Ezekiela
TA MAA FENUA I HAAPAOHIA NO TE VAHI MOˈA RA.
45 E ia tufa kelero outou i te fenua ei parahiraa, e hopoi outou i te tahi ô na Iehova, i te tahi tufaa moˈa i taua fenua nei: i te maoro ra, hoê taau ïa e ma pae i te tausani i te kubiti, e te aano ra, hoê ïa ahuru i te tausani i te kubiti, Ei tufaa moˈa ïa taua tufaa ra e ati noa ˈˈe taua hiti atoa ra. 2 E no roto hoi i te reira, e pae hanere i te kubiti i te maoro, no te vahi moˈa ïa, e pae hanere hoi i te aano, i faito atoa e ati noa ˈˈe, e pae ahuru hoi i te kubiti ei fenua pirifetau e ati noa ˈˈe. 3 O tena na te faito ia faito oe i te maoro, hoê taau ma pae i te tausani, hoê ahuru hoi i te tausani i te aano; e ei roto hoi i te reira te vahi moˈa, te vahi moˈa rahi roa ra. 4 Taua tufaa moˈa o te fenua nei, no te pǔpǔ tahuˈa ïa, te feia i rave i te toroa i roto i te vahi moˈa ra, o tei haafatata i te raveraa i te toroa i te aro o Iehova ra; ei tiaraa no to ratou mau fare, ei vahi moˈa hoi no te fare moˈa. 5 Hoê taau hoi e ma pae i te tausani i te maoro, hoê ahuru i te tausani i te aano, no te ati Levi, no te feia tahuˈa i taua fare ra, ei taoˈa, e e piti ahuru hoi piha to reira. 6 E na outou e haapao i te parahiraa ra i te oire, e pae tausani i te aano, hoê taau hoi e ma pae i te tausani i te maoro, i mua mai i te vahi pûpûhia i te vahi moˈa ra: no te utuafare atoa ïa o Iseraela. 7 Ei tufaa hoi ta te arii i teie paeau e tera paeau i taua vahi pûpûhia i te tufaa moˈa ra, e te tufaa no te oire, i mua i te vahi pûpûhia i te tufaa moˈa ra, e te taoˈa no te oire, i te pae i te tooa o te râ haere noa ˈi i te pae i te tooa o te râ ra, e te pae i te hitia o te râ ra, haere noa ˈi i te pae i te hitia o te râ ra: e te maoro ra, ei mua mai ïa i taua mau tufaa atoa ra, mai te hiti i te pae i te tooa o te râ ra, e tae noa ˈtu i te hiti i te pae i te hitia o te râ ra. 8 Area te fenua ra, ei taoˈa ïa no ˈna i Iseraela nei; e eiaha tau mau arii e hamani ino faahou i tau mau taata; e te toea o te fenua e hopoi ratou no te utuafare ra o Iseraela i to ratou ra mau opu.
9 Te na ô maira te Fatu ra o Iehova; Atira ïa ta outou, e te mau arii i Iseraela nei: faataa ê atu i te rave ino e te haru, a rave na i te parau au e te mea tia, e hopoi ê atu i ta outou hamani ino i to ˈu ra mau taata, te na reira maira te Fatu ra o Iehova. 10 Ei faito au ta outou faito, e te epha au, e te bato au. 11 Ia hoê â huru te epha e te bato ia faito; o te ahuru o te tufaa ia tufahia te homera, o te bato ïa, e te epha atoa, o te ahuru ïa o te tufaa o te homera: ia na te homera ia faito ia au i reira. 12 E te sekela, hoê taau ïa gera: e te mau ario hoê taau i te sekela, e te hoê taau e ma pae, e te hoê ahuru e ma pae ra, o ta outou ïa mina.
13 Teie ta outou ô ia hopoi outou; o te ono o te tufaa i te epha no roto i te homera sitona, e te ono hoi o te tufaa i te epha no roto i te homera kerite: 14 area te parau i te bato hinu ra, o te ahuru o te bato no roto i te kora, hoê kora, hoê ahuru ïa i te bato; hoê hoi homera, hoê ahuru ïa i te bato; 15 hoê hoi pinia mamoe no roto i te nǎnǎ e piti hanere ia hopoi outou, no roto i te mau faaamuraa-pape-hia i Iseraela ra; ei tusia amu, e ei tusia taauahi, ei tusia no te maitai, ei taraehara no ratou, te na reira maira te Fatu ra o Iehova. 16 Na te mau taata atoa o te fenua nei e hopoi i teie nei ô, e te arii atoa i Iseraela nei. 17 Ei te arii hoi te hopoi i te tusia taauahi, e te tusia amu, e te tusia inu, i te mau oroa ra, e te mau marama apî, e te mau sabati, e te amuiraa moˈa i te utuafare o Iseraela nei: e na ˈna e faatusia i te tusia no te hara, e te tusia amu, e te tusia taauahi, e te tusia no te maitai, ei taraehara no te utuafare o Iseraela.
18 Te na ô maira te Fatu ra o Iehova; Ia tae i te marama matamua ra, e te mahana matamua o taua marama ra, a rave ai oe i te hoê puaatoro oni apî e te ino ore, a tamâ ˈi i te vahi moˈa ra: 19 e na te tahuˈa e rave i te tahi pae toto i te taraehara ra, a tuu atu ai i nia i te pou o te fare ra, e i nia i na poro i te hiti o te fata ra, e i nia hoi i te pou o te uputa o te aumoa i roto ra. 20 E na reira atoa hoi oe i te hitu o te mahana i taua marama ra i te taata atoa i hapa ra, e tei maua atoa ra: e na reira outou i te haamaitai i taua fare ra.
21 Ia tae i te marama matamua ra, e te mahana hoê ahuru ma maha i taua marama ra, ei pasa ta outou, e hitu mahana i te oroaraa; e amu te taata atoa i te pane faahopue-ore-hia. 22 E ia tae i taua mahana ra, e faatusia te arii i te tahi puaatoro oni ei tusia no te hara na ˈna iho e na te taata atoa o te fenua nei. 23 E ia rui hitu outou i taua oroa ra i te faatusiaraa i te tusia taauahi na Iehova, ia hitu puaatoro oni, e ia hitu hoi mamoe oni ma te ino ore e hope aˈera taua na mahana e hitu ra; e te hoê pinia puaaniho i te mau mahana atoa ei tusia no te hara. 24 E hopoi hoi oia i te tusia amu hoê epha no te puaatoro oni, hoê hoi epha no te mamoe oni, hoê hoi hina hinu i te epha hoê. 25 E ia tae i te hitu o te marama e te mahana hoê ahuru ma pae i taua marama ra, e na reira atoa oia i te rave i taua oroa ra, i taua na mahana e hitu ra; i te haapaoraa i te tusia no te hara, e te haapaoraa i te tusia taauahi, e te haapaoraa i te tusia amu, e te haapaoraa i te hinu ra.