Hosea
TE RIRI NEI TE ATUA I TE TAATA I TE HARA E TE HAAVARE.
7 Ia ˈu hinaaro i te faaora ia Iseraela, itea ihora te piˈo o Epheraima i reira, e te ino o Samaria: ua haavare hoi ratou; e eiâ anaˈe tei tomo i roto, e te pau nei rapae au i te haru. 2 Aore hoi ratou i manaˈo i to ratou aau e, te manaˈo nei au i ta ratou mau parau ino ra. E teie nei, ua haaatihia ratou e ta ratou iho parau; e te vai noa nei i mua i tau mata. 3 Ua faaoaoa ratou i te arii i to ratou ino; e te mau tavana i ta ratou haavare. 4 E faaturi anaˈe ratou: mai te umu ratou e tahuhia e te eu maa ra, o tei ore i tiaihia ia oti te faraoa i te oˈihia e ana, e hope roa aˈera i te hopue. 5 I te mahana oroa a to tatou arii ra, i mahanahana te mau tavana i te uaina, ua faatoro oia i tana rima ma te feia tâhitohito atoa ra. 6 Mai te umu ra to ratou aau i te mahanahana, i taotooto ai ratou ra; te taoto noa ra te eu maa e ao noa ˈˈe te rui; e ua ao anaˈe, te ama noa ra ïa mai te auahi e ura ra. 7 Mai te umu ra ratou i te veavea, e ua pau ta ratou mau haava i te pohe ia ratou; ua hope to ratou mau arii i te mairi: aore roa te hoê o ratou i tiaoro mai ia ˈu nei. 8 Ua anoi noa Epheraima i roto i te mau taata atoa; e au Epheraima i te pane aore i faaniahia ra. 9 Ua riro to ˈna maa puai ia vetahi ê, e aore hoi oia i ite: e ua aputaputa i te hinahina i nia ia ˈna, e aore oia i ite. 10 E ua faahapa te teoteo o Iseraela ia ˈna: aore hoi ratou i fariu mai i to ratou Atua ra ia Iehova, e aore hoi ratou i imi ia ˈna i teie nei mau parau. 11 E au hoi Epheraima i te uuairao vare noa e te ite ore: te tiaoro nei ratou ia Aiphiti, te haere nei ratou i Asura. 12 Ia haere ratou ra, e hohora vau i tau upeˈa i nia ia ratou; na ˈu ratou e tuu i raro mai te manu i roto i te reva nei; e mai tei faaroohia hoi i to ratou amuiraa, e aˈohia ïa ratou e au. 13 Atae hoi ratou! ua faarue mai hoi ratou ia ˈu: e pohe to ratou! ua hara hoi ratou ia ˈu nei: e rave rahi to ˈu faaoraraa ia ratou, e ua parau ratou i te parau haavare ia ˈu nei. 14 E aore hoi ratou i tiaoro mai ia ˈu ma te aau atoa ra, a auê noa ˈi ratou i nia i to ratou mau roi; no te sitona e te uaina i amui ai ratou e ua patoi mai ia ˈu nei. 15 Ua aˈo atu vau ia ratou, e ua faaetaeta vau i to ratou rima, ua manaˈo ino mai â ratou ia ˈu nei; 16 ua fariu ratou, aore râ ia ˈu nei; ua riro ratou mai te fana e vare ai ra: ua hiˈa to ratou mau arii i te ˈoˈe i te etaeta o to ratou arero: e faainohia ˈi ratou i te fenua ra i Aiphiti.