Luka

TO TE MESIA HAAVARERAAHIA, E TE MAMURAA O TE DIABOLO IA ˈNA.

4 Ua hoˈi maira Iesu mai Ioridana mai, ma te î i te Varua Maitai, e arataihia ˈtura e te Varua i te medebara, 2 e e piti taau aˈera mahana totovahia ihora oia e te diabolo. Aore â oia i amu i te maa i taua na mahana ra; e hope aˈera, poia ihora oia. 3 Ua parau maira te diabolo ia ˈna, E tamaiti oe na te Atua ra, a parau oe i teie nei ofai ia riro ei pane. 4 Ua parau atura Iesu ia ˈna, na ô atura, Ua papaihia, E ore te taata e ora i te pane anaˈe ra, i te mau mea atoa râ i haapaohia e te Atua. 5 Ua aratai atura te diabolo ia ˈna i nia i te hoê mouˈa teitei, e ua faaite maira ia ˈna i reira ra i te mau basileia atoa o te ao nei. 6 Ua parau maira te diabolo ia ˈna, E horoa ˈtu vau i te hau, e te hinuhinu i teie nei mau fenua ia oe, ua pûpûhia mai hoi teie ia ˈu, e na ˈu e horoa ˈtu na ta ˈu taata i hinaaro. 7 E teie nei, ia tia ia oe i te tahopu mai ia ˈu nei, na oe anaˈe ïa. 8 Ua parau atura Iesu, na ô atura, E haere ê atu oe, e Satani, ua papaihia e, O te Fatu ra o te Atua ta oe e tahopu, e oia anaˈe ra ta oe e haamori. 9 Ua aratai atura ia ˈna i Ierusalema, e ua tuu atura ia ˈna i nia iho i te poretiko o te hiero, ua parau atura ia ˈna, E tamaiti oe na te Atua ra, e haamairi oe ia oe iho i raro i teie nei vahi; 10 ua oti hoi i te papaihia e, E poroi oia i tana mau melahi ia oe, e tiai ia oe; 11 e na ratou e mau ia oe i to ratou rima, oi tiaia noa ˈtu to avae i te ofai. 12 Ua parau atura Iesu ia ˈna, na ô atura, Ua parauhia mai e, Eiaha oe e aa ˈtu i to Atua ia Iehova. 13 E hope aˈera ta te diabolo totoaraa, haere iti ê atura oia, faarue maira ia ˈna.

14 Ua hoˈi maira Iesu i Galilea ma te mana o te Varua, tui atura to ˈna roo e ati noa ˈˈe taua fenua ra. 15 Haapii atura oia i roto i to ratou mau sunago, ma te haamaitai-paatoa-hia.

16 E tae maira oia i Nazareta i te vahi i paari ai oia ra, ua tomo maira oia i roto i te sunago i te sabati, o ta ˈna â ïa peu, e ua tia aˈera i nia e taio i te parau. 17 Ua tuu maira ratou i te buka a te peropheta ra a Isaia i tana rima, e ia hohora aˈera oia i taua buka ra ite ihora oia i te vahi i papaihia ra e, 18 Tei nia iho ia ˈu te Varua o te Fatu, oia i faatahinu mai ia ˈu ei poro haere i te parau maitai i te taata rii, ua tono mai oia ia ˈu ei faaora i te feia aau oto, ei poro haere i te ora no te tîtî, e ia hiˈo faahou te matapo, e ei tuu hoi i te feia i paruparu, 19 ei poro haere i te matahiti e itehia mai ai e te Fatu ra. 20 E otaro aˈera i taua buka ra, ua tuu atura i te tavini ra, parahi ihora i raro. Ua tiatonu maira te mata o to te sunago atoa ia ˈna. 21 Ua parau atura oia ia ratou, Teie nei parau i papaihia ta outou i faaroo iho nei, ua tupu ïa i teie nei mahana. 22 Ua faatia anaˈe ihora ratou atoa ia ˈna, maere ihora i te mau parau maitatai rahi ta ˈna i parau maira, ua parau ihora ratou, E ere anei teie i te tamaiti a Iosepha ra? 23 Ua parau atura oia ia ratou, E riro outou i te faaau mai ia ˈu i te maa parau ra e, E te tahuˈa ra, a faaora ia oe iho: te ohipa ta oe i rave i Kaperenaumi ra ta matou i faaroo aˈenei, e rave atoa i ǒ nei, i to oe nei fenua. 24 Ua na ô atura hoi oia, Amene e parau atu vau ia outou, Aita e peropheta i itehia mai i to ˈna iho fenua mau. 25 E parau mau râ teie ta ˈu e parau atu ia outou nei, e rave rahi te vahine ivi i Iseraela i te anotau ia Elia, a opanihia ˈi te raˈi ra, e e toru matahiti e ono hoi marama ati paatoa aˈera taua fenua ra i te oˈe rahi. 26 Aore râ Elia i tonohia ˈtu ia ratou atoa ra, maori râ i te hoê vahine ivi i Sarepeta i Sidona. 27 E rave rahi hoi te lepera i Iseraela i te anotau i te peropheta ra ia Elisaia, aita râ te hoê o ratou i faaorahia maori râ o Naamana i Suria ra. 28 Tei te faarooraa ratou i taua parau nei, riri roa aˈera to te sunago atoa, 29 ua tia aˈera ratou i nia, hopara ˈtura ia ˈna i rapae i taua oire ra, aratai atura ia ˈna i te hiti o te mouˈa i tiahia i to ratou oire ra, e faataa ia ˈna i raro. 30 Haere ê atura râ oia, na rotopu noa ˈtura ia ratou i te haere.

31 E tae atura oia i Kaperenaumi i te hoê oire i Galilea, haapii atura ia ratou i te sabati. 32 Umere maira ratou i tana haapiiraa, te mana ra hoi ta ˈna parau. 33 Tei roto i taua sunago ra te hoê taata e varua demoni faufau to ˈna, ua pii hua maira oia, 34 na ô maira, Auê, e Iesu i Nazareta e! eaha ta oe ia matou nei? i haere mai anei oe e taparahi ia matou? Ua ite au ia oe, te Mea Moˈa o te Atua ra. 35 Ua avau atura Iesu ia ˈna, na ô atura, A mamû, a haere i rapae. Ua taora ihora taua demoni ra ia ˈna i raro i ropu i te taata atoa, haere atura i rapae, aore oia i paruparu. 36 Maere anaˈe ihora ratou atoa, e ua na ô aˈera ratou ratou iho, Eaha ra teie? te faaue nei hoi oia i te mau varua faufau nei ma te mana, e te haere nei ratou i rapae? 37 Tui atura to ˈna roo e ati noa aˈera taua fenua ra.

38 E reva ˈtura oia i rapae i taua sunago ra, tomo atura i roto i te fare o Simona, ua pohe ihora te metua hoovai vahine o Simona i te fevera rahi, ua parau maitai maira ratou ia ˈna i taua vahine ra. 39 Tia ihora Iesu i pihai iho ia ˈna, ua avau atura i te fevera; pee ê atura, ua tia maira oia i reira ra haapurupuru maira ia ratou.

40 E mairi atura te mahana, e maˈi tei ǒ ratou ra, ua hopoi ïa ia ˈna ra e rave rahi te huru, ua tuu atura oia i tana rima i nia iho ia ratou atoa, faaora ˈtura. 41 E te demoni atoa i te haereraa i rapae i te taata e rave rahi, ma te pii hua e, O te Mesia oe te Tamaiti a te Atua. Ua avau atura râ oia ia ratou, eiaha ratou e parau, e ua ite ratou e o te Mesia oia.

42 E ao aˈera haapai atura oia i te hoê vahi moemoe, e ua imi maira taua feia rahi atoa ra ia ˈna, ua haere maira, e ua tapea maira ia ˈna, eiaha oe e faarue ia ratou. 43 Ua parau atura râ oia ia ratou, E parau haere â vau i te parau maitai o te basileia o te Atua i te mau oire ê atu â e tia ˈi, i tonohia mai ai hoi au. 44 Ua aˈo atura hoi oia i roto i te mau sunago i Galilea ra.