e no te peni-faahou-raa i te aroaro fare.