Samuela 1

SAULA I TE TONORAAHIA E SAMUELA E RAVE IA AMALEKA IA PAU.

15 Ua parau atura Samuela ia Saula, Ua tono mai Iehova ia ˈu e faatahinu ia oe ei arii i nia iho i to ˈna taata ia Iseraela ra, e teie nei, e faaroo oe i te parau a Iehova. 2 Te na ô maira Iehova sabaota ra, te manaˈo nei au i ta Amaleka i rave ia Iseraela nei, ta ˈna tamaˈiraa ia ˈna i te eˈatia ra, ia ˈna, mai Aiphiti maira. 3 E tena na, e haere e rave ia Amaleka, e ia pau roa te mau mea atoa na ratou ra, eiaha roa e faaherehere atu; e taparahi atoa ra i te tane, e te vahine, e te aiû aruaru ra, e te puaatoro, e te mamoe, e te kamela, e te asini. 4 Ua haaputuputu maira Saula i te mau taata i Telaima, e ua taio ihora, e piti hanereraa i te tausani i te taata, e e hoê ahururaa i te tausani no Iuda ïa. 5 E ua tae atura Saula i te hoê oire no Amaleka, e ua tiai maite ihora i raro i te peho ra.

6 Ua parau atura Saula i te ati Keni ra, E haere ê outou ia taa ê atu i te ati Amaleka nei, o te pohe atoa outou e ratou atoa ra ia ˈu: ua hamani maitai outou i te mau tamarii atoa a Iseraela a haere mai ai ratou mai Aiphiti maira. Haere ê atura te ati Keni mai roto mai i te Amaleka ra. 7 Taparahi atura Saula i te ati Amaleka mai Havila ˈtu e tae noa ˈtura i Sura i tiraha tia i Aiphiti ra. 8 E te arii o te ati Amaleka ra o Agaga i haru-ora-noa-hia ïa e ana; e ua taparahi pau roa ˈtura i te mau taata atoa i te ˈoˈe. 9 Ua faaora ˈtura ra Saula e te mau taata atoa ia Agaga, e te mau mamoe maitatai, e te puaatoro, e te mau opai rii maitatai, e te mau fanauˈa mamoe, e te mau mea maitatai atoa ra, aore ïa i haapau roa i te reira: o te mau mea iino râ ua rave faarue-roa-hia ïa e ratou.

10 Ua tae maira te parau a Iehova ia Samuela i reira, na ô maira, 11 Ua tatarahapa aˈenei au o vau i faaarii ia Saula: ua fariu ê hoi oia ia ˈu, e aita oia i rave i ta ˈu i faaue ia ˈna ra. Manaˈonaˈo aˈera Samuela i taua parau ra; e ua pure atura oia ia Iehova e ao noa aˈera te reira rui. 12 E tia aˈera Samuela i nia, e haere e farerei ia Saula i te poipoi roa, i faaitehia maira Samuela, i na ôhia mai, I haere mai Saula i Karemela, e inaha, ua faatia oia i te tahi tapao no ˈna iho, e mai reira hoi, fariu atura, haere atura i Gilagala. 13 Haere atura Samuela ia Saula ra; e ua parau maira Saula ia ˈna, Ia ora na oe ia Iehova! ua rave au i ta Iehova i faaue maira. 14 Ua na ô atura Samuela, Eaha ra hoi teie nei umeeraa mamoe, e teie nei otoraa puaatoro ta ˈu e faaroo nei? 15 Ua parau maira Saula, E mea ravehia mai e ratou no ǒ i te ati Amaleka; ua vaiiho hoi te mau taata nei i te mau mamoe maitatai e te mau puaatoro maitatai ra, ei tusia na to Atua ra na Iehova; e te tahi pae ra, ua pau roa ïa ia matou. 16 Ua parau atura Samuela ia Saula, E faaite atu vau ia oe i ta Iehova i parau mai ia ˈu i teie nei rui. Ua na ô maira oia ia ˈna, A parau mai. 17 Ua parau atura Samuela, E ere anei i to haehaaraa ra i to oe iho hiˈoraa, i faarirohia ˈi oe no nia iho i te mau opu o Iseraela nei? e aore anei Iehova i faatahinu ia oe ei arii i nia iho ia Iseraela? 18 e na Iehova i tono ia oe i to oe tere, e na ô maira ia oe, A haere a taparahi i tera ra mau rave hara i te ati Amaleka ra, e ia pau roa; a tamaˈi atu ai ia ratou e ia mou roa ˈtu ratou ra. 19 Eaha ihora hoi oe i ore i faaroo ai i te parau a Iehova, i tapae atu ai oe i nia i te taoˈa ra, e ua rave i te mea ino i mua i te aro o Iehova? 20 Ua parau maira Saula ia Samuela, Oia ïa, ua faaroo vau i te parau a Iehova, e ua haere au na te eˈa i tonohia ˈi au e Iehova ra, e ua aratai mai au i te arii o te ati Amaleka ra ia Agaga, e ua haamou roa i te ati Amaleka. 21 Ua rave râ te mau taata i te taoˈa, i te mamoe, e te mau puaatoro, e te mau taoˈa maitatai ra, i tei haapaohia e e haamou, ei tusia na to Atua ra na Iehova i Gilagala ra. 22 Ua parau atura Samuela, Tei te tusia taauahi e te mau tusia atoa to Iehova mauruuru, mai tei te faaroo i te parau a Iehova ra? inaha, e maitai rahi tei te haapao i tei te tusia, e maitai rahi tei te faaroo i tei te toâhua mamoe oni ra.

23 Ua faito atoa te faaroo ore i te hara a te hiˈohiˈo, e te mârô i te haamori idolo ra: e tena na, ua faarue oe i te parau a Iehova ra, ua faarue atoa Iehova ia oe eiaha oe ei arii.

24 Ua parau maira Saula ia Samuela, Ua hara vau, ua hahi ê au i te parau a Iehova, e te parau na oe ra: o vau i mǎtaˈu i te mau taata ra, e ua faaroo i ta ratou parau. 25 E teie nei, teie ta ˈu parau ia oe, e faaore mai oe i taua hara na ˈu nei, e hoˈi atoa tâua, ia haamori na vau ia Iehova. 26 Ua parau atura Samuela ia Saula, E ore au e hoˈi atoa i to oe na tere, ua faarue hoi oe i te parau a Iehova, e ua faarue Iehova ia oe eiaha oe ei arii i nia ia Iseraela ra. 27 E tei te fariuraa Samuela e haere ra, ua rave ihora oia i tana hiti ahu, e ua mahae taa ê maira. 28 Ua parau atura Samuela ia ˈna, Mai te reira te basileia ra o Iseraela ia oe ra, ua hahae-ê-hia mai e Iehova i teie nei mahana, e ua horoahia e ana i te hoê taata tupu i ǒ oe ra, e taata maitai ïa ia oe na. 29 E ore hoi te Puai o Iseraela e haavare, e ore hoi e tatarahapa; e ere hoi oia i te taata a tatarahapa ˈi oia. 30 Ua parau faahou maira Saula, Ua hara vau, teie râ ta ˈu parau ia oe, ia tura na vau ia oe i mua i te aro o te feia rarahi o tau mau taata nei, e i mua atoa ia Iseraela nei, e hoˈi atoa tâua ia haamori au i to Atua ra ia Iehova. 31 Ua hoˈi atoa ˈtura Samuela raua atoa o Saula; e ua haamori atura Saula ia Iehova.

32 Ua parau atura Samuela, Aratai mai outou i te arii o te ati Amaleka ia Agaga ia ˈu nei. Ua haere faaieie noa maira Agaga: ua na ô aˈera hoi Agaga, Ua ore aˈenei te riaria o te pohe. 33 Ua parau atura râ Samuela, Mai te mau vahine i faaerehia i te tamarii i te ˈoˈe na oe ra, oia atoa to metua vahine iho i roto i te mau vahine atoa ra, e ere atoa ïa i te tamarii. E ua tapǔpǔ ihora Samuela ia Agaga e motumotu taa ê atura i Gilagala, i mua i te aro o Iehova.

34 Ua hoˈi maira Samuela i Rama; haere atura hoi Saula i to ˈna ihora utuafare, i Gibea i ǒ Saula ra. 35 E aore roa Samuela i haere faahou mai e hiˈo ia Saula e tae noa ˈtura i te mahana i pohe ai oia ra: ua aroha râ Samuela ia Saula: ua tatarahapa ra Iehova i te mea ua faaarii oia ia Saula ei arii no Iseraela.