Mareko

TO TE MESIA TOMORAA I ROTO I IERUSALEMA MA TE HAAMAITAI.

11 E fatata maira Ierusalema ia ratou, tae atura i Betephage e Betania i te mouˈa ra i Oliveta, ua tono aˈera oia i e toopiti pue pǐpǐ a ˈna ra, 2 na ô atura ia raua, A haere na orua i tera aˈera oire iti, e ia tomo orua i roto ra, e ite orua i te hoê pinia asini, ua fetiihia, aore â i parahihia e te taata; e tatara e putô mai i ǒ nei. 3 E ia parau noa mai te hoê taata ia orua, Eaha orua i rave ai? e parau atu, No te Fatu teie e tia ˈi, e na ˈna ïa e tuu noa mai i reira ra. 4 Haere atura raua e ite atura i taua pinia asini ra, te fetiihia ra i rapae au mai i te pae uputa, i te tiaatiraa i na eˈatia e piti ra, ua tatara iho ra raua. 5 Ua na ô maira te hoê pae o te feia i tia noa i pihai iho ra, Eaha orua e tatara ˈi i tena na pinia? 6 Ua parau atura raua ia ratou i ta Iesu i parau mai ia raua ra; ua tuu noa maira ratou ia raua ia rave noa na. 7 Ua putô maira raua i taua pinia ra ia Iesu ra, tuu atura i to raua ahu i nia iho, parahi ihora oia i nia iho. 8 E e rave rahi tei hohora i to ratou ahu i te eˈatia; ooti atura hoi e tahi pae i te amaa rii raau, vauvau atura i te aratia. 9 E ua umere ihora te feia i haere na mua e tei pee mai i muri iho, na ô aˈera, Hosana; ia ora oia tei haere mai ma te iˈoa o te Fatu. 10 Ia maitai te basileia o to tatou metua ra o Davida e fatata mai nei ma te iˈoa o te Fatu ra: Hosana i te raˈi teitei ra. 11 I na reira Iesu i te tomo i roto i Ierusalema e i roto i te hiero; e hope aˈera te mau mea atoa e ati noa ˈˈe i te hiˈohia e ana, e no te mea ua ahiahi, haere ê atura oia e te tino ahuru ma piti atoa i Betania.

12 E ao aˈera, te hoˈi maira ratou mai Betania mai, porori ihora oia; 13 hiˈo atura oia i te hoê suke i te atea ê ua rauhia, haere atura e hiˈo i te maa i nia iho; e tae atura oia i pihai iho, aore roa e maa i itea e te rau anaˈe ra aita hoi i tae i te tau e para ˈi te suke ra. 14 Ua parau atura Iesu i taua suke ra, na ô atura, Eiaha roa ei taata e amu faahou i te maa no nia ia oe i teie nei. Te faaroo atura hoi ta ˈna mau pǐpǐ.

15 E tae maira ratou i Ierusalema: tomo atura Iesu i roto i te hiero, ua tiahi atura i te feia i hoo atu e i te feia i hoo mai i roto i te hiero ra i rapae, faatiopa ˈtura hoi i te mau iri a te feia hoo moni ra, e te mau parahiraa o te feia hoo uuairao ra; 16 e aore roa i tuu i te taata ia hopoi i te farii taoˈa na roto i te hiero ra. 17 E ua haapii atura hoi oia ia ratou, na ô atura, E ere anei ua papaihia, E parauhia to ˈu nei fare e fare pureraa no te mau fenua atoa, riro noa iho nei râ ia outou ei ana eiâ. 18 E ite aˈera te mau papai parau e te feia tahuˈa rarahi, ua imi ihora i te ravea e pohe ai oia; te mǎtaˈu ra hoi ratou ia ˈna, no te mea te maere anaˈe ra te taata atoa i ta ˈna parau. 19 E ahiahi ihora, haere atura oia i rapae au i taua oire ra.

20 E ao aˈera ia hoˈi ratou ra, hiˈo atura ratou i taua suke ra ua maehe roa ma te tumu atoa. 21 Ua manaˈo aˈera Petero, ua na ô atura ia ˈna, E Rabi, inaha te suke ta oe i faaino ra, ua maehe roa. 22 Ua parau maira Iesu ia ratou, na ô maira, Ei faaroo to outou i te Atua. 23 Oia mau teie ta ˈu e parau atu ia outou nei, O te taata e parau noa ˈtu i teie nei mouˈa, Ia pee oe e ia tiria oe i raro i te tai; e aore roa i feaapiti to ˈna aau, te manaˈo mau ra râ i ta ˈna e parau ra e tupu ïa, e roaa ïa ia ˈna ta ˈna e parau ra. 24 E teie nei, e faaite hua ˈtu vau ia outou, Te mau mea atoa ta outou e ani ia pure ra, a manaˈo ai, e noaa taua mau mea ra, e noaa ïa ia outou. 25 E ia tia outou i nia e pure, e e hapa ta outou ia vetahi ê ra, a faaore atu; ia faaore atoa mai to outou Metua i te ao ra i ta outou hapa. 26 Ia ore râ outou ia faaore i te hapa, e ore atoa to outou Metua i te ao ra e faaore mai i ta outou hapa.

27 E tae faahou atura ratou i Ierusalema; e te hahaere noa ra oia i roto i te hiero, ua haere maira te mau tahuˈa rarahi, e te mau papai parau, e te feia paari, 28 Ua na ô maira ia ˈna, O vai te tumu i rave ai oe i teie nei mau mea? e na vai i tuu mai i te mana ia oe ei rave i taua mau mea nei? 29 Ua parau atura Iesu ia ratou, na ô atura, E ui atoa ˈtu vau ia outou i ta ˈu nei ui; e e faaite mai outou ia ˈu, a faaite atu ai au ia outou i te tumu i rave ai au i taua mau mea nei. 30 O te bapetizo a Ioane nei, no te raˈi mai anei e na te taata anei? a faaite mai ia ˈu. 31 Ua feruri ihora ratou ratou iho, na ô aˈera, Ia parau atu tatou e, No te raˈi mai, e riro oia i te parau mai e, Eaha ihora outou i ore i faaroo atu ai ia ˈna? 32 Ia parau râ tatou e, Na te taata, te mǎtaˈu ra ratou i te taata ua ite paatoa hoi ratou e, e peropheta mau â Ioane. 33 Ua parau maira ratou ia Iesu, na ô maira, Aita matou i ite. Ua parau atura Iesu ia ratou, na ô atura, Eita atoa vau e faaite atu ia outou i te tumu i rave ai au i taua mau mea nei.