Ezekiela

TE MÂRÔ O TE FEIA MANA, TA RATOU HARA, E TO RATOU POHE.

11 Ua faatia aˈera te varua ia ˈu i nia, e ua aratai maira ia ˈu i te uputa i te pae i te hitia o te râ i te fare o Iehova, i tei tiraha tia i te pae i te hitia o te râ ra: e inaha, tei te opani i taua uputa ra na taata hoê taau e ma pae; e ua ite atoa vau i rotopu ia ratou ia Iaazania a Azura, e ia Pelatia a Benaia, e hui arii ïa i ǒ te mau taata ra. 2 Ua parau maira oia ia ˈu, E te tamaiti a te taata na, o te mau taata teie i imi i te ino ra, e o tei aˈo i teie nei oire i te parau ino: 3 o tei parau e, Aita i fatata: tatou e patu i te fare: o teie nei oire, o te pani ïa, o tatou ra te maa. 4 E tena na, a tohu atu oe ia ratou, a tohu, e te tamaiti a te taata na. 5 Ua mairi maira te varua o Iehova i nia ia ˈu, e ua na ô maira, A parau, Te na ô maira Iehova: Ua na ô hoi outou, e te utuafare o Iseraela: ua ite hoi au i te parau i ô atu i roto i to outou aau, e eiaha roa ia toe. 6 Ua faarahi outou i te taata pohe i teie nei oire, e ua faaî outou i to ˈna mau aroâ i te taata pohe. 7 E teie nei, te na ô maira te Atua ra o Iehova, To outou mau taata pohe i vaiihohia e outou i ropu, o ratou te maa, e teie nei oire te pani: e aratai râ vau ia outou i rapae au, mai ropu mai i taua oire ra. 8 I mǎtaˈu na hoi outou i te ˈoˈe; e ei ˈoˈe ta ˈu e hopoi mai i nia ia outou, te na reira maira te Fatu ra o Iehova. 9 Na ˈu outou e aratai mai i rapae, mai ropu mai â i taua oire ra, a tuu atu ai au ia outou i te rima o te taata ěê ra, e tahoo atu vau ia outou na. 10 E hiˈa outou i te ˈoˈe; ei te hiti o Iseraela vau e faautua ˈtu ai ia outou; e ite hoi outou e, o Iehova vau. 11 E ore teie nei oire e riro ei pani na outou, e ore hoi outou e riro ei maa i roto ra; ei te hiti o Iseraela vau e faautua ˈtu ai ia outou; 12 e ite hoi outou e, o Iehova vau; no te mea aita outou i haapao i ta ˈu nei parau, e aita hoi i rave i ta ˈu i faaau atu, ua haapao râ i ta te mau etene e haaati mai ia outou nei.

13 E ia tohu ihora vau ra, pohe ihora Pelatia a Benaia. Tipapa ihora vau i raro tau mata, e ua pii hua ˈtura tau reo, na ô atura, E te Fatu e, e Iehova! e faahope hua anei oe i te toea o Iseraela nei? 14 O te taeraa mai ïa o te parau a Iehova ia ˈu nei, na ô maira, 15 E te tamaiti a te taata na, to mau taeae, to mau taeae te mau taata i to oe fetii, e te utuafare atoa o Iseraela e ati noa ˈˈe, o tei parauhia mai ïa e to Ierusalema, Ia atea ê atu outou ia Iehova nei: o matou tei horoahia mai teie nei fenua ei taoˈa. 16 E tena na, a parau atu e, Te na ô maira te Fatu ra o Iehova; Faarue ê noa ˈtu â vau ia ratou i roto i te mau fenua ra, haapurara noa ˈtu vau ia ratou i roto i te mau mataeinaa ra, ei haapuraa iti poto râ vau no ratou i taua mau mataeinaa ra ta ratou e haere ra.

17 E tena na, e na ô atu, Te na ô maira te Fatu ra o Iehova, Na ˈu outou e ope mai, mai roto i te mau taata ra, e haaputuputu mai au ia outou mai roto i te mau fenua i purara ê ai outou ra, e na ˈu e horoa ˈtu ia outou i te fenua o Iseraela. 18 E haere mai ratou i reira, e na ratou e hopoi ê atu i te mau mea ino i reira, e te mau mea faufau i reira. 19 E na ˈu e horoa ˈtu i te aau hoê no ratou, e na ˈu e tuu i te varua apî i roto ia ratou; e na ˈu e iriti i te aau ofai i roto ia ratou, e na ˈu e horoa ˈtu i te aau mǎrû: 20 ia haapao ratou i ta ˈu nei parau, e ia tapea i ta ˈu nei haapaoraa, a rave ia; e ei taata ratou no ˈu, e ei Atua vau no ratou. 21 Area o tei tipapa to ratou aau i te hinaaro i ta ratou mau mea ino ra, e ta ratou mau mea faufau, e tahoo atu vau i ta ratou parau i nia ia ratou iho, te parau maira te Fatu ra o Iehova.

22 Ua faateitei aˈera na kerubi i to ratou mau pererau, e tei pihai iho te mau pereoo ia ratou; e tei nia ˈˈe te anaana o te Atua o Iseraela ia ratou ra. 23 Reva ˈtura te anaana o Iehova mai ropu atu i taua oire ra, e tia noa ihora i nia i te mouˈa i te pae i te hitia o te râ i taua oire ra. 24 Muri aˈera ua rave maira te varua ia ˈu i nia, e ua hopoi ia ˈu i te fenua o te Kaladaio, i te feia tîtî ra, i roto i te orama o te varua o te Atua ra. Reva ˈtura taua orama i itea e au ra i nia. 25 Ua parau atura vau i to te feia tîtî ra i te mau parau atoa ta Iehova i faaite mai ia ˈu ra.