Ieremia

TE PAU-ROA-RAA O TE MAU PHILISETI RA.

47 Te parau a Iehova i tae mai i te peropheta ra ia Ieremia i te Philiseti, aore â Gaza i pau ia Pharao ra.

2 Te na ô maira Iehova, Inaha, e pape te tupu maira i te pae i apatoerau ra, e riro ei pape rahi uˈana, e ninahia te fenua e te mau mea atoa i nia ihora, te oire, e te feia atoa i parahi i reira; e oto hua hoi te taata atoa, e te mau taata atoa o te fenua nei, e auě ia. 3 I te paapaaina o te avae o ta ˈna puaahorofenua puai ra, i te haruru o te mau pereoo ra, e te tauu o te porotaa ra, aore te feia metua i hiˈo mai i muri i te tamarii ra; riro atura to ratou rima ei mea faufaa ore i te mǎtaˈu. 4 No te mahana e fatata mai nei e pau roa ˈi to te Philiseti; ia tâpû-ê-hia te mau tauturu i toe, i Turia e Sidona; e pau hoi te Philiseti ia Iehova, te toea o te fenua ra o Kaphatori. 5 Te fatata maira te pahure i nia ia Gaza; haamamûhia hoi Asekelona, e te toea o to ratou peho ra e; ahea oe e faaea ˈi i te otioti ia oe ihora? 6 E te ˈoˈe a Iehova e, afea ra oe e faaea maite ai? a hoˈi i roto i to vehî; e faaea na, eiaha e hauti. 7 Eaha e tia ˈi ia faaea e eiaha e hauti, i tei poroihia e Iehova ra ia Asekelona, e te pae tahatai ra? ua haapaohia ïa e ana i reira.