Korinetia 1
UA FAARIROHIA ISERAELA EI HIˈORAA, E EI AˈO MAI IA TATOU.
10 Aore hoi au i hinaaro, e au mau taeae e, ia ore outou ia ite e, i raro anaˈe aˈe to tatou hui metua i te ata, e ua haere paatoa na raro i te tai. 2 E i bapetizo-anaˈe-hia ia Mose i roto i te ata, e i raro hoi i te tai. 3 E ua amu ratou atoa i taua maa tapao hoê ra, e ua inu ratou atoa i taua pape tapao hoê ra. 4 (Ua inu hoi ratou i te pape no roto i taua mato tapao i pee mai ia ratou ra; e taua mato ra o te Mesia ïa.) 5 Aita râ te Atua i mauruuru i te rahi o ratou ra: pohe ihora hoi ratou i te medebara ra.
6 Ua riro hoi taua mau mea ra ei hiˈoraa na tatou, ia ore tatou ia nounou i te mau mea iino ra, mai ia ratou i nounou ra. 7 Eiaha atoa outou ei haamori idolo, mai te hoê pae o ratou ra; oia hoi tei papaihia ra e, I parahi te mau taata i raro e amu e e inu hoi, e tia aˈera i nia e upa. 8 E eiaha atoa tatou e faaturi mai te hoê pae o ratou i faaturi ra, e pohe ihora e piti ahuru e toru tiahapa i te tausani i te mahana hoê ra. 9 Eiaha atoa tatou e aa ˈtu i te Mesia, mai te hoê pae o ratou i aa ra, e pohe ihora i te ophi. 10 Eiaha atoa outou e ohumu, mai te hoê pae o ratou i te ohumu ra, e pau ihora i te pohe i taua taparahi ra. 11 Roohia ihora ratou e taua mau mea ra ei hiˈoraa, e ei aˈo mai hoi ia tatou, i te feia i roohia mai i te hopea o te mau tau nei, i papaihia ˈi. 12 E teie nei, o tei manaˈo e te tia ra oia, e ara oia o te hiˈa. 13 Aita outou i roohia e te ati maori râ mai ta te taata nei â; e parau mau ta te Atua e ore oia e vaiiho noa ia outou ia ati, maori râ o te tia ia outou ia faaoromai ra; e faatupu atoa oia i te haapuraa i taua ati ra, ia tia ia outou ia faaoromai.
14 E teie nei, e au mau here e, e maue ê atu i te haamori idolo. 15 Te parau atu nei au i te taata paari, e feruri maitai na outou i ta ˈu nei parau. 16 Te auˈa no te maitai ta tatou e haamaitai nei, e ere anei i te amui-atoa-raa i te toto o te Mesia ra? Te pane ta tatou e ofene nei, e ere anei i te amuiraa i te tino o te Mesia ra? 17 No te mea hoê â pane, tatou atoa e rave rahi nei hoê â ïa tino; te amu atoa nei hoi tatou i taua pane hoê ra. 18 Inaha hoi Iseraela i te haapaoraa i te tino nei, e ere anei te feia i amu i te tusia i te feia i rave atoa i to te fata ra? 19 E teie nei, te parau nei anei au e mea mau te idolo? e e mea mau te tusia a te idolo ra? 20 Aore, teie râ ta ˈu parau, ta te Etene i faatusia ra, i faatusia ïa na te mau demoni, e ere na te Atua: aore hoi au i hinaaro e ia amui atoa outou i te haamori demoni ra. 21 Eita e tia ia outou ia inu i te auˈa a te Fatu ra, e te auˈa a te mau demoni: eita e tia ia outou ia amu i te amuraa a te Fatu ra, e te amuraa a te mau demoni. 22 Te faaooo nei tatou i te Fatu ia riri? e puai rahi anei to tatou i to ˈna?
23 e tia te mau mea atoa ia ˈu, eita râ e au paatoa ia rave; e mea tia anaˈe ïa ia ˈu, eita râ te mau mea atoa e faarahi i te maitai. 24 Eiaha roa ei taata e imi i to ˈna anaˈe iho maitai, e imi râ te taata atoa i te maitai o vetahi ê atoa. 25 O tei hoohia i te hooraa ra, e amu ïa, eiaha roa e uiui i te manaˈo aau ra: 26 no te Fatu hoi te fenua, e te mau mea atoa i roto ra. 27 E ia parau mai te hoê o te feia faaroo ore ra ia outou, e hinaaro outou i te haere; e amu i tei tuuhia mai i mua i to outou aro ra eiaha e uiui i te manaˈo aau ra. 28 I parau mai râ te hoê taata ia outou e, E tusia teie na te idolo; eiaha e amu, i taua taata hoi i faaite maira, e te manaˈo aau hoi: no te Fatu hoi te fenua, e te mau mea atoa i roto ra. 29 E ere i to oe aau ta ˈu e parau nei, o to te tahi ê râ; eaha hoi te mea i tia ia ˈu nei i faahapahia ˈi e to vetahi ê ra aau? 30 Ua tia ia ˈu te amu o vau i arohahia mai, eaha hoi au i parau-ino-hia ˈi i te mea ta ˈu i haamaitai i te Atua nei? 31 E teie nei, te amu ra e te inu ra hoi, e te mau mea atoa ta outou e rave na, e rave ïa ma te haamaitai i te Atua. 32 Eiaha outou ei turoriraa, i te ati Iuda, e te Heleni, e te ekalesia atoa a te Atua. 33 Mai ia ˈu atoa e haamauruuru i te taata atoa i te mau mea atoa nei, aore au i imi i te maitai no ˈu iho, no te taata atoa râ e rave rahi, ia ora ratou.