Ezekiela

TE FAAITE NEI TE PEROPHETA I TO ZEDEKIA PAURAA.

12 Ua tae maira hoi te parau a Iehova ia ˈu nei, na ô maira, 2 E te tamaiti a te taata na, te parahi ra oe i rotopu i te utuafare tâhito ra; e mata to ratou ia hiˈo, e aore i hiˈo; e tariˈa to ratou ia faaroo, e aore i faaroo: utuafare tâhito hoi ratou. 3 E tena na, e te tamaiti a te taata na, e faaineine oe i te taoˈa na oe ia haere ra, a haere ai oe i te ao nei i mua i to ratou mata; a faarue ai oe i to oe ra vahi, a haere ai i te tahi vahi i mua i to ratou mata; peneiaˈe ratou o te haamanaˈo, tâhito noa mai ai taua utuafare no ratou ra. 4 Ei reira hoi oe e hopoi ai i ta oe ra taoˈa i te ao nei ei taoˈa haere i mua i to ratou mata; ei te ahiahi oe e hopoi ai i mua i to ratou mata, mai te feia e hopoi tei riro ei tîtî ra. 5 E o oe i na roto i te aua i mua i to ratou mata, a na reira ˈi i te hopoi. 6 Ei mua i to ratou mata oe e hopoi ai i ta oe ra taoˈa i nia i to tapono; ei te arehurehuraa ra oe e hopoi ai; e vehî oe i to mata, eiaha oe ia ite i te repo: ua faarirohia hoi au ia oe ei tapao i te utuafare o Iseraela. 7 E ua na reira hoi au, tei faauehia mai au ra: ua hopoi au i tau taoˈa i te ao, ei taoˈa no te tere; e ahiahi aˈera, ua ô ihora vau na roto i te aua i tau rima; ua hopoi hoi au i te arehurehu ra, ua hopoi au na nia i tau tapono i mua i to ratou mata.

8 E ao aˈera, o te parau maira na Iehova ia ˈu nei, na ô maira, 9 E te tamaiti a te taata na, aita anei te utuafare o Iseraela, te utuafare tâhito ra, i parau mai ia oe e, Te aha noa na oe? 10 E parau atu oe ia ratou, Te na ô maira te Fatu ra o Iehova, Teie nei parau teiaha, no te arii ïa no Ierusalema, e te utuafare atoa o Iseraela i rotopu ia ratou ra. 11 E parau atu, O vau ta outou tapao; e mai ta ˈu i rave ra, e na reirahia mai ratou: e haere ïa ratou, e reva hoi ratou ei tîtî. 12 E na te arii i roto ia ratou e hopoi na nia i to ˈna tapono, ei te arehurehuraa ra oia e haere ai, e ô ratou na roto i te aua ia hopoi e na reira i te hopoi i rapae; e vehî oia i tana mata ia ore ia ite to ˈna mata i te repo. 13 E tuu hoi au i tau upeˈa i nia ia ˈna, e fifi hoi oia i tau marei, e hopoi au ia ˈna i Babulonia, i te fenua o te Kaladaio; e ore râ oia e ite, e pohe noa ˈtu â oia i reira. 14 E te feia atoa e haaati mai ia ˈna ei tauturu, e te mau pǔpǔ atoa no ˈna ra, na ˈu e haapurara i te mau mataˈi atoa ra; e na ˈu e unuhi i te ˈoˈe ei tipapa ia ratou ra. 15 E ite hoi ratou e, o vau o Iehova, ia haapurara vau ia ratou i roto i te mau fenua atoa, ia faatae atu vau ia ratou i roto i te mau mataeinaa atoa ra. 16 E faatoe râ vau i te tahi pae i te ˈoˈe ra, e i te poia ra, e i te maˈi ra; ia faaite ratou i ta ratou mau parau ino i te mau fenua ta ratou e haere ra; e ite hoi ratou e, o vau o Iehova.

17 E ua tae maira hoi te parau a Iehova ia ˈu nei, na ô maira, 18 E te tamaiti a te taata na, e amu oe i ta oe maa ma te rurutaina, e inu oe i ta oe pape ma te horuhoru, e ma te hauriria; 19 a parau atu ai i te mau taata o te fenua nei, Te na ô maira te Fatu ra o Iehova i to Ierusalema, i te fenua o Iseraela; E amu ratou i ta ratou maa ma te hauriria, e inu i ta ratou pape ma te maere, e ia ano to ratou fenua e eiaha roa to roto ra, no te rave aroha ore o te feia i parahi i reira. 20 E te mau oire taata ra, e riro ïa i te faaorehia, e riro hoi taua fenua ra i te ano; e ite hoi outou e, o Iehova vau ra.

21 Ua tae maira hoi te parau a Iehova ia ˈu nei, na ô maira, 22 E te tamaiti a te taata na, eaha taua maseli na outou na i te fenua o Iseraela nei, tei na ôhia ra e, Ua haamaorohia te tau ra, ua ore anaˈe te mau orama? 23 E tena na, e parau atu oe ia ratou, Te na ô maira te Fatu ra o Iehova; e faaore au i taua maseli nei, e ore hoi ratou e parau faahou i te reira ei maseli i Iseraela nei; e parau atura ia ratou, Te fatata nei te tau, e hope ai te orama atoa i te tupu. 24 E ore roa hoi e tupu faahou te orama faufaa ore, e te tohu haavare, i roto i te utuafare o Iseraela. 25 O vau hoi o Iehova, na ˈu e parau, e te parau ta ˈu e parau ra, e tupu ïa; e ore ïa e faaroaroahia: ei to outou nei anotau, e tera ra utuafare tâhito e, e parau ai au i te parau, e na ˈu e faatupu, te na reira maira te Fatu ra o Iehova.

26 Ua tae maira te parau a Iehova ia ˈu nei, na ô maira, 27 E te tamaiti a te taata na, inaha, te parau nei te utuafare o Iseraela, Te orama ta ˈna i ite ra, no te mau mahana ïa a muri atu, e tei te atea ê ra te tau ta ˈna e tohu ra. 28 E tena na, e parau atu ia ratou, Te na ô maira te Fatu ra o Iehova; E ore roa ta ˈu nei parau e faaroaroa-faahou-hia, e te parau ta ˈu e parau ra, e faatupuhia ïa, te parau maira te Fatu ra o Iehova.