Isaia
E FAAORA IEHOVA I TO ˈNA MAU TAATA NO TO ˈNA RA IˈOA.
48 E faaroo mai i teie, e te utuafare o Iakoba; outou o tei mairihia i te iˈoa ra ia Iseraela: o outou o tei na te tumu pape ra o Iuda i te tahe mai, o tei tǎpǔ i te iˈoa ra ia Iehova, e ua ite atu i te Atua o Iseraela; e ere râ ma te parau mau e ma te parau-tia: 2 no te oire moˈa to ratou iˈoa i te noaaraa, e te tiaturiraa ratou i te Atua o Iseraela ei tauturu mai: o Iehova sabaota ra to ˈna iˈoa. 3 Ua faaite au i tei mutaaihora mau parau mai te matamua mai â; no roto ïa i to ˈu nei vaha, ua faaite hoi au i te reira: e ua rave etaeta hoi au i te reira, e tupu atura ïa. 4 No te mea ua ite au i to oe mârô, e uaua auri to oe aˈî, o to oe rae e ra e veo ïa; 5 i parau atu ai au mai te matamua mai â; aita te reira i tupu, i faaite atu ai au ia oe ra: oi parau hoi oe, Na tau idolo te reira i rave, e na tau hohoˈa i otiotihia, e tau tii i faatôhia ra i faatupu i te reira. 6 O ta oe hoi i faaroo ra, a hiˈo na i taua mau mea atoa ra; eita anei outou e faaite i te reira? mai teie nei a faaite au, ia oe i te parau apî, o tei hunahia ra, e aitâ oe i ite. 7 Ua ravehia ra i teie nei, e ere mai te matamua mai: aitâ hoi oe i faaitehia i te reira: oi parau hoi oe e, Inaha! ua ite na hoi au. 8 Oia ïa, aitâ hoi oe i faaroo, aitâ hoi oe i ite; aitâ hoi to tariˈa i haafatafatahia mai te matamua mai â: ua ite hoi au e, e riro oe i te haavare, e o Taiva to oe iˈoa mai te opu mai â.
9 No tau iˈoa nei ra i vaiiho ai au i tau riri; e no te haamaitai ia ˈu i faaroaroa ai au i te reira ia oe, ia ore au ia tâpû hua ˈtu ia oe ra. 10 Inaha, i tamâ na vau ia oe, e ere râ mai te ario ra, ua tamata vau ia oe i roto i te umu o te maˈi ra. 11 No ˈu iho, no ˈu iho, e na reira ˈi au; eaha e tia ˈi ia haaviiviihia to ˈu nei iˈoa? e ore au e horoa i to ˈu nei hanahana ia vetahi ê.
12 E faaroo mai ia ˈu, e Iakoba, e o oe hoi, e Iseraela, o tei parauhia e au ra: o vau nei ïa: o vau te matamua; o vau hoi te faahopea. 13 Na tau rima i haamau i te fenua, e na tau rima atau i hohora i te raˈi: ia parau vau ia ratou, ua haere faaite mai ratou.
14 E haaputuputu atoa mai, outou atoa, e faaroo mai: o vai to ratou i faaite mai i teie nei mau parau? o tei auhia e Iehova ra, te rave ïa i to ˈna hinaaro ia Babulonia, e to ˈna te rima e iri i nia i te Kaladaio ra. 15 O vau, o vau nei â tei parau atu; o vau tei tii ia ˈna: na ˈu oia i aratai mai, e riro to ˈna tere i te manuïa.
16 E haafatafata mai ia ˈu nei, e faaroo mai outou i teie: aitâ a ˈu e parau huna mai te matamua mai â: i te anotau i tupu ai, tei reira vau. E teie nei, ua tono mai te Fatu ra o Iehova e to ˈna Varua ia ˈu.
17 Te na ô maira Iehova; o to oe Ora, Tei Moˈa i Iseraela nei: O vau to Atua ra, o Iehova; o tei faaite ia oe i te mea e maitai ai oe ra; o tei aratai ia oe na te eˈatia maitai ia haere oe ra. 18 Ahiri oe i faaroo mai i te mau faaue na ˈu e; ua riro ïa to oe maitai mai te pape pue ra; e ta oe utua mai te are moana ra: 19 e to huaai ra mai te one tahatai ra ïa; e ta to opu e fanau ra, mai to ˈna atoa ra ïa; e ore hoi to ˈna iˈoa e ooti-ê-hia, e ore hoi e haamouhia i mua ia ˈu nei.
20 E haere mai outou mai roto i Babulonia; e maue mai mai te fenua o te Kaladaio; e faaite i te reira ma te reo oaoa; e parau i te reira, e ia puroro atu te reo i te hopea mai o te fenua ra: e parau outou, Ua faaora Iehova i tana tavini ia Iakoba. 21 Aore ratou i poihâ i na fenua mǎrô ra, tei arataihia ratou e ana; ua faatahe mai oia i te pape no roto i te mato na ratou; ua vahi ihora oia i te mato, puroro noa maira te pape. 22 Te na ô maira Iehova, Aitâ roa o te paieti ore ra e hau.