Hosea

TE FAAITE NEI TE ATUA I TE POHE I TE HAAMORI IDOLO.

8 A taati na i te pu i to vaha na. E tae mai te enemi mai te aeto i te fare o Iehova, no te mea ua hapa ratou i te faufaa na ˈu nei, e ua piˈo ê ratou i ta ˈu nei ture. 2 E riro Iseraela i te pii mai ia ˈu nei, E tau Atua e, ua ite matou ia oe. 3 Ua faarue Iseraela i to ˈna iho maitai ra; e teie nei, e auau mai te enemi ia ˈna. 4 Ua faaarii ratou i te mau arii, e ere râ vau, e ua faatavana ratou i te mau tavana, aita râ i tia ia ˈu: ua hamani ratou i ta ratou ario e te auro ei idolo, ia faataa-ê-hia ratou. 5 Ua faarue ta oe kafa, e Samaria, ia oe; ua tupu tau riri ia ratou: ahea ra ratou e ore ai i te rave i te hara? 6 Na Iseraela hoi taua mea ra: na te tahuˈa i hamani, e ere te Atua: e parari roa te kafa a Samaria. 7 Ua ueue ratou i te mataˈi e ua ooti i te puahiohio: aore o te reira e tumu; e ore hoi e maahia ia tupu: peneiaˈe o te tupu ra, na te taata ěê ïa e horomii. 8 Ua horomiihia Iseraela: e riro ratou i roto i te mau fenua nei mai te farii aore roa i auhia ˈtu. 9 Ua reva hoi ratou i Asura; mai te asini oviri i moemoe ra, ua tarahu Epheraima i te feia e hinaaro mai. 10 No te mea râ ua tarahu ratou i ǒ te etene ra, e haaputuputu vau ia ratou i teie nei, e ore hoi ratou e roaroa ua mauiui, no te teiaha no ǒ i te arii o te mau tavana ra. 11 No te mea ua faarahi Epheraima i te fata e rave rahi ei hara, e riro taua mau fata ra ei hara na ˈna. 12 E rave rahi ta ˈu parau ture i papai atu ia ˈna, ua faarirohia râ te reira ei mea huru ê. 13 Te mau tusia ta ratou e hopoi mai ia ˈu nei, te faatusia nei ratou, e te amu nei i te iˈo i ore ai Iehova i ite atu ai ia ratou; e teie nei oia e manaˈo ai i to ratou ino, a tahoo atu ai hoi i ta ratou hara: ei hoˈi ïa ratou i Aiphiti. 14 Ua haamoe hoi Iseraela i tei hamani ia ˈna ra, e ua patu hoi i te hiero anaˈe: ua faarahi hoi Iuda i te oire aua: e hopoi râ vau i te auahi i nia i te mau oire no ˈna, e ama te mau fare rarahi i te reira.