Te rahiraa mai te mau taviri mataˈi

Te ite-faahou-hia ra te mau taviri mataˈi i Kalifornia, i te mau fenua papamarô atea no Rusia e tae noa ˈtu i te poro no Apatoa. O ta te hoê vea holane i faaite na i roto i ta ˈna papai no nia i te tuatapaparaa i te haereraa o te mataˈi. Eaha te tumu? Ua riro te mataˈi ei pu ito rahi e te hoona hoi.

I Kalifornia, 300 kilometera i te pae apatoerau no Los Angeles, te vai ra te Tehachapi Valley Wind Park. Te vai ra e 50 taviri mataˈi. Ia faaotihia te hamaniraa, e noaahia e 13,5 mégawatts i te puai. I te pae hitia o te ra no San Francisco, e 44 taviri mataˈi no te hoê “fare mataˈi” o te horoa nei i te uira no e 400 utuafare fetii. Te titauhia e ia raeahia e rave rahi hanere mau taviri mataˈi, e noaahia ïa 30 mirioni kWh i te matahiti hoê, te hoê rahiraa uira navai no 4 800 utuafare fetii.

I te oire râ no Cycloon, i pihai iho ia Moscou, ua tamata to Rusia ma e 12 taviri mataˈi taa ê no te horoa mai i te uira aore ra te ito no te mau matini, e ito ïa no te mau fenua atea aore papamarô. Ia au i te haaparareraa Radio no Moscou, “e nehenehe taua mau ravea ra e faariro i te hoê fenua papamarô ei fenua ruperupe”.

E tuu-atoa-hia e maha taviri mataˈi ê atu i nia i te hoê fenua atea mau: Te poro no Apatoa. No reira ia pupuhi te mataˈi toetoe, e oaoa ïa te mau aivanaa e faaea ra i taua mau vahi ra. Na te uira no roto mai i taua mau taviri mataˈi ra e faatere i ta ratou mau matini e e haamaitai i to ratou faaearaa.