Ezekiela
TE HAAPAORAA NO TE ARII I TO ˈNA HAAMORIRAA I TE ATUA.
46 Te na ô maira te Fatu ra o Iehova; Te uputa i te aumoa i roto e hiˈo tia ˈtu i te pae i te hitia o te râ ra, e opanihia ïa i na mahana ohipa ra e ono; ia tae râ i te sabati, e iritihia ïa, e te mahana no te marama apî ra, e iritihia ïa. 2 Na te poretiko o taua uputa ra te arii i te tomo i te pae i rapaeau ra, e ei te pou o te uputa ra oia e tia ˈi; e na te tahuˈa e faatusia i ta ˈna tusia taauahi, e te tusia no te maitai, e ei te uputa oia e haamori ai: a haere ai oia ra; e ore râ e opani-vave-hia te uputa e ahiahi noa ˈtu. 3 E te mau taata atoa o te fenua ra, ei te tomoraa i teie nei uputa e haamori ai i mua i te aro o Iehova, i te mau sabati e te mau marama apî ra. 4 E te tusia taauahi ta te arii e hopoi mai ia Iehova i te sabati, e pinia mamoe ïa e ono, aore e ino ra, e te hoê mamoe oni aore e ino ra. 5 E te tusia amu ra hoê epha i te mamoe oni hoê, e te tusia amu no te mau pinia mamoe ra, tei ia ˈna iho ïa, hoê hoi hina hinu i te epha hoê. 6 E ia tae i te mahana no te marama apî ra, hoê ïa puaatoro oni apî ino ore, e na pinia mamoe e ono e te mamoe oni hoê: ei mea ino ore atoa ïa. 7 E na ˈna e rave i te tusia amu hoê epha i te puaatoro oni hoê, hoê hoi epha no te mamoe oni, e to te mau pinia mamoe ra tei ia ˈna iho ïa, hoê hoi hina hinu i te epha hoê. 8 E ia tomo te arii i roto ra, na te poretiko o taua uputa ra i te haere, e na reira hoi oia ia hoˈi ra.
9 Ia haere mai râ te mau taata o te fenua i te aro o Iehova i te mau amuiraa moˈa ra, o tei tomo mai na te uputa i te pae i apatoerau ia haamori i te Atua, e na uputa i te pae i apatoa oia ia hoˈi ra; e o tei tomo mai na te uputa i te pae i apatoa ra, e na te uputa i te pae i apatoerau oia ia hoˈi: eiaha oia ia na te uputa ta ˈna i haere maira i te hoˈi, e na te tahi paeau ra oia i te hoˈi. 10 E o tei arii i roto ia ratou ra, ia hoê â tomoraa ia tomo ratou ra; e ia haere ratou ra, a haere atoa ïa. 11 E i te mau oroa ra, e te mau amuiraa moˈa ra, te tusia amu ra hoê ïa epha i te puaatoro oni hoê, hoê epha hoi i te mamoe oni hoê, area te mau pinia mamoe ra, tei ia ˈna iho ïa; hoê hoi hina hinu i te epha hoê. 12 Ia opua hoi te arii i te taoˈa horoa noa, te tusia taauahi, e te tusia no te maitai, ei taoˈa horoa noa na Iehova, e iritihia te uputa e hiˈo tia i te hitia o te râ ra no ˈna, e na ˈna e faatusia i te tusia taauahi na ˈna e te tusia no te maitai, mai ta ˈna atoa i rave i te sabati; ei reira oia e haere ai; e reva ˈtura oia ra e opanihia ˈi te uputa. 13 E na ˈna e faatusia i te mau mahana atoa ra i te tusia taauahi na Iehova i te pinia mamoe matahiti hoê ra, eiaha hoi ei ino: i te mau poipoi atoa ra eiaha ia toe. 14 E faanehenehe atoa oia i te tahi tusia amu i te mau poipoi atoa nei; i te ono o te tufaa i te epha; e te toru o te tufaa o te hina hinu ra, ei faararirari i te faraoa hua ra ei tusia amu na Iehova, ei haapao tamau ïa. 15 E faatusia oia i te pinia mamoe, e te tusia amu, e te hinu ra, i te mau poipoi atoa ra, ei tusia taauahi hopoi tamau ïa.
16 Te na ô maira te Fatu ra o Iehova; Ia horoa te arii i te taoˈa na te tahi tamaiti na ˈna ra, na te tamarii ïa taoˈa: e riro hoi ei taoˈa mau na ratou. 17 Ia horoa râ oia i te tahi pae i te tufaa no ˈna i te tahi tavini no ˈna ra, ei ia ˈna ˈtu â ïa e tae noa ˈtu i te iubili, a hoˈi faahou atu ai i te arii ra: o ta ˈna râ tufaa horoahia ˈtu i te tamarii, e riro ïa no ratou. 18 Eiaha te arii e rave i ta te mau taata ra taoˈa, ia taa ê atu ratou i to ratou ra tufaa: e horoa râ oia i to ˈna ihora no ta ˈna mau tamarii: ia ore tau mau taata ia purara ê, ratou atoa ra e taa ê atura i to ˈna tufaa.
19 Ua aratai maira oia ia ˈu na te tomoraa i te hiti uputa ra, e i roto i te mau piha moˈa no te feia tahuˈa ra, e fariu tia i te pae i apatoerau ra: e inaha, tei reira te hoê vahi tei na paeau e piti i te tooa o te râ ra. 20 Ua na ô maira oia ia ˈu, O te vahi teie e tunu ai te mau tahuˈa i te tusia no te hape e te tusia no te hara, ei reira hoi e eˈu ai i te tusia amu; ia ore ratou ia hopoi i roto i te aumoa i rapae au ra, o te moˈa hoi te mau taata ra. 21 Ua aratai maira oia ia ˈu i roto i te aumoa i rapaeau, e ua aratai oia ia ˈu na taua na peho e maha o te aumoa ra: e inaha, e aumoa atoa tei taua na peho e maha o te aumoa ra. 22 E aumoa rii taatiatihia anaˈe tei taua na peho o te aumoa ra, e maha ahuru i te kubiti i te maoro, e toru ahuru i te aano: hoê â huru to te reira e maha atoa ra ia faito. 23 E nanai fare hoi i te tiaraa i roto i te reira e ati noa ˈˈe e maha atoa ra, i patuhia ma te tunuraa i raro aˈe i taua mau nanai ra e ati noa ˈˈe. 24 Ua parau maira oia ia ˈu, O te mau fare teie no te feia e tunu; ei reira te feia toroa o te fare nei e tunu ai i te mau tusia na te taata ra.