Korinetia 1

E MEA TIA TE FAAIPOIPO EI FAAORE I TE FAATURI.

7 I te mau parau ta outou i papai mai ia ˈu nei, e mea maitai ïa i te taata nei eiaha e faaipoipo i te vahine. 2 Maori râ ei faaore i te taiata, ei vahine mau ta te tane, e ei tane mau hoi ta te vahine. 3 E horoa te tane i te mea tia i te vahine: e na reira atoa te vahine i te tane. 4 E ere hoi tei te vahine te parau i to ˈna iho tino, tei te tane râ; mai te reira to te tane, e ere tei ia ˈna te parau i to ˈna iho tino, tei te vahine râ. 5 Eiaha orua e faataa ia orua iho, maori râ e vahi poto aˈe ia tia ia orua; ia noaa ta orua haapaeraa maa e te pure; a tiaati faahou ai orua, ia ore Satani ia haavare mai ia orua no te tia ore ia orua ia faaoromai. 6 E aˈo râ teie na ˈu ta ˈu e parau nei, e ere i te mea i faauehia mai. 7 Te hinaaro nei au e mai ia ˈu atoa nei te huru o te taata atoa. O ta te Atua râ i horoa mai i te taata atoa ra, o ta ˈna ïa, e huru ê to te tahi, e huru ê hoi to te tahi.

8 Teie ta ˈu parau i te feia taa noa, e te mau ivi ra; e mea maitai ia ratou ia parahi noa mai ia ˈu atoa nei. 9 Ia ore râ ia tia ia ratou ra, a faaipoipo ratou: e mea maitai te faaipoipo i te amâ. 10 E te feia i faaipoipohia ra, teie ta ˈu parau, e ere râ ta ˈu, na te Fatu râ, Eiaha te vahine e faataa ê i tana tane. 11 Ia faataa ê râ oia ra, e parahi noa oia eiaha e faaipoipo, e e faite hoi oia i tana tane; e eiaha te tane e tuu ê atu i tana vahine.

12 Area te tahi pae ra, o vau teie e parau nei, e ere i te Fatu: e vahine faaroo ore ta te hoê taeae ra, e i tia i taua vahine ra ia parahi â ia ˈna ra, eiaha oia e tuu ê atu ia ˈna. 13 E e tane faaroo ore ta te hoê vahine ra, e i tia i taua tane ra ia parahi â ia ˈna ra, eiaha oia e tuu ê atu ia ˈna. 14 Ua moˈa hoi taua tane faaroo ore i te vahine ra, e ua moˈa te vahine faaroo ore i te tane; ahiri aita ra, ua noa ta outou tamarii, i teie nei râ, ua moˈa ïa, 15 Ia haere ê râ tei ore i faaroo ra, haere noa ˈtu ïa, e ore te taeae e te tuahine e fifi i te reira. Ua haapaohia râ tatou e te Atua, ei hau ta tatou. 16 Eaha hoi oe i ite ai, e tera ra vahine, e eita to tane e ora ia oe? e eaha hoi oe i ite ai, e tera tane, e eita to vahine e ora ia oe?

17 O ta te Atua râ i horoa i te taata atoa ra, to te taata atoa ra huru i te parauraahia e te Fatu ra, e na reira oia. O ta ˈu ïa parau i te mau ekalesia atoa ra. 18 I parauhia anei te hoê taata peritomehia? eiaha oia ia riro ei peritome ore. I parauhia anei te hoê taata peritome-ore-hia? eiaha oia ia peritomehia. 19 Aita o te peritome, aita hoi o te peritome ore, tei te haapao râ i te parau a te Atua. 20 Ia vai â te taata atoa ma te toroa i parauhia mai ai oia ra. 21 E tavini anei oe i parauhia ˈi ra? eiaha e haapao i te reira; ia noaa râ ia oe te tiamâ ra, o te reira. 22 O te tavini hoi i parauhia e te Fatu ra, o to te Fatu ïa taata tiamâ; oia atoa te taata tiamâ i parauhia ra, o te tavini ïa no te Mesia. 23 Ua tauihia outou i te taui; eiaha outou ia riro ei tavini no te taata. 24 E au mau taeae, ia vai â te taata atoa i mua i te aro o te Atua ma to ˈna huru i parauhia ˈi oia ra.

25 E teie nei, to te paretenia ra aita a ˈu parau no ǒ i te Fatu ra; e tuu atu râ vau i to ˈu manaˈo, i to te taata i noaa te aroha i te Fatu ra ia haapao i te parau mau. 26 Te manaˈo nei au, teie te mea maitai i teie nei tau ahoaho, oia ïa ia vai noa ˈtu â te taata i taua huru ra e maitai ai. 27 Ua taatihia oe i te vahine? eiaha e imi i te matara; ua matara oe i te vahine? eiaha e imi i te vahine. 28 Eita râ oe e hara ia faaipoipo ra, e ia faaipoipo hoi te paretenia ra aita a ˈna hara. E ati râ to te reira i te tino nei; e faaherehere râ vau ia outou. 29 Teie râ ta ˈu parau, e au mau taeae, te poto nei te taime: e au i te feia tara vahine ra, ia riro mai te mea e, aore; 30 e te feia i oto ra, mai te mea e, aore i oto; e te feia i oaoa ra, mai te mea e aore i oaoa; e te feia i hoo ra, mai te mea e, aita a ratou; 31 e te feia i rave i to teie nei ao ra, mai te mea e aore i rave; te mou nei hoi te huru o teie nei ao. 32 Te hinaaro nei râ vau, e eiaha to outou ei tapitapi. Te taata aore i faaipoipohia ra, te tapi ra ïa i ta te Fatu ra, i te mea e e mauruuru ai te Fatu ia ˈna: 33 area tei faaipoipohia ra; te tapi ra ïa i te mau mea o teie nei ao, i te mea e mauruuru ai tana vahine. 34 E huru ê atoa to te tara tane e te paretenia. Te vahine faaipoipo-ore-hia ra, te tapi ra ïa i ta te Fatu ra, ia maitai oia i te tino e te varua atoa; area te vahine i faaipoipohia ra, te tapi ra ïa i te mau mea o teie nei ao, i te mea e mauruuru ai tana ra tane. 35 Ia maitai outou i parau atu ai au i teie nei parau, e ere mai te mea e te titiri atu nei au i te marei i nia ia outou, no te mea râ e parau au, e ia haapao outou i ta te Fatu ra ma te peapea ore.

36 Te manaˈo ra râ te hoê taata e, te hapa ra ta ˈna parau i ta ˈna ra tamahine paretenia, ia paari ra oia ra, e e faaipoipo e tia ˈi, a rave oia i to ˈna hinaaro eita oia e hara, a faaipoipo ïa. 37 Te taata i itoito to ˈna aau, e e aau ia ˈna te ore, te tia ra ia ˈna i te tapea i to ˈna hinaaro, e ua manaˈo maite i roto i to ˈna aau, e e tapea oia i ta ˈna tamahine paretenia, e mea tia ïa. 38 E teie nei, o tei horoa ia faaipoipohia, e parau maitai ta ˈna; o tei ore râ i horoa ia faaipoipohia, e parau maitai roa ˈtu ta ˈna.

39 Ua tapeahia te vahine e te ture i te oraraa te tane ra; ia pohe râ tana tane, ua matara oia ia faaipoipo i ta ˈna i hinaaro ra: ia au râ i te Fatu. 40 E maitai rahi râ to ˈna i to ˈu nei manaˈo ia parahi noa oia, e tei ia ˈu atoa hoi te Varua o te Atua.