Isaia

POHERAA MAITAI TO TE FEIA PARAU-TIA.

57 Te pohe nei te feia parau-tia, e aore roa te hoê e haamanaˈo; e te hopoi-ê-hia nei te feia paieti, e aore e taata i ite; e no te ino i hopoi-ê-hia ˈi te feia parau-tia. 2 I haere ïa oia ma te hau; faaea noa ˈi ratou i nia i to ratou roi; o tei na te eˈa titiaifaro i te haere.

3 E haafatata mai na râ outou, e te mau tama a te vahine hiˈohiˈo ra, e te mau fanauˈa a te moiheuo, e te faaturi. 4 O vai ta outou i faaîpaupau na? e i faita ai te utu, e i faatoro ai i te arero? e ere anei outou i te tamarii taiva, e te huaai haavare? 5 E te nounouraa i te idolo i raro aˈe i te mau raau ruperupe atoa ra; e te taparahiraa i te mau tamarii i roto i te mau peho ra, e i raro aˈe i te mau mato taoo ra? 6 Tei te mau ofai manina o te peho ra ta oe tufaa: o te reira, o te reira to oe vaehaa: o te reira ta oe i ninii atu i ta oe tusia inu; e ta oe i hopoi i ta oe tusia amu. E au anei ia ˈu te reira mau mea ia hiˈo noa ˈtu? 7 Tei nia i te mouˈa teitei e te teniteni te vaiiho-raahia e oe to oe roi; e ua tae roa oe i reira i te hopoiraa i te tusia. 8 Tei muri mai i te uputa, e te pou o te uputa ra, te vaiiho-raahia e oe to oe manaˈoraa: ua faarue oe ia ˈu, e ua reva oe i nia; ua faarahi oe i to oe roi; ua faaau oe i te parau ia ratou: ua hinaaro hoi oe i to ratou roi, i te hiˈoraahia ˈtu e oe ra. 9 Ua hopoi oe i te monoˈi no te arii ra; e ua faarahi oe i to mau monoˈi maitatai ra: e ua tono ê roa i te mau vea na oe ra, e ua faahaehaa oe ia oe iho e tae noa ˈtura i hade. 10 Ua rohirohi oe i to oe ra haerea maoro; aita râ oe i parau e, Aita ˈtura e manaˈoraa: ua ora oe i ta to rima i rave ra; i ore ai oe i paruparu roa ˈi. 11 O vai hoi tena i ati ai oe na, o vai ta oe i mǎtaˈu ra i haavare mai ai oe ia ˈu? e aita hoi oe i manaˈo mai ia ˈu, aore hoi i feruri maite i to aau na? e ere anei no te mea, e mamûraa maoro aˈenei to ˈu, i ore ai oe i mǎtaˈu mai ai ia ˈu? 12 E faaite au i to parau-tia, e i ta oe ohipa aita râ a oe e faufaa i te reira.

13 Ia auê oe ra, na tei amui ia oe ra e faaora ia oe: e pee ê râ ratou i te mataˈi; e puehu ê ratou i te aho. O tei tiaturi mai râ ia ˈu ra, no ˈna ïa te fenua, e oia te parahi i taua mouˈa moˈa ra; 14 ei reira vau e parau ai e, A ope, a ope, e hamani i te eˈa; e hopoi ê i te tiaiaraa i te eˈa o to ˈu ra mau taata. 15 Te na ô maira hoi Iehova, o tei mana, e te teitei, o tei parahi i mure-ore, no ˈna te iˈoa Moˈa ra: ei te vahi teitei e te moˈa vau e parahi ai, e ei te taata aau tatarahapa e te haehaa ra; ei faaanaanaea i te aau o tei haehaa ra, ei faaitoito hoi i te aau o tei tatarahapa. 16 E ore hoi au e mârô tamau roa ˈtu; e ore hoi au e vaiiho tamau roa ˈtu i tau riri: o te taiâ roa ˈtu te varua i mua ia ˈu ra, e te mau varua ora atoa i hamanihia e au ra. 17 No te hara nounou taoˈa na ˈna ra i riri ai au, e ua tairi atura vau ia ˈna, e ua purou vau i tau mata, riri aˈera vau; haere noa ˈtura oia ma te mârô na te eˈa o to ˈna iho aau. 18 Ua ite au i to ˈna haerea; e na ˈu oia e faaora; e na ˈu oia e aratai, e faahoˈi atu vau i te mauruuru ia ˈna, e to ˈna atoa ra feia e oto ra. 19 Na ˈu e faatupu i ta te vaha ra: ei hau, ei hau, no tei taa ê i te atea ê ra, e no ˈna atoa no tei fatata mai, te parau maira Iehova, e na ˈu oia e faaora. 20 E au râ te taata ino i te miti faaea ore nei; eita roa hoi e ore te hauti; na te reira hoi i faareru i te vari e te repo. 21 Aore roa o te paieti ore ra e hau, te na reira maira tau Atua.