Mareko

TE Ô VINE I TE TARAHURAAHIA I TE TAATA HAAPAO ORE RA.

12 Ua parau parabole atura oia ia ratou, na ô atura, Ua aua ihora te hoê taata i te aua vine, e tanu ihora, ua ô ihora i te neneiraa vine, faatia ihora i te fare tiairaa, tuu atura i te tiai, haere atura i te tahi fenua ê. 2 E tae aˈera i te tau mau ra, ua tono maira i te hoê tavini i te tiai ô vine ra ia rave mai i te maa i taua ô vine ra. 3 Ua haru atura râ ratou ia ˈna, papai ihora, faahoˈi atura ia ˈna ma te faufaa ore. 4 Ua tono faahou maira oia i te tahi tavini â ia ratou ra, ua pehi atura ratou ia ˈna i te ofai e paruparu ihora te upoo, faahoˈi atura ia ˈna ma te rave-ino-rahi-hia. 5 Ua tono faahou maira oia i te tahi, e ua taparahi pohe roa ratou i te reira; e rave rahi â hoi ta ˈna i tono, e ua papai ratou i te tahi pae, e ua taparahi pohe roa ia vetahi. 6 E te hopea ihora te toe ra ta ˈna tamaiti otahi, e here na ˈna; ua tono atoa maira oia ia ˈna ia ratou ra; na ô aˈera hoi oia, E riro ratou i te faatura mai i tau tamaiti. 7 Ua parau râ taua mau tiai ra ratou ratou iho, O te taata aiˈa teie, tatou e taparahi ia ˈna, e e riro mai ïa te fenua no tatou iho. 8 Ua rave atura ratou ia ˈna, taparahi pohe roa ihora, faarue atura i rapae i taua ô vine ra. 9 Eaha maira te fatu na ˈna taua ô vine ra? e riro oia i te tii mai e taparahi pohe roa i taua mau tiai ra, a tuu atu ai i te ô vine ia vetahi ê. 10 Aore â outou i taio i te parau i papaihia ra e, Te ofai i faaruehia e te feia patu fare ra, ua riro ïa ei ofai tihi: 11 na te Fatu te reira i rave e te hiˈo nei tatou ma te umere? 12 Hinaaro atura ratou e haru ia ˈna, te mǎtaˈu ra râ ratou i te taata; ua ite hoi ratou e no ratou te parabole ta ˈna i parau ra: vaiiho atura ia ˈna, haere atura.

13 Ua tono maira ratou i e toofanu mau Pharisea e to te pǔpǔ o Heroda ia ˈna ra, ei râmâ ˈtu ia ˈna i ta ˈna ra parau. 14 E tae maira ratou, ua na ô maira ia ˈna, E te orometua e, ua ite matou e, e taata parau-tia oe, e aore o oe mǎtaˈu i te taata; e ore hoi oe e haapao noa ˈtu i te huru o te taata; te haapii nei râ oe i te parau a te Atua ma te haavare ore. E au anei i te ture ia hopoi i te taoˈa aufau na Kaisara, e e ore anei? 15 E hopoi anei matou? e eiaha anei? Te ite ra râ oia i ta ratou haavare, e ua parau atura ia ratou, Eaha outou i râmâ mai ai ia ˈu? a hopoi mai i te hoê moni veo ia ite atu vau. 16 Ua hopoi maira ratou i te hoê moni veo, ua ui atura oia ia ratou, No vai teie nei hohoˈa e teie nei parau? Ua na ô maira ratou ia ˈna, No Kaisara. 17 Ua parau atura Iesu ia ratou, na ô atura, E tuu atu i ta Kaisara ra ia Kaisara, e ta te Atua ra, e tuu atu ïa i te Atua. Ua maere ihora ratou ia ˈna.

18 Ua haere maira te mau Sadukea ia ˈna ra, o tei parau ra e, Aita e tia-faahou-raa; ua ui maira ratou ia ˈna, na ô maira, 19 E te orometua, i tuu mai Mose i te parau ia matou, e ia pohe te tuaana o te hoê taata, te ora ra tana vahine aore e tamarii, e faaipoipo te taeae i tana vahine ra, e faafanautama ˈi i te tamarii na tana tuaana. 20 Toohitu hoi tamarii tamaroa i te hoê fetii; e faaipoipo ihora te matahiapo i te vahine, e pohe atura ma te tamarii ore. 21 Ua faaipoipo ihora hoi te toopiti ia ˈna, e pohe atura, aore atoa a ˈna e tamarii: ua na reira atoa hoi te tootoru. 22 E ua faaipoipo ratou atoa toohitu ia ˈna, e aore â e tamarii. E te hopea ihora, pohe atoa ˈtura taua vahine ra 23 E ia tae i te tia-faahou-raa ra, ia tia mai ratou ra, e riro oia ei vahine na vai i taua toohitu ra, e vahine hoi oia na ratou atoa? 24 Ua parau atura Iesu ia ratou, na ô atura, E ere anei teie i te mea i hape ai outou, o to outou ite ore i te parau i papaihia ra, e te mana o te Atua? 25 Ia tia faahou hoi te taata mai te pohe maira, e ore ïa e faaipoipo, e ore hoi e horoa e faaipoipo; e au râ ratou i reira i te mau melahi o te ao ra. 26 Area te ora-faahou-raa o tei pohe ra, aitâ outou i taio i roto i te buka a Mose, e i parau mai te Atua ia ˈna i roto i te pu aihere ra e, O vau te Atua no Aberahama, e te Atua no Isaaka, e te Atua hoi no Iakoba? 27 E ere te Atua i te Atua no te feia pohe, no te feia ora râ: e teie nei, hape rahi to outou.

28 Ua haere maira te hoê papai parau i pihai iho, i faaroo na i ta ratou paraparauraa, e ite aˈera hoi i te tia o ta ˈna parauraa ˈtu ia ratou, ua ui maira ia ˈna, Teihea na te parau rahi o te ture ra? 29 Ua parau atura Iesu ia ˈna, Teie te parau rahi o te Ture ra, E faaroo mai, e Iseraela e; O Iehova to tatou Atua, hoê hoi Iehova. 30 E e hinaaro oe i to Atua ia Iehova ma to aau atoa, e ma to varua atoa, e ma to manaˈo atoa, e ma to puai atoa; o te parau teie i hau i mua. 31 E mai te reira atoa hoi te piti, E aroha ˈtu oe i to taata-tupu mai to aroha ia oe iho na. Aita ˈtu â parau e hau i te reira. 32 Ua parau maira taua mau papai parau ia ˈna ra, Oia mau, e te orometua, e parau-tia ta oe i parau mai nei; hoê roa hoi Atua e aita ˈtu oia anaˈe ra. 33 E te hinaaro atu ia ˈna ma te aau atoa, e ma te ite atoa, e ma te varua atoa, e ma te puai atoa, e te aroha i te taata-tupu mai to ˈna aroha ia ˈna iho, e rahi ïa i tei hopoihia ia pau taatoa i te auahi, e te mau tusia atoa ra. 34 E ite aˈera Iesu e, e parau-tia ta ˈna i parau maira, ua parau atura oia ia ˈna, Aore oe i atea ê atu i te basileia o te Atua ra. E aita roa ˈtu e taata i ui faahou i te ui ia ˈna mai reira mai â.

35 Ua parau atura Iesu ia ratou ia ˈna i haapii i roto i te hiero ra, na ô atura, Eaha te mau papai parau i parau ai e, e riro te Mesia ei tamaiti na Davida? 36 O Davida iho hoi tei parau ma te Varua Maitai ra e, Ua parau atura Iehova i ta ˈu Fatu, E parahi oe i tau rima atau nei, e ia faariro vau i to mau enemi ei taahiraa avae no oe. 37 E teie nei, o Davida iho tei parau ia ˈna e, e Fatu no ˈna, eaha ra hoi oia e riro ai ei tamaiti na ˈna? Te faaroo ra te taata rii ia ˈna ma te popou.

38 Ua parau atura oia ia ratou i te haapiiraa ra, E ara i te mau papai parau i hinaaro i te ahu faapereue a hahaere ai, e ia arohahia i te vahi taata, 39 e te parahiraa maitatai i roto i te mau sunago ra, e te vahi teitei i te amuraa maa ra; 40 o tei rave pau roa i ta te fetii o te mau vahine ivi ra, e te haamaoro i te pure ei tapoˈi; e pohe rahi roa ˈtu ïa to ratou.

41 E te parahi ra Iesu i mua iho i te piha vairaa taoˈa ra, hiˈo atura i te taata i te tuuraa i te moni i roto i taua vairaa ra; e rave rahi te feia taoˈa i tuu i te moni rahi i roto. 42 Ua haere maira te hoê vahine taoˈa ore, e ivi, ua tuu maira i e piti lepeta i roto, oia te koderane hoê ra. 43 Ua parau atura Iesu i ta ˈna mau pǐpǐ, na ô atura ia ratou, Oia mau ta ˈu e parau atu ia outou nei, E rahi ta teie nei vahine ivi taoˈa ore i tuu i roto i te pueraa taoˈa nei i ta ratou atoa: 44 e tiahapa hoi no ta ratou taoˈa rahi ta ratou i tuu i roto, area oia ua hope roa a ˈna taoˈa rii navai ore i te tuuhia e ana i roto.