Korinetia 1

EIAHA TATOU E RAVE I TE MEA E MAHEAITU AI TE TAEAE.

8 Te parau i te mau mea i faatusiahia na te idolo ra, ua ite tatou tei ia tatou atoa hoi te ite. E teoteo ra tei te ite, area te aroha e faarahi ïa i te maitai. 2 Te manaˈo ra te hoê taata e, ua ite oia ra, aita roa oia i ite, i te ite au ia ˈna ra. 3 Te hinaaro ra râ te hoê taata i te Atua, oia te itehia mai e ana. 4 E teie nei, te parau i te amu i te mau mea i faatusiahia na te idolo ra, ua ite tatou e e mea faufaa ore te idolo i te ao nei, hoê roa hoi Atua aita ˈtu. 5 Vai noâ hoi te mau mea i parauhia e e atua, tei te raˈi ra, tei reira ïa; tei te fenua nei, tei reira ïa; (e rave rahi te atua, e rave rahi hoi te fatu mai te reira te huru.) 6 Area ia tatou nei hoê roa ïa Atua, o te Metua, no reira mai te mau mea atoa nei, e no ˈna hoi tatou; hoê hoi Fatu o Iesu Mesia, na ˈna te mau mea atoa nei, e na ˈna atoa hoi tatou. 7 Aita râ teie ite i paatoa i te taata atoa, te amu nei te tahi pae i te mau mea i faatusiahia na te idolo, ma te manaˈo i te idolo e e mea mau i teie nei â, e ua viivii to ratou aau i te itoito ore. 8 E ore hoi tatou e itehia mai e te Atua i te maa; e ore hoi tatou e hau i te maitai ia amu, e ore atoa hoi tatou e hau i te ino ia ore ia amu. 9 E ara râ i teie nei mea tia noa ia outou, o te riro noa ˈtu ei turoriraa no tei paruparu ra. 10 Ia hiˈo mai hoi te hoê taata ia oe i tei ite na, i te amuraa maa i roto i te hiero o te idolo ra, e ore anei e tae te aau o tei paruparu ra ia amu atoa i te tusia a te idolo ra? 11 Ia pohe anei taua taeae paruparu i pohe ai te Mesia ra, i to oe ite? 12 Ia hara râ outou i te mau taeae mai te reira ra, e putaputa ihora to ratou aau paruparu, ua hara ïa outou i te Mesia ra. 13 E teie nei, ia maheaitu tau taeae i te maa ra, e ore roa vau e amu i te puaa, oi maheaitu mai tau taeae ia ˈu.