Isaia

TO RATOU MAITAI TO TE HAAPAO I TE SABATI.

58 E pii hua, eiaha e faaherehere; e faateitei i to reo mai te pu ra, e faaite i to ˈu ra mau taata i ta ratou hara, e te utuafare o Iakoba i ta ratou parau ino. 2 O vau nei râ, te imi maira ïa ratou, i tera mahana, i tera mahana; e ia ite hoi ratou i ta ˈu ra parau o to ratou ïa hinaaro: mai te fenua i rave i te parau-tia ra, e aore i faarue i te haapaoraa a to ratou Atua ra. Te ui maira hoi ratou ia ˈu i te haapaoraa o te parau-tia ra; e mea hinaaro na ratou te faafatata i pihaiiho i te Atua.

3 Eaha matou i haapae ai i te maa, e aore oe i hiˈo mai? E i faahaehaa ˈi i to matou varua, e aore oe i haapao mai? Inaha! i te mahana e haapae ai outou i te maa ra, te oaoa ra outou; e ta outou mau ohipa i faaue ia ravehia ra, ua titau outou e ia hope roa. 4 Inaha, te haapae na outou i te maa ei mârôraa, e ei tamaˈiraa; e ia moto i to outou rima rave ino. Eiaha outou e na reira i te haapaeraa maa mai tei teie nei mahana: i te faateiteiraa i to outou reo i nia ê ra. 5 Mai te reira anei te haapaeraa maa hinaarohia e au ra; ia faahaehaa te taata i to ˈna varua i te mahana hoê nei? e ia piˈo anei to ˈna upoo i raro mai te ohǐ, e ia vauvau i to ˈna roi i te ahu oto e te rehu auahi? e parau anei oe i te reira i te haapaeraa maa, e e mahana au na Iehova? 6 E ere anei teie i te haapaeraa maa hinaaro na ˈu ra? ia tatara i te rǔrǔ ra o te ino; ia haamairi i te hopoia teiaha ra; ia tuuhia tei neneihia e tei hamani ino ra; e ia ofatihia e outou te mau zugo atoa ra? 7 E ere anei ia tufahia ta oe maa i te feia i poia ra; e ia aratai i te taata rii i ati ra i to utuafare? e ia ite oe i te veve ra, ia faaahu atu oe ia ˈna, e eiaha oe e tapuni i to oe ihora hoi tino? 8 Ei reira to oe maramarama e puroro noa mai ai mai te poipoi ra; e e ati vave hoi to oe ra mau puta; e na mua hoi to parau-tia ia oe i te haere; e te hanahana o Iehova te pee mai ia oe ra. 9 E parau oe i reira, e na Iehova e parau mai; na oe e tiaoro, e na ˈna e parau mai e, Inaha, teie Au! Ia faarue oe i te zugo i roto ia oe ra; i te tohuraa i te rima, e te parau ino ra; 10 ia hopoi mai oe i ta oe maa na tei poia ra, e paia aˈera te taata i roohia e te ati ra, ei reira to oe maramarama e hiti mai ai i roto i te pouri, e to oe ra pouri e riro mai te avatea ra. 11 E na Iehova e aratai tamau ia oe ra, e na ˈna e haamâhâ i to varua i te poihâ rahi ra; e, na ˈna e faaetaeta faahou ai ia oe: e riro hoi oe mai te ô faararirari-maitai-hia i te pape ra, e mai te pape pihaa eita roa e pohe ra. 12 E na to oe ra huaai e patu faahou i te mau parari tahito ra; te mau niu tahito ra ta ratou e patu tia i nia: e e parauhia oe, O te patu aua parari ra; e te rave faahou i te mau eˈa e haerehia e te taata ra.

13 Ia tapea oe i to avae i te sabati i te rave-ore-raa i to oe ra hinaaro i tau mahana moˈa: e ia parau oe i te sabati e mahana hinaarohia; e te oroa moˈa a Iehova ia faaturahia: e ua faaturatura oe, i te rave ore i ta oe ra mau peu, e aore i imi to oe ra hinaaro, e aore i parau i te parau faufaa ore; 14 e oaoa oe ia Iehova i reira; e na ˈu oe e haaparahi i nia i te mau vahi teitei o te fenua nei. E na ˈu oe e faaamu i te tufaa a to metua ra a Iakoba: o te vaha hoi o Iehova tei parau mai.