Korinetia 1

TE AˈO ATURA PAULO I TO KORINETIA IA PEE RATOU IA ˈNA, MAI IA ˈNA I PEE I TE MESIA RA.

11 Ei pee mai outou ia ˈu mai ia ˈu atoa e pee i te Mesia nei. 2 E teie nei, te haamaitai nei au ia outou, e au mau taeae, outou i manaˈo mai ia ˈu i te mau mea atoa nei, e te tapea na outou i te poroi ta ˈu i tuu atu ia outou na. 3 Teie râ to ˈu hinaaro, ia haapao outou, e o te Mesia te upoo o te taata atoa nei, e o to te vahine ra upoo, o te tane ïa, e o to te Mesia ra upoo, o te Atua ïa. 4 E te taata atoa e pure e e aˈo hoi ma te upoo tapoˈihia ra, ua faahaehaa ïa i to ˈna upoo. 5 O te vahine atoa ra e pure e e aˈo hoi ma te upoo tapoˈi-ore-hia ra, ua faahaehaa ïa i to ˈna upoo: hoê â hoi huru te reira, e te upoo vauhia ra. 6 Ia ore râ te vahine ia tapoˈihia, ia paoti-hua-hia maori tana upoo; e e mea haama ia paoti-hua-hia tana upoo, e ia vauhia, ia tapoˈihia maori oia. 7 E ore hoi e tia i te tane ia tapoˈi i te upoo, o te hohoˈa hoi oia e te haamaitai i te Atua; area te vahine, o te haamaitai ïa i te tane. 8 E ere hoi te tane no te vahine; no te tane râ te vahine. 9 Aore hoi te tane i hamanihia no te vahine; o te vahine râ tei hamanihia no te tane. 10 E teie nei, ei tapoˈi to te upoo o te vahine e tia ˈi, no te mau melahi. 11 Aita râ te tane i taa ê i te vahine, aita atoa te vahine i taa ê i te tane i te Fatu nei. 12 Mai te vahine hoi no roto i te tane ra, na te vahine atoa te tane; na te Atua râ te mau mea atoa nei. 13 E haamanaˈo iho na outou iho, e mea au anei ia pure te vahine i te Atua ma te tapoˈi ore? 14 E ore anei e itea-noa-hia ia outou iho, e e rouru roroa to te tane ra e mea haama ïa ia ˈna? 15 O te vahine râ ia maoro to ˈna rouru, e mea unauna ïa ia ˈna: no te mea i horoahia mai to ˈna rouru ei tapoˈi. 16 Ia hinaaro râ te hoê taata i te mârô, aita ïa peu ia matou nei, aita atoa i te mau ekalesia a te Atua ra.

17 Eita râ vau e haamaitai ia outou i teie ta ˈu e parau atu nei, outou ia haaputuputu ra aore i tupu te maitai, o te ino râ tei tupu. 18 Teie ra ta ˈu i ite aˈenei e ia putuputu outou i te ekalesia na, e amahamaha tei roto ia outou; e te huru faaroo nei au i taua parau ra. 19 E riro atoa hoi i te hairesihia i roto ia outou, ia itea te feia i itehia mai i roto ia outou na. 20 Ia haaputuputu outou i te vahi hoê ra, e ere ïa amuraa i te amuraa maa a te Fatu ra. 21 Ia amu hoi outou ra, te na mua ra te taata atoa i te rave i ta ˈna iho maa, e te poia ra te tahi, e ua î roa te tahi. 22 Eaha! aita o outou utuafare mau ia amu e ia inu hoi? e te vahavaha na anei outou i te ekalesia o te Atua, e ia haama te feia aore a ratou ra? E nahea ˈtu vau ia outou? e haamaitai atu anei au ia outou i te reira? E ore au e haamaitai.

23 I noaa hoi ia ˈu i te Fatu ra ta ˈu i tuu atoa ˈtu ia outou na, e ua rave te Fatu ra o Iesu i te pane i te rui i haavarehia mai ai oia ra: 24 e oti aˈera ia ˈna te haamaitai i te Atua, vavahi ihora, na ô atura, A rave mai, a amu; o tau tino teie e ofatihia no outou nei; e na reira outou ei manaˈoraa ia ˈu. 25 E ua na reira atoa hoi i te auˈa, ia oti aˈe tana amuraa, na ô atura, Teie nei auˈa, o te faufaa apî ïa i to ˈu nei toto, e na reira outou ia inu ei manaˈoraa ia ˈu. 26 Ua amu anaˈe outou i teie nei pane, e ua inu anaˈe i teie nei auˈa, ua faaite â ïa outou i te pohe o te Fatu, e tae noa mai oia ra. 27 E teie nei, o te amu i teie nei pane e o te inu i te auˈa a te Fatu nei ma te au ore ra, e hara ïa i te tino e te toto o te Fatu. 28 E hiˈopoa maite râ te taata ia ˈna iho, a amu ai oia i taua pane ra, a inu ai i taua auˈa ra. 29 O tei amu hoi e o tei inu ma te au ore ra, ua amu ïa e ua inu i te pohe no ˈna iho, oia aore i hiˈo i te tino o te Fatu ra. 30 No reira i rahi ai te pohe maˈi e te paruparu i roto ia outou na, e i taoto ai hoi e tahi pae. 31 Ahiri hoi tatou e hiˈopoa ia tatou ihora, eita tatou e hiˈopoahia mai. 32 Ia hiˈopoahia mai râ tatou, ua aˈohia mai tatou e te Fatu, ia ore tatou ia faahapa-atoa-hia e to te ao atoa nei.

33 E teie nei, e au mau taeae, ia haaputuputu outou e amu i te oroa ra, e tiai maite te tahi i te tahi. 34 E ia poia te taata ra, e amu ïa i te maa i te utuafare mau ra; ia ore to outou haaputuputuraa ia riro ei pohe no outou. E o te mau mea toe ra, na ˈu ïa e faatitiaifaro ia tae atu vau.