Ieremia
TE FAAITE NEI IEREMIA I TE PAU O TE NUU O PHARAO I EUPHARATE.
46 Te parau a Iehova i tae mai i te peropheta ra ia Ieremia, no te mau fenua ra; 2 no Aiphiti ra; no te nuu a te arii o Aiphiti ra a Pharao-neko, i te pae pape ra i Eupharate i Karekemisa ra, ta te arii o Babulonia ta Nebukanesa i tairi ra, i te matahiti maha o Iehoiakima a Iosia, e arii o Iuda ra.
3 A faaue na i te ahu tamaˈi e te paruru, a faaineine i te aro. 4 A faaunauna i te mau puaahorofenua; e paiuma outou, e te feia puaahorofenua ra, a tia noa ˈtu ai ma to outou taupoo atoa ra; a faaanaana i te mahae, a ahu na i te ahu tamaˈi. 5 Eaha te mea, i te hiˈoraa ˈtu vau, ua mǎtaˈu anaˈe ratou? ua hoˈi i muri, e te feia puai ua tairihia ïa i raro? ua maue ê ratou, aore i hiˈo i muri, ua haapunihia e te mǎtaˈu, te parau maira Iehova: 6 eiaha tei oioi ra e horo ê; eiaha tei puai e imi i te ora; tei te pae i apatoerau ra, i te hiti o te Eupharate, ua turori ratou e ua hiˈa. 7 O vai teie e faateitei mai te pape ra, o tei horo uˈana noa mai te pape tahe? 8 O Aiphiti tei faateitei mai te pape ra, e mai te pape tahe ra ta ˈna pape i te horo uˈana; ua na ô oia, E faateitei au, e ia ninahia te fenua ia ˈu, e rave haamou vau i te oire, e to ˈna atoa ra mau taata. 9 A paiuma e te mau puaahorofenua e, ia uˈana outou i te rave, e te mau pereoo, e tuu atu i te aito ra; o Kusa e o Phuta, o tei rave i te paruru ra, e te ati Luda e fana ta ˈna mauhaa e rave ra. 10 O te mahana râ teie no te Fatu, e mahana tahooraa na Iehova sabaota ra, ei tahooraa ˈtu i ta ˈna ra mau enemi; e pau hoi ratou i te ˈoˈe, e fiu ïa, e e taero roa i to ratou toto; e tusia hoi ta te Fatu ra, ta Iehova sabaota ra, i te fenua i te pae i apatoerau, i te pae pape i Eupharate ra. 11 A haere i nia i Gileada, a rave ai i te raau, e te tamahine paretenia i Aiphiti ra: e haaputuraa raau faufaa ore ta oe na, aita o oe e ora. 12 Ua ite te mau fenua i to oe vahavaharaa, e ua î te fenua i to oe reo: ua turori hoi te aito i te aito e ua mairi apipiti raua.
13 Te parau a Iehova i parau mai i te peropheta ra ia Ieremia, no te haerea mai o te arii o Babulonia ra o Nebukanesa, e tairi i te fenua ra ia Aiphiti. 14 E faaite outou i Aiphiti, e faaite hua i Migadola, e faaite hua atoa i Nopha e Tapanehesa; e parau atu outou, Taataahi etaeta na ia itoito oe na, e pau hoi te taata atoa i te ˈoˈe e ati noa ˈˈe oe nei. 15 Eaha te mea i hiˈa ˈi to taata puai ra? aore aˈera oia i mau no te mea na Iehova oia i hopara i raro; 16 e rave rahi ta ˈna i faaturori, e ua hiˈa te tahi i nia iho i te tahi; i parau ai ratou, A tia, mai haere tatou i to tatou ra, i to tatou fenua i fanau mai ai ra, i te ˈoˈe hoi o te hamani ino nei. 17 Ua pii atura ratou i reira, O te arii o Aiphiti ra, o Pharao, ua pau, ua mairi ia ˈna te tau i haapaohia ra. 18 Te ora nei au, te na ô maira te Arii, no ˈna te iˈoa ra o Iehova sabaota ra, oia mau, mai ia Tabora i roto i te mau mouˈa ra, e mai ia Karemela i tahatai, e haere mai oia. 19 A faaineine na i ta oe ra mau tauhaa e haere i te tîtîraa ra, e te tamahine i parahi i Aiphiti ra; e riro hoi Nopha i te ano, e pau, e aore roa e taatahia. 20 Mai te puaatoro ufa apî e te nehenehe Aiphiti: te haere maira râ te pohe mai te pae i apatoerau ra. 21 E au tana ra mau taata tarahuhia i roto ia ˈna ra, i te puaatoro rii pae poria ra; ua fariu ê râ te reira atoa ra, ua maue paatoa ra, aore roa i mau mai; no te mea ua tae i to ratou mahana e pohe ai ra; e te taime i roohia mai ai ratou ra. 22 E riro te ahehe o to ˈna reo mai to te ophi; e haere mai hoi ratou ma te nuu, e e roohia ˈtu oia e ratou ma te opahi, mai te feia tâpû raau ra. 23 E tâpû ratou i te uru raau na ˈna, te parau maira Iehova, eita râ e hope ia imi; e rahi hoi te reira i to te arabe te ore e hope ia taio ra. 24 Ua haama te tamahine a Aiphiti; ua horoahia ˈtu i te rima o te taata i te pae i apatoerau ra. 25 Ua parau maira Iehova sabaota ra, te Atua o Iseraela, Inaha, e rave au ia Amona i No ra, e ia Pharao, e ia Aiphiti, e to ˈna atoa ra mau atua, e te mau arii; oia hoi Pharao, e te feia atoa i tiaturi ia ˈna: 26 e tuu atu vau ia ratou i te rima o te feia i titau mai ia ratou ia pohe; i te rima o te arii o Babulonia o Nebukanesa, e te rima o to ˈna ra mau tavini; e taatahia râ te reira a muri aˈe, mai tei tahito atoa ra, te na reira maira Iehova.
27 Eiaha râ oe e mǎtaˈu, e tau tavini, e Iakoba e, eiaha atoa oe e taiâ, e Iseraela e; inaha, e aratai mai hoi au ia oe mai te vahi maoro mai ma te ora, e to oe ra huaai mai te fenua mai i tîtî ai ratou; e hoˈi mai hoi Iakoba a faaea maite ai, e parahi hoi oia ma te ora, e ore hoi te hoê e haamǎtaˈu mai. 28 Eiaha oe e mǎtaˈu, e tau tavini, e Iakoba, te parau maira Iehova, ei pihai atoa iho hoi au ia oe; rave faahope noâ vau i te mau fenua atoa i ta ˈu i tiahi atu ia oe ra; e ore râ vau e rave faahope ia oe, e rave au ia oe ma te haapao maite, e ore e faaano roa ˈtu ia oe.